كىتاپتىڭ العى ءسوزىن جازعان قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ قازاق پەن ۇيعىر حالقى اراسىنداعى دوستىق قارىم-قاتىناستاردى بايانداي كەلە, ۇيعىر جازۋشىلارى زيا سامەدي, حيزمەت ابدۋللين مەن تۋىندى اۆتورى احمەتجان ءاشيريدىڭ شىعارماشىلىعى جونىندە ءسوز قوزعايدى. ۇيعىر ادەبيەتىنىڭ وكىلدەرى قازاقتاننىڭ بىرلىك پەن ىنتىماعىن ساقتاپ, تۇركىتىلدەس ەلدەردىڭ مادەنيەت جانە ونەر سالاسىنداعى بايلانىستارىن نىعايتۋ جولىندا سىڭىرگەن ەڭبەكتەرىن اتاپ وتەدى. سونداي-اق كىتاپتىڭ جارىق كورۋىنە دەمەۋشىلىك جاساعان قازاقستان حالقى اسسامبلەياسىنىڭ بەلدى مۇشەسى, قوعام قايراتكەرى احمەتجان شاردينوۆقا, ازەربايجانداعى دۇنيەجۇزىلىك جاس تۇرىك جازۋشىلارى وداعىنىڭ توراعاسى اكبار قوشالىعا ريزاشىلىق بىلدىرەدى.
ال باكۋدە تۇراتىن ونەرتانۋشى-عالىم ءسانۋبار حادجيەۆا-ءىلياسلى كىتاپتىڭ ءسۇيىنشى داناسىن وقىپ شىعىپ, «يديكۋت» – ازەربايجان تىلىنە اۋدارىلعان ەڭ العاشقى ۇيعىر رومانى» دەي كەلە, شىعارما وزەگىنە تۇسىنىكتەمە بەرەدى.
«840 جىلى ورحونداعى ۇيعىر مەملەكەتى ىدىرايدى. وگە تەكين ءبىراز ۋاقىتتان كەيىن مەملەكەتتى قايتا قالپىنا كەلتىرەدى. الايدا قىتايلار شابۋىل جاساپ, سول كەزدە بيلىكتە بولعان سوڭعى حان ءىى كاساردىڭ اعاسىنىڭ ۇلى پان تەكيننىڭ جانە باس ءۋازىر سارچۋكتىڭ باسشىلىعىمەن 15 ۇيعىر تايپاسى تيان-شان تاۋىنىڭ شىعىسىنا قاراي بەتتەيدى. مۇندا ولار ەكى بولىككە بولىنەدى. ولاردىڭ ءبىر بولىگى – پان تەكيننىڭ باسشىلىعىمەن سولتۇستىك-شىعىسقا ءوتىپ, 5 اۋداننان تۇراتىن بەسبالىق قالاسىن سالادى. ۋاقىت وتە كەلە قالا گۇلدەنەدى. بۇل جەردىڭ بيلەۋشىلەرى «يديكۋت» دەپ اتالعان.
كىتاپتى قىزىقتى ەتەتىن تاعى دا ءبىر اسەرلى جايت, سول كەزدەگى تاريحي كورىنىسكە نەگىزدەلگەن اقپارات كوپ كەزدەسەدى. تۋىندىنى وقي وتىرىپ, ۇيعىرلاردىڭ تاريحىمەن قوسا, موڭعولداردىڭ دا تاريحىنا, مادەنيەتىنە, كيىم كيۋ داستۇرىنە, نانىم سەنىمدەرىنە جانە باسقا ناقتى دەرەكتەرگە كۋا بولامىز. سوندىقتان تاريحي شىندىققا نەگىزدەلگەن «يديكۋت» رومانى ازەربايجان مەملەكەتىندە دە ءوز وقىرمانىن تابادى دەپ سەنەمىز»,
دەيدى.
جيناقتىڭ تانىستىرىلىمى الداعى ۋاقىتتا باكۋدە جانە الماتى قالاسىندا جۇزەگە اسادى.
