دۇيسەنبى كۇنگى ونلاين-بريفينگتە الماتى قالاسىنىڭ مەملەكەتتىك باس سانيتار دارىگەرى جانداربەك بەكشين ماسكا تاقپاعاندار مەن عيماراتقا ماسكاسىز كىرگىزگەن زاڭدى تۇلعالارعا سالىناتىن ايىپپۇلداردىڭ مولشەرىن ايتتى.
جانداربەك بەكشين جۇمىسىنا قايتا كىرىسكەن مەكەمەلەردە, عيماراتتاردا ماسكاسىز جۇرگەن ادامعا 5 اەك – 13 890 تەڭگە ايىپپۇل تاعىلاتىنىن ايتتى. ال, نىسان يەسىنە ازاماتتى ماسكاسىز كىرگىزگەنى ءۇشىن 15 اەك – 41 670 تەڭگە ايىپپۇل سالىنادى.
«ادامدار ەرىكسىز اۋزى-مۇرنىن, كوزىن ۇستاماۋى ءۇشىن كوشەدە دە ماسكا تاعىپ ءجۇرۋدى تالاپ ەتەمىز. سونداي-اق, عيماراتتارعا – دۇكەندەر, بازارلار, ساۋدا-ويىن ورتالىقتارىنا, دارىحانالارعا كىرگەندە ماسكا تاعۋ كەرەك. ءبىز ىشكى ىستەر ورگاندارىمەن بىرگە اكىمشىلىك جاۋاپكەرشىلىك شارالارىن قولدانا الامىز. ەگەر ازامات كارانتين ەرەجەسىن بۇزسا, اتاپ ايتقاندا ماسكا تاقپاسا, 5 اەك – 13 890 تەڭگە, ازاماتتاردى عيماراتقا ماسكاسىز كىرگىزسە, نىساننىڭ يەسى - لاۋازىمدى تۇلعا دا اكىمشىلىك جاۋاپقا تارتىلىپ, 15 اەك – 41 670 تەڭگە تولەيدى. بارلىق نىساندا ماسكا تاعۋدى تالاپ ەتەمىز», – دەدى جانداربەك بەكشين.
الماتى قالاسىنىڭ مەملەكەتتىك باس سانيتار دارىگەرى ايىپپۇل مولشەرى بيزنەس تۇرىنە قاراي ەسەپتەلەتەنىن ايتا كەلە: «ەگەر شاعىن بيزنەس بولسا, ايىپپۇل 100 اەك – 277 800 تەڭگە, ورتا بيزنەس بولسا, 200 اەك – 555 600 تەڭگە, ءىرى كاسىپ بولسا, زاڭدى تۇلعاعا 500 اەك – 1 ميلليون 389 مىڭ تەڭگە بولادى. كارانتين ەرەجەسىن ساقتاۋدى تالاپ ەتۋ ءۇشىن وسىنداي قاتاڭ شارالار قابىلداۋعا ءماجبۇرمىز», دەدى
جانداربەك بەكشيننىڭ مالىمدەۋىنشە, ايىپپۇلدىڭ ەڭ ۇلكەن – 1 ميلليون 389 مىڭ تەڭگە. مۇنداي اكىمشىلىك جاۋاپكەرشىلىكتى ءىرى بيزنەس وكىلى ءوز موينىنا الادى.
الماتى
