بۇل اڭگىمەگە وبلىستاعى «نۇرقازعان» كەنىشىنىڭ قىزمەتكەرلەرى اراسىندا كوروناۆيرۋس ينفەكتسياسىنىڭ بوي بەرمەي ءورشۋى سەبەپ بولدى. اتالعان جاعدايعا قاتتى الاڭداعان وبلىس باسشىلىعى كاسىپورىندار باسشىلارىنان سانيتارلىق-ەپيدەميولوگيالىق نورمالاردىڭ ساقتالۋىن مۇقيات قاداعالاۋدى تالاپ ەتتى.
وبلىس اكىمى جەڭىس قاسىمبەك «نۇرقازعان» كەنىشىندەگى وكىنىشتى جاعدايدىڭ باسقا ونەركاسىپتىك كاسىپورىنداردا قايتالانباۋ كەرەكتىگىنە باسا ءمان بەردى
– سىزدەر كەنىشتەگى جاعدايدىڭ ساناۋلى كۇن ىشىندە بۇكىل وبلىستاعى جالپى اۋرۋشاڭدىق احۋالدى قيىنداتىپ جىبەرگەنىن كوردىڭىزدەر. قازىر كەنىشتەگى جۇمىس توقتاتىلعان, بىراق بىزدە جۇمىسىن توقتاتۋعا بولمايتىن كاسىپورىندار بار. سوندىقتان, سانيتارلىق-ەپيدەميولوگيالىق نورمالاردىڭ ساقتالۋىن مۇقيات قاداعالاۋ كەرەك. دەنساۋلىق ساقتاۋ باسقارماسى مەن باس سانيتارلىق دارىگەر بەرەتىن ۇسىنىستاردى ەسكەرۋ قاجەت, – دەدى ول.
قازىرگى تاڭدا وڭىردەگى بارلىق كاسىپورىندار كۇشەيتىلگەن سانيتارلىق تارتىپكە كوشكەن. قىزمەتكەرلەردى ماسكالارمەن جانە قولعاپتارمەن قامتاماسىز ەتۋ, ءۇي-جايلاردى انتيسەپتيكالىق ەرىتىندىلەرمەن وڭدەۋ, جەكە زاتتارعا ارنالعان شكافتاردى ولاردىڭ اراسىنداعى قاشىقتىق كەمىندە ءبىر جارىم مەتر بولاتىنداي ەتىپ ورنالاستىرۋ سياقتى تالاپتاردى بۇلجىتپاي ورىنداۋ قاتاڭ تۇردە قاداعالانادى. زاۋىتتارداعى اس بلوكتارى دا باسقاشا جۇمىس ىستەي باستادى. ادامدار كەزەكتى قالىپتاستىرماۋ ءۇشىن وزىنە-ءوزى قىزمەت كورسەتۋ رەجىمىن الىپ تاستالىندى. كەيبىر مەكەمەلەردە اسحانادا تۇسكى اس لانچبوكسپەن الماستىرىلدى.
اۋىسىم باستالار الدىندا ءوڭىردىڭ بارلىق كاسىپورىندارىندا قىزمەتكەرلەردىڭ تەمپەراتۋراسى ولشەنەدى. بۇل تالاپتار مەردىگەرلەرگە دە قاتىستى. مىسالى, گرەس-توپاردا ولاردان كوروناۆيرۋس ينفەكتسياسىنا تەكسەرىلۋ ءۇشىن پتر-تالداۋدان ءوتۋ تالاپ ەتىلەدى.
«گرەس-توپار» جشس ديرەكتورى ەۆگەني نيكيتين رەزەرۆتىك جوسپار رەتىندە كازارمالىق رەجىمگە كوشۋدى قاراستىرىپ جاتقاندارىن باياندادى.
– بىزگە جۇمىستى قانداي جاعدايدا دا توقتاتۋعا بولمايدى. سوندىقتان, قاجەتتىلىك تۋىنداسا, قىزمەتكەرلەر جۇمىستان سوڭ ۇيلەرىنە قايتپاي, ارنايى قاراستىرىلعان ءۇي-جايلارعا ورنالاستىرىلاتىن بولادى. مۇنداي شارالار ينفەكتسيانىڭ تارالۋىن توقتاتۋعا جانە بايلانىسۋشىلار سانىن قىسقارتۋعا كومەكتەسەدى, – دەدى ول.
قازىرگى تاڭدا كاسىپورىن باسشىلارى قىزمەتكەرلەرىن كۆي-عا تەستىلەۋگە ەرەكشە كوڭىل بولە باستادى. مىسالى, «ارسەلورميتتال تەمىرتاۋ» كومپانياسى پتر-تالداۋ جۇرگىزۋ ءۇشىن «وليمپ» كلينيكالىق-دياگنوستيكالىق زەرتحاناسىمەن شارت جاساسقان.
– قازىر ءبىز ءۇشىن ەرەكشە ماسەلە – قىزمەتكەرلەردىڭ جۇمىس ورىندارىنا كەلۋىن, ولاردىڭ شاحتاعا كەتۋىن جانە ءتۇسۋىن باقىلاۋ. اتاپ ايتقاندا, بۇل الەۋمەتتىك قاشىقتىقتى ساقتاۋ, ماسكالىق رەجىم, كولىك پەن ءۇي-جايلاردى دەزينفەكتسيالاۋ. مۇنىڭ ءبارى بىزدە ساقتالادى, دەگەنمەن قىزمەتكەرلەرگە ۇنەمى باقىلاۋ مەن نۇسقاۋ جاساپ وتىرۋ قاجەت, – دەدى «ارسەلورميتتال تەمىرتاۋ» اق كومىر دەپارتامەنتىنىڭ ديرەكتورى اندرەي چەرنوماز.
جەڭىس قاسىمبەك ونلاين-جيىن بارىسىندا مامانداردىڭ بولجامى بويىنشا, ىندەتتىڭ قايتالانۋى ەلىمىزدە وسى جىلدىڭ قىركۇيەك-قازان ايلارىندا بولۋى مۇمكىن ەكەنىن تىلگە تيەك ەتتى. «ياعني, مۇنداي جاعداي جۇمىس جوسپارىن قايتا قۇرۋدى تالاپ ەتەدى», دەپ اتاپ ءوتتى ول.
جيىن سوڭىندا جەڭىس قاسىمبەك قاراعاندى وبلىستىق دەنساۋلىق ساقتاۋ باسقارماسىنىڭ باسشىسىنا مىندەتتى مەديتسينالىق ساقتاندىرۋ قورىنان قالا قۇراۋشى كاسىپورىنداردىڭ قىزمەتكەرلەرى ءۇشىن COVID-19 سكرينينگتەرىن قارجىلاندىرۋ مۇمكىندىگىن قاراستىرۋدى تاپسىردى.
قاراعاندى وبلىسى
