ايماقتار • 26 مامىر، 2020

ونلاين فورمات وڭتايلىلىعىن كورسەتتى

101 رەت كورسەتىلدى

قاشىقتان قىزمەت كورسەتۋ ءۇردىسى بۇرىننان بار بولسا دا وسى جولى ۇتىمدى جۇيە رەتىندە قولدانىلدى.

الەمدى جايلاعان ىندەتكە بايلانىستى جاريالانعان شەكتەۋ جاعدايىندا مادەنيەت مەكەمەلەرى، اتاپ ايتساق، كىتاپحانالار جۇيەلى جۇمىس ارناسىندا قىزمەت جاسادى دەسەك، ارتىق ايتقاندىق ەمەس. وسكەمەندەگى ا.پۋشكين اتىنداعى شىعىس قازاقستان وبلىستىق كىتاپحاناسى دا وقىرمانعا ونلاين قىزمەت كورسەتتى. وبلىستىڭ باستى مادەنيەت وشاقتارىنىڭ بىرىنە سانالاتىن وسىناۋ پاراسات ورداسىنا جاي ۋاقىتتىڭ وزىندە كۇنىنە جۇزدەگەن وقىرمان كىرىپ شىعاتىن ەدى. ال كارانتين ۋاقىتىندا، توتەنشە جاعداي كەزىندە كىتاپحانا قىزمەتى بۇرىنعىدان دا ەسەلەنە ءتۇستى. قاشىقتان قىزمەت كورسەتۋ ءۇردىسى بۇرىننان بار بولسا دا وسى جولى ۇتىمدى جۇيە رەتىندە قولدانىلدى. دەسە دە ونلاين جۇمىس كىتاپحانانىڭ ءداستۇرلى جۇمىس ىرعاعىن بۇزىپ، وقىرمانداردىڭ كىتاپحانادا وتەتىن شارالاردى قاشىقتان تاماشالاۋعا بولادى دەگەن تۇسىنىك قالىپتاستىرۋى دا مۇمكىن. الايدا كىتاپحانا كىتاپ ورداسى بولعاندىقتان ەكى تىزگىندى تەڭ ۇستاپ، زاماناۋي جانە ءداستۇرلى فورماتتى قوسا الىپ ءجۇرۋ -  بۇگىننىڭ باستى تالابى. «كىتاپحانا قىزمەتىنە بۇگىنگى تاڭدا جان جاقتى دامىعان اقپاراتتىق تەحنولوگيانى قولدانۋدىڭ ماڭىزى زور. ۇيىمداستىرىلاتىن ءاربىر شارانى قاساڭ فورماتپەن ەمەس، جاڭا ۇلگىدە، زامانۋي تاسىلمەن وتكىزىپ كەلەمىز. بۇل ءۇردىستىڭ ماڭىزى ايىرىقشا. ەڭ باستىسى، ءبىر مەزگىلدە جۇزدەگەن وقىرماندى قامتىپ، ولاردىڭ سان ساۋالدارىنا جاۋاپ تابۋعا بولادى. بۇل - ونلاين شارالاردىڭ باستى ەرەكشەلىگى. ءبىز ونلاين قىزمەتتى بۇرىننان پايدالانىپ كەلەمىز. بۇل جولى كارانتين كەزىندە وسى ءتاسىلدى بارىنشا قولدانىپ، وقىرمان قاۋىمنىڭ سۇرانىسىنا ساي قىزمەت ەتتىك» دەيدى كىتاپحانا ديرەكتورى بيبىگۇل شاعيەۆا.

كىتاپحاناشىلار قاۋىمى جۇمىس ىرعاعىن باسەڭدەتپەي، قالىڭ وقىرمان قاۋىمدى سۇيىكتى قالامگەرلەرىمەن، مادەنيەت مايتالماندارىمەن، عالىمدار جانە جۋرناليستەرمەن ونلاين فورماتتا جۇزدەستىردى. اتاپ ايتقاندا، مەملەكەتتىك سىيلىقتىڭ يەگەرى الىبەك اسقاروۆ، جازۋشى نۇرداۋلەت اقىش، جازۋشى الىبەك قاڭتارباەۆ، قازاقستان رەسپۋبليكاسىنىڭ مادەنيەت قايراتكەرى ەركىن نۇرازحان سىندى اعا بۋىن قالامگەرلەرمەن قاتار اقبەرەن ەلگەزەك، داۋلەتكەرەي كاپ ۇلى، جانات اسكەربەكقىزى، باۋىرجان قاراعىز ۇلى، ەربول بەيىلحان، ۇلاربەك نۇرعالىم، باقىتگۇل باباش سىندى اقىندارمەن تىكەلەي ەفيرلەر ۇيىمداستىرىلىپ، وقىرماندار جاۋھار جىرمەن سۋسىنداپ، ساۋالدارىنا جاۋاپ الىپ، اسەرلى اڭگىمەگە بولەندى.  

 سونىمەن قاتار فوتوگراف، وبلىستىق «ديدار» گازەتىنىڭ جاۋاپتى حاتشىسى مەرەي قاينار ۇلىمەن ونلاين كەزدەسۋ ءوتتى. قىزىربەك دۇرگىنباي ۇلى باستاعان بىرقاتار جەرگىلىكتى اقىن، جازۋشى وقىرمانمەن سۇحباتتاستى.

 كىتاپحانا تەك ونلاين كەزدەسۋمەن عانا شەكتەلمەي «اۆتورلىق بەينەبايان» ايدارىن اشىپ، شىعىستان شىققان شىعارماشىلىق يەلەرىنىڭ حالىققا تىلەگى، ولەڭ جىرلارى مەن ءان-كۇيى وقىرمانعا ۇسىنىلدى. «اۆتورلىق بەينەبايان» Biz Birgemiz اكتسياسى اياسىندا تانىمال ادامداردىڭ بەينەجولداۋلارى مەن ءارتۇرلى مامانداردىڭ كەڭەستەرى بەرىلدى.

 بۇل ايدار ارقىلى مادەنيەت سالاسىنىڭ مايتالماندارى اكتەر، دراماتۋرگ قانات ءجۇنىسوۆ، اقىن، «دارىن» مەملەكەتتىك جاستار سىيلىعىنىڭ يەگەرى قالقامان سارين، مەرەي قارت، دينارا مالىك، اكتەر دارىن قاليبەك، انشىلەر قادىلبەك وماروۆ، مارجان تىلەۋلينوۆا سىندى ونەر يەلەرىمەن قاتار جاس شىعارماشىل جاستاردىڭ تۋىندىلارى بەينەبايان تۇرىندە ناسيحاتتالدى.

 مامىر ايىنىڭ 18-22 ارالىعىندا ۇلى ابايدىڭ 175 جىلدىعىنا ارناپ «اباي: كەشە. بۇگىن. ەرتەڭ» ۆيرتۋالدى فورسايت-فورۋمى ۇيىمداستىرىلىپ، فورۋم سپيكەرلەرى – بەلگىلى قازاقستاندىق ابايتانۋشى-عالىمدار، جۋرناليستەر، وقىتۋشىلار، سونىمەن قاتار كاسىبي قىزمەتى اياسىندا اباي شىعارماشىلىعىن زەرتتەۋمەن اينالىسىپ جۇرگەن مادەنيەت سالاسى قىزمەتكەرلەرى كۇن سايىن باياندامالار جاساپ، ينتەراكتيۆتى ءدارىس، سۇحباتتار وتكىزىپ، فورۋمنىڭ ۆيرتۋالدى قاتىسۋشىلارىنىڭ سۇراقتارىنا جاۋاپ بەردى. بالالار شىعارماشىلىعىنا دا دەن قويىلىپ، رەسپۋبليكالىق ء«مولدىر بۇلاق» جۋرنالىنىڭ باس رەداكتورى، اقىن سايات قامشىگەر باستاعان بىرنەشە بالالار جازۋشىلارىمەن بولعان تىكەلەي ەفيرلەر مەن بالالار مەن جاسوسپىرىمدەرگە ارنالعان ءتۇرلى ونلاين ۇيىرمە، كلۋب، تىلدىك كۋرستار جۇمىستارى جاس جەتكىنشەكتەردىڭ زور قىزىعۋشىلىعىن تۋعىزدى.

وسكەمەن

 

 

سوڭعى جاڭالىقتار

جارىس پەن تابىس

ەكونوميكا • بۇگىن، 00:00

اقىلدىڭ ازابى

تاريح • كەشە

مەيرامحانالار جانە پاندەميا

كوروناۆيرۋس • كەشە

جۇرت جاعاجاي ىزدەپ ءجۇر

ايماقتار • كەشە

ۇقساس جاڭالىقتار