قازاقستان • 25 مامىر، 2020

ەرلان قارين «بەيبىت جيىندار تۋرالى» جاڭا زاڭعا قاتىستى پىكىر ءبىلدىردى

49 رەت كورسەتىلدى

پرەزيدەنتتىڭ كەڭەسشىسى ەرلان قارين مەملەكەت باسشىسى قول قويعان «بەيبىت جيىندار تۋرالى» جاڭا زاڭعا قاتىستى پىكىرىن Facebook پاراقشاسىندا جازدى.

«مەملەكەت باسشىسى «بەيبىت جيىندار تۋرالى» تۋرالى جاڭا زاڭعا قول قويدى. بۇل ۇلتتىق كەڭەستىڭ اياسىندا ۇسىنىلىپ، دايىندالعان پرەزيدەنتتىك ساياسي رەفورمالار پاكەتىنىڭ العاشقى ۇلكەن ناتيجەلەرىنىڭ ءبىرى. تۇڭعىش رەت ۇلتتىق زاڭنامادا بەيبىت جيىندار مەن شەرۋلەردى وتكىزۋدە رۇقسات الۋ ءتارتىبىنىڭ ورنىنا حابارلاندىرۋ ءتارتىبى ەنگىزىلىپ وتىر. جاڭا زاڭعا سايكەس ءاربىر قالانىڭ اۋداندارىنىڭ ورتالىعىندا مىندەتتى تۇردە ءۇش ورىن بەرىلەتىن بولادى جانە دە ەگەر جيىن يا شەرۋ بارىسىندا زاڭ بۇزۋشىلىق ورىن الىپ، ۇيىمداستىرۋشىلار تاراپىنان ءتيىستى شارالار قابىلدانسا ول جيىن توقتاتىلمايدى، ياعني جاڭا زاڭ ازاماتتارعا بەيبىت جيىندى وتكىزۋدەگى قۇقىعىن باسىمدىق رەتىندە بەكىتۋدە»، - دەدى ەرلان قارين.

ونىڭ ايتۋىنشا، بۇل زاڭنىڭ قابىلدانۋى ەلىمىزدىڭ ساياسي قوعامدىق ءومىرىنىڭ ودان ءارى دەموكراتيالاندىرۋ باعىتىنداعى ماڭىزدى وقيعا بولىپ تابىلادى.

«سونىمەن قاتار، پرەزيدەنت قاسىم-جومارت توقاەۆتىڭ باستاماسىمەن قۇرىلعان ۇلتتىق قوعامدىق سەنىم كەڭەسىنىڭ ناتيجەلى جۇمىسىنىڭ ايقىن كورىنىستەرىنىڭ ءبىرى. ۇلتتىق كەڭەستىڭ مۇشەلەرى اتالعان زاڭنىڭ دايىندالۋىنان باستاپ، تالقىلاۋلاردىڭ بارلىق ساتىلارىنا بەلسەنە ات سالىسىپ، زاڭ جوباسىنىڭ جەتىلدىرۋىنە ۇلكەن ۇلەس قوستى. سوندىقتان وسى زاڭنىڭ قابىلدانۋىمەن ۇلتتىق كەڭەستەگى ارىپتەستەرىمدى دە قۇتتىقتاپ، العىسىمدى بىلدىرەمىن»، - دەپ جازدى ەرلان قارين.

سوڭعى جاڭالىقتار

ۇقساس جاڭالىقتار