باعاناشىل ىقشام اۋدانىندا ورنالاسقان بالالار ۇيىندە بۇگىندە 100-دەن استام جەتكىنشەك تاربيەلەنەدى. مەكەمە ديرەكتورى گۇلميرا قوندىباەۆانىڭ ايتۋىنشا, جاستايىنان تاعدىردىڭ تالايلى تالكەگىنە تۇسكەن جاسوسپىرىمدەردىڭ سانى جىل وتكەن سايىن ازايۋدا. ءبىر جاعىنان بۇل جەتىمدەردى اسىراپ الۋعا نيەتتى ادامدار سانىنىڭ ارتۋىمەن دا بايلانىستى ەكەن.
– قازىرگى كۇندە مەملەكەت تاراپىنان اتا-انا قامقورلىعىنسىز قالعان بالالارعا, جەتىمدەرگە بارىنشا نازار اۋدارىلىپ وتىر. اتاپ ايتقاندا, ولار تەگىن تاماقپەن, باسپانامەن, الەۋمەتتىك پاكەتپەن قامتاماسىز ەتىلگەن. سونىمەن قاتار بالالار ۇيىنە قامقورلىق كەڭەسى دە ءاردايىم كومەك كورسەتىپ كەلەدى. دەسەك تە, قانداي دا ءبىر ماتەريالدىق جاعداي اتا-انا مەيىرىمى مەن ماحابباتىن بەرە الماسى انىق. سوندىقتان دا ءبىز مۇمكىندىگىمىزشە بالالار ءۇشىن ەكىنشى انا بولۋعا تىرىسامىز, – دەيدى گۇلميرا قوندىباەۆا.
ءوز كەزەگىندە قىزدار ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ جەتەكشىسى جاندار اسان وقۋ ورنى تاراپىنان وسى تاقىلەتتەس ىزگى ىستەر جالعاسا بەرەتىن اتاپ ءوتتى.
– اتا-اناسىنىڭ تاربيەسىن كورىپ, سەزىنە الماعان بالا مەن تولىققاندى وتباسىنداعى جەتكىنشەكتىڭ بويىندا ايىرماشىلىقتىڭ بولۋى زاڭدىلىق سياقتى. قالاي بولعاندا دا تاعدىر تەپەرىشىن كورگەن بالالاردىڭ جاي-كۇيىنە قاراسۋ, قولداۋ كورسەتۋ – پارىز ىسپەتتەس. وسىنى ءاربىر ادام جان-تانىمەن سەزىنە بىلسە ىزگىلىككە نەگىزدەلگەن قوعام قالىپتاستىرۋدىڭ العىشارتى بولار ەدى, – دەدى جاندار اسان.
ال مۋزىكالىق ءبىلىم بەرۋدىڭ تەرياسى مەن ادىستەمەسى كافەدراسىنىڭ مەڭگەرۋشىسى ديدار احمەتجانوۆا ۇرپاق تاربيەسى, ۇلتتىق سالت-داستۇرلەر, جاستاردى ۇلتجاندىلىققا باۋليتىن ادەبيەتتەردى مەكەمە باسشىسىنا تابىستاپ, بالالاردىڭ ومىردە ءوز ورىندارىن تابۋعا نيەتتەس ەكەندىگىن جەتكىزدى. سونىمەن قاتار كەزدەسۋ بارىسىندا ۋنيۆەرسيتەت تۋرالى دا كەڭىنەن اقپارات بەرىلدى.
بالالار ءۇيىنىڭ ديرەكتورى گۇلميرا قوندىباەۆا پاراسات مەكتەبى اتانعان ۇلاعات ۇياسىنىڭ قايىرىمدى ىسكە مۇرىندىق بولعانى ءۇشىن العىسىن ءبىلدىرىپ, ريزاشىلىعىن جەتكىزدى.
الماتى
