جيىندا ءبىلىم ورداسىنداعى تۇلەكتەر جەتىستىگى مەن جەڭىستەرى اتالىپ ءوتىلدى. ءبىلىم, عىلىم بايگەلەرىندە توپ جارعان جاس زياتكەرلەر ونەر, سپورت سايىستارىندا جەڭىس تۇعىرىنان كورىنە ءبىلدى. بۇگىندە بۇل مەكتەپتى بىتىرگەندەر اقش, چەحيا, ۆەنگريا جانە رەسەيدەگى جوعارى وقۋ ورىندارىنىڭ ءبىلىم گرانتتارىنىڭ يەگەرى اتانسا, 19 وقۋشى نازارباەۆ ۋنيۆەرسيتەتىنە شاقىرتۋ الىپ, تاعى 19-ى قابىلداۋ كوميسسياسىنىڭ شەشىمىن كۇتىپ وتىر.
سوڭعى قوڭىراۋ سالتاناتىندا ءسوز العان مەكتەپ ديرەكتورى باقىت جۇماتاي بارشا مەكتەپ قاۋىمداستىعىن كەزەكتى وقۋ جىلىنىڭ ءساتتى اياقتالۋىمەن قۇتتىقتاپ, تۇلەكتەرگە ءسات ساپار تىلەدى.
تالانتتىلاردىڭ تالابىن ۇشتاعان مۇعالىمدەر مەن اتا-انالار دا قۇتتىقتاۋىن جەتكىزدى. قازاق اۋەنىنىنە الەمدى تامساندىرعان ديماش قۇدايبەرگەن باستاعان ەلىمىزدىڭ ونەر جۇلدىزدارى دا قىزىلوردالىق زياتكەرلەرگە مەرەكەلىك لەبىزدەرىن ارنادى.
سونداي-اق, «التىن بەلگىگە» ۇمىتكەر اققۋ شايحىبەك بارلىق جاس تۇلەكتەردىڭ اتىنان مەكتەپ ۇجىمىنا العىسىن ايتىپ, ءبىلىم الىپ جاتقان وقۋشىلارعا مەكتەپتىڭ بەرگەن مۇمكىندىكتەرىن تولىعىمەن پايدالانۋعا كەڭەس بەرىپ, جاڭا وقۋ جىلىندا تابىس تىلەدى.
شارا بارىسىندا مەكتەپ جانىنان قۇرىلعان ءوزىن-ءوزى باسقارۋ ۇيىمىن جۇرگىزىپ, بىلتىرعى وقۋ جىلىندا مەكتەپ پرەزيدەنتى بولعان ءبىتىرۋشى تۇلەك ارايلىم ومىربەكوۆا مەكتەپتىڭ قازىرگى كوشباسشىسى توميريس جۇماعاليەۆاعا ءبىلىم كىلتىن سالتاناتتى تۇردە تابىستادى.
