قاسبەت جۇمىستارىنىڭ شەبەرى راحات احمەتوۆ ۋاقىتشا جۇمىسىنان ايرىلعان. جۇمىسپەن قامتۋ باعدارلاماسى تۋرالى ەستىگەن ول, ەڭبەك جانە الەۋمەتتىك قورعاۋ باسقارماسىنا جۇگىندى. وندا شەبەرگە بىرنەشە ۇسىنىس بەرىلدى.
«قازىر مەن قاسبەت جۇمىستارىنىڭ شەبەرىمىن, جۇمىس قيىن ەمەس. وتە ۇلكەن جاۋاپكەرشىلىك. مەن فيبروتسەمەنتتىك پانەل ورناتاتىن كونسترۋكتسيانى جينايمىن. بۇل جەلدەتىلەتىن قاسبەتى بولت ارقىلى بەرىك بەكىتىلەدى. بۇل كونسترۋكتسيا وڭاي جينالادى, ۇزاق ۋاقىتقا جانە بەرىك ورناتىلادى. مۇنىڭ ءبارى ادامداردىڭ يگىلىگى ءۇشىن جاسالۋدا. ادام جۇمىسىن جاقسى كورە ءبىلۋى كەرەك», – دەيدى راحات احمەتوۆ.
قۇرىلىس كومپانياسىنىڭ وكىلى داۋرەن بۋلانوۆتىڭ ايتۋىنشا, «جۇمىسپەن قامتۋدىڭ جول كارتاسى – 2020-2021» بويىنشا جۇمىسقا ورنالاسۋعا كەلىسىم-شارت 15 مامىردا جاسالعان. سودان بەرى ولاردىڭ فيرماسىنان 110-عا جۋىق ادام جۇمىس تاپتى.
«ولار تاس قالاۋشىلار مەن جۇمىسشىلار. ءبىزدىڭ كومپانيا جاڭا قىزمەتكەرلەر قابىلداۋعا دايىن. ءبىز وسى باعدارلاما اياسىندا جۇمىس ىستەۋگە دايىنبىز», – دەپ اتاپ ءوتتى د.بۋلانوۆ.
«جۇمىسپەن قامتۋدىڭ جول كارتاسى – 2020-2021» باعدارلاماسى اياسىندا ەلوردادا 15 مىڭنان استام ادامدى جۇمىسپەن قامتۋ جوسپارلانعان. بۇگىندە ەلوردادا «جۇمىسپەن قامتۋ جول كارتاسى» باعدارلاماسى اياسىندا 2325 ادام جۇمىسقا ورنالاستىرىلدى, 78 ۇيىممەن نيەت حاتتاماسى جاسالدى. 72 جوبا بويىنشا جۇمىستار باستالدى. ەلوردا تۇرعىندارى ءتۇرلى باعىتتار بويىنشا باستالعان 72 ينفراسترۋكتۋرالىق جوباعا جۇمىسقا ورنالاسا الادى. جۇمىسپەن قامتۋدىڭ جول كارتاسى بويىنشا الەۋمەتتىك سالا, ينجەنەرلىك-كولىكتىك ينفراقۇرىلىم, تۇرعىن ءۇي-كوممۋنالدىق شارۋاشىلىق, ەلدى مەكەندەردى اباتتاندىرۋ بويىنشا 117 ينفراقۇرىلىمدىق جوباعا جۇمىسقا ورنالاستىرۋ جوسپارلانۋدا.
