ايماقتار • 25 مامىر، 2020

«ءتىل-قازىنا» ورتالىعى ونلاين سەمينار وتكىزەدى

42 رەت كورسەتىلدى

29 مامىر كۇنى نۇر-سۇلتان قالاسىندا مادەنيەت جانە سپورت مينيسترلىگى ءتىل ساياساتى كوميتەتى شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن «اقپاراتتىق تەحنولوگيا تەرميندەرىنىڭ بۇگىنى: ۇلت ءتىلى جانە زامان ساباقتاستىعى» اتتى ونلاين سەمينار وتەدى.

باس قوسۋدىڭ باستى ماقساتى – جاھاندانۋ جاعدايىندا قازاقتىڭ عىلىمي ءتىلىن دامىتۋ ءۇشىن اقپاراتتىق تەحنولوگيا تەرميندەرىنىڭ ۇلتتىق ۇلگىسىن جاساۋ، جەتىلدىرۋ، جۇيەلەۋ ماسەلەلەرىن تالقىلاۋ جانە شەتتىلدىك تەرميندەردى يگەرۋدەگى ءساتتى تاجىريبەمەن ءبولىسۋ.

كەيبىر تەرميندەردىڭ ءتۇرلى بالامادا قولدانىلۋى، ياعني تەلەديدار، گازەت-جۋرنالداردا، وقۋلىقتار مەن ادەبيەتتەردە ءتۇرلى بالامالارىنىڭ قاتار ءجۇرۋى، ونىڭ ىشىندە ءساتسىز بالامالاردىڭ بولۋى شەتتىلدىك تەرميندەردى تۇپنۇسقا تۇرىندە قولدانۋ قازاق ءتىلىن عىلىم ءتىلى رەتىندە دامىتۋعا كەدەرگى كەلتىرۋدە. وسى ورايدا تەرميندەردىڭ بىرىزدىلىگىن ساقتاۋ – وزەكتى.

ونلاين-سەميناردىڭ بايانداماشىلارى اقپاراتتىق تەحنولوگيا سالاسىنداعى جەكەلەگەن تەرميندەردىڭ ءارتۇرلى بالامادا قولدانىلۋ فاكتىلەرىنە توقتالىپ، قولدانىستاعى شەتتىلدىك تەرميندەردىڭ ۇلەس سالماعىن ازايتۋدىڭ جولدارىن ۇسىنادى، اۆتورلىق قولدانىستاعى سوزدەر مەن تەرميندەردىڭ ۇلتتىق تەرمينولوگيانى جەتىلدىرۋگە تيگىزەتىن اسەرى مەن سالدارىن تالقىلايدى.

سونداي-اق سەميناردا سالا ماماندارى مەن جۇرتشىلىققا ادىستەمەلىك جاعىنان قولداۋ كورسەتۋ كوزدەلۋدە.

ءىس-شارانى سالا ماماندارى، فيلولوگتار مەن جوعارى وقۋ ورنىنىڭ ستۋدەنتتەرى، جالپى جۇرتشىلىق www.termincom.kz سايتىنىڭ YouTube كانالىنان كورە الادى.

سوڭعى جاڭالىقتار

ۇقساس جاڭالىقتار