كونفەرەنتسيا جۇمىسىنا مەكتەپكە دەيىنگى ءبىلىم بەرۋ ۇيىمدارىنىڭ ديرەكتورلارى, پەداگوگ-پسيحولوگتار, لوگوپەد-مۇعالىمدەر, دەفەكتولوگتار, ادىسكەرلەر, بالاباقشالار مەن شاعىن ورتالىقتاردىڭ تاربيەشىلەرى, بارلىعى 300-گە جۋىق پەداگوگ قاتىستى.
القالى جيىندا بالالاردى الەۋمەتتىك-ەموتسيالىق وقىتۋ, جاڭارتىلعان ءبىلىم بەرۋ كەڭىستىگىندە ادىستەمەلىك قىزمەتتى ۇيىمداستىرۋ, «مەنىڭ ءومىرىمنىڭ ەكومەكتەبى» پيلوتتىق جوباسىن جۇزەگە اسىرۋ, مەكتەپكە دەيىنگى ۇيىمداردا ينكليۋزيۆتى ءبىلىم بەرۋ ماسەلەلەرى تالقىلاندى.
كونفەرەنتسيانىڭ پلەنارلىق وتىرىسىندا SANA عىلىمي-تاجىريبەلىك پسيحولوگيا ورتالىعىنىڭ ديرەكتورى التىناي ابدراحمانوۆا, بۇۇ دامۋ باعدارلاماسىنىڭ جانە «تۇراقتى قالالار, ەلدى مەكەندەر» جوباسىنىڭ ساراپشىسى يرينا نەمتسان, «ينتەللەكتۋم» ورتالىعىنىڭ ديرەكتورى بيجان يگەنباەۆا ءسوز سويلەدى.
سونىمەن قاتار, قاتىسۋشىلارعا «كىشكەنتاي دانىشپاندار» جەكە دامىتۋشى بوكسى تانىستىرىلدى.
وتىرىس «SABAK.KZ: ينجەنەرلىك ويلاۋ», «مودەل 4ك», «مەكتەپكە دەيىنگى ءبىلىم بەرۋدىڭ جاڭا تەحنولوگيالارى – Lesson Study» جانە «ينكليۋزيۆتى ءبىلىم بەرۋ» پلاتفورماسىنداعى ءتورت باعىت بويىنشا ءوتتى. ءتورت سەكتسيالىق وتىرىستا 25 پەداگوگ ءسوز سويلەدى.
كونفەرەنتسيا اياسىندا «زاماناۋي مەكتەپكە دەيىنگى ءبىلىم بەرۋ: 4ك مودەلىن ەنگىزۋ – بالانى مەكتەپكە دايىنداۋ ءۇشىن ينجەنەرلىك ويلاۋ مۇمكىندىگىن, شىعارماشىلىق قابىلەتتەرىن دامىتۋ» جيناعىنا ءار ءتۇرلى باعىتتار بويىنشا 200-دەن استام ماقالا قابىلداندى.
قاراعاندى وبلىسى
