ايماقتار • 26 مامىر، 2020

قاراعاندى وبلىسىندا پتر-زەرتحانالار اشىلادى

86 رەت كورسەتىلدى

ماۋسىم ايىنىڭ باسىندا تەمىرتاۋ مەن جەزقازعان قالالارىندا كوروناۆيرۋس ينفەكتسياسىن انىقتايتىن پتر-زەرتحانالاردىڭ اشىلاتىنىن وبلىس اكىمى جەڭىس قاسىمبەك مالىمدەدى.

جەرگىلىكتى Saryarqa تەلەارناسىنىڭ تىكەلەي ەفيرىندە سويلەگەن سوزىندە ول مۇنداي زەرتحانالار اشۋدى وبلىستىڭ بارلىق ءىرى جۇمىس بەرۋشىلەرى دە قولعا الۋى كەرەكتىگىن ايتتى.

– الەۋمەتتىك ازاماتتىق جاۋاپكەرشىلىك تانىتىڭىزدار، قىزمەتكەرلەرىڭىزدىڭ دەنساۋلىعىنا قامقورلىق جاساڭىزدار جانە قىزمەتكەرلەرىڭىزدى تەستىلەۋ ءۇشىن كوشپەلى زەرتحانالاردىڭ جۇمىسىن ۇيىمداستىرىڭىزدار. بۇل ءوز كەزەگىندە ۆيرۋس انىقتالعان جاعدايدا تارالۋ تىزبەگىنىڭ جولىن كەسۋگە مۇمكىندىك بەرەدى، ال دەر كەزىندە باستالعان ەمدەۋ اۋرۋدىڭ اۋىر تۇرىنە كوشۋىنە جول بەرمەيدى، – دەدى جەڭىس قاسىمبەك.

بۇگىندە مۇنداي زەرتحانا تەك قاراعاندى قالاسىندا عانا جۇمىس ىستەيدى. ونىڭ قۋاتى تاۋلىگىنە 1 200 ادامعا تەست جاساۋعا عانا جەتەدى.

«ارسەلوميتتال تەمىرتاۋ» كومپانياسى تەمىرتاۋدا زەرتحانا اشۋ ءۇشىن «وليمپ» كلينيكالىق-دياگنوستيكالىق زەرتحاناسىمەن شارت جاساستى. ءساتىن سالسا، مۇندا كۇن سايىن مىڭداعان تەست وتكىزىلەتىن بولادى.

جەزقازعاندا قۋاتى تاۋلىگىنە 500 تەست بولاتىن پتر-زەرتحاناسىن ىسكە قوسۋ جوسپارلانعان. وعان قاجەتتى قۇرال-جابدىقتار «قازاقمىس» كورپوراتسياسىنىڭ ەسەبىنەن ساتىپ الىندى. مۇنداي زەرتحانانى بالقاش قالاسىندا دا اشۋ جوسپاردا بار.

قازىرگى تاڭدا كۇننەن كۇنگە ءورشىپ بارا جاتقان كوروناۆيرۋستىڭ سالدارىنان مەديتسينا سالاسىنداعى ماسەلەلەرگە تىڭ كوزقاراسپەن قاراۋ قاجەتتىگى تۋىندادى. مىسالى، بۇگىندە قاراعاندى وبلىسىندا اۋرۋحانالار مەن ەمحانالار قارقىندى تۇردە جاڭعىرتىلۋدا. عيماراتتار ىشىندە قوسىمشا ينفەكتسيالىق بولىمشەلەر اشۋ ءۇشىن قايتا جوسپارلاۋ جۇرگىزىلەدى، توسەكتەردىڭ سانى ارتتىرىلادى. وبلىستا ينفەكتسيالىق قىزمەتتى قالپىنا كەلتىرۋ جانە دامىتۋ بويىنشا وڭىرلىك جوسپاردى جۇزەگە اسىرۋ كوزدەلگەن.

بيىلعى جىلدىڭ قاراشا ايىنا دەيىن وبلىستىق بيۋدجەتتەن 905 ملن تەڭگە ءبولىپ، جەتى نىساندى قالپىنا كەلتىرۋ جانە جاڭعىرتۋ جوسپاردا بار. ينفەكتسيالىق بولىمشەلەردى قوسىمشا جابدىقتاۋعا 400 ملن تەڭگە قاراستىرىلعان.

جەڭىس قاسىمبەك وبلىستاعى كلينيكالىق ەپيدەميولوگتاردىڭ بارلىعى كاسىبي دەڭگەيلەرىن مىندەتتى تۇردە ارتتىرۋلارى كەرەك دەپ سانايدى. سوندا عانا وبلىستا زاماناۋي ستاندارتتارعا جاۋاپ بەرەتىن، بىلىكتى ماماندارمەن قامتاماسىز ەتىلگەن ينفەكتسياعا قارسى قاۋىپسىزدىكتىڭ مىقتى ينفراقۇرىلىمى قۇرىلاتىنىن اتاپ ءوتتى ول.

سوڭعى جاڭالىقتار

ۇقساس جاڭالىقتار