100-گە جۋىق ادام زارداپ شەككەن
تەرگەۋ دەپارتامەنتىنىڭ مالىمەتىنشە, كومپانيانىڭ باسشىلارى وڭىرلەردە فيليالدار اشىپ, جالدامالى مەنەدجەرلەردىڭ كومەگىمەن كليەنتتەردى ەلەكتروندى بيرجادا ۇلكەن پايداعا كەنەلەسىڭ دەپ الداپ سوققان. ناتيجەسىندە ينۆەستورلاردان جىمقىرعان قاراجاتتى وفشورداعى شوتتارىنا اۋدارىپ وتىرعانى اشكەرەلەندى.
«كومپانيانىڭ قىزمەتكەرلەرى ينۆەستورلاردان اقشانى العان سوڭ, ول تۋرالى اقپارات فورەكس-ديلەردىڭ سايتىنداعى جەكە كابينەتتە كورسەتىلەدى. وسىدان كەيىن ارنايى پلاگين ارقىلى بۇل شوت جويىلىپ, كليەنتتىڭ ساۋدادان جەڭىلگەنى حابارلانادى. ال ءىس جۇزىندە ينۆەستور بىردە-ءبىر ساۋدا - ساتتىققا قاتىسپاعان», - دەپ ايتادى ءتارتىپ ساقشىلارى.
سايكەسىنشە وسى ۋاقىتتا قىلمىستىق توپ ۇرلانعان قاراجاتتى باقىلاۋداعى شەتەلدىك فيرمالاردىڭ شوتتارىنا اۋدارىپ كەلگەن.
ترانسۇلتتىق قىلمىستىق جۇيەنىڭ ءىزى بار
تەرگەۋشىلەر قۇيتىرقى ارەكەتتىڭ ىسكە اسۋىنا كۇدىكتىلەرگە رەسەيلىك سىبايلاستارى قولعابىس ەتكەنىن ناقتىلادى. دالىرەك ايتقاندا, رەسەي ازاماتتارىمەن وفشورلىق ايماقتا بىرلەسكەن TeleTrade D.J. Ltd كومپانياسىن قۇرىپ, وندا الدانعان ينۆەستورلاردان جيناقتالعان ولجا تۇسسە كەرەك.
«قازىر بۇل ەلدىڭ قۇقىق قورعاۋ ورگاندارى TeleTrade قىلمىستىق جۇيەسىنە بايلانىسى بار رەسەيلىك ازاماتتارعا قاتىستى تەرگەۋ جۇمىستارىن جۇرگىزۋدە», - دەدى جاۋاپتى ۆەدومستۆو وكىلدەرى.
كومپانيا باسشىسى قۇرىقتالعان كۇنى نۇر-سۇلتان, الماتى, شىمكەنت قالالارىمەن بىرگە اقتوبە, قاراعاندى جانە ماڭعىستاۋ وبلىستارىنداعى فيرمانىڭ كەڭسەلەرىندە تەرگەۋشىلەر ءتىنتۋ جۇرگىزىپ, قىلمىستىق ىسكە قاتىستى قۇجاتتار الىندى. بۇگىندە اتالعان فاكتى بويىنشا پوليتسياعا ارىز تۇسىرگەندەردىڭ قاتارى 70-تەن اسادى.
قۇقىق قورعاۋشىلاردىڭ ايتۋىنشا, قوماقتى تابىسقا كەنەلەمىز دەپ مالدانعاندار الاياقتارعا 2 مىڭ دوللاردان باستاپ, 30 مىڭ دوللارعا دەيىن سەنىپ تاپسىرسا كەرەك. الايدا قىلمىستىق توپ ينۆەستيتسيانى وفشورعا اۋدارا سالىسىمەن, اقشانى بىردەن قولما-قولعا اينالدىرۋدى جولعا قويعان.
ىزدەۋدە ءجۇرىپ, كوز جۇمدى
ء سوز ورايى كەلگەندە ايتا كەتەيىك, بۇل TeleTrade-كە قاتىستى العاشقى داۋ ەمەس. وسىدان ەكى جىل بۇرىن رەسەيدە حالقىرالىق بروكەرلىك كومپانيانىڭ سول ەلدەگى باسشىسى ۆلاديمير چەرنوباي جانە ونىڭ ءىنىسى ولەگ سۋۆوروۆكە قاتىستى اسا ءىرى مولشەردەگى الاياقتىق بابى بويىنشا قىلمىستىق ءىس قوزعالىپ, حالىقارالىق ىزدەۋ جاريالانعان-دى. بۇعان قوسا 1 ملرد ءرۋبلدى جىمقىردى دەگەن كۇدىكپەن كومپانيانىڭ تاعى ءۇش قىزمەتكەرى قاماۋعا الىنعان بولاتىن.
تەرگەۋ مالىمەتتەرىنە سۇيەنسەك, 2016 جىلى كۇدىكتىلەر بروكەرلىك قىزمەتتى جۇرگىزۋگە ورتالىق بانكتىڭ ليتسەنزياسىن الىپ, TeleTrade برەندىن جامىلۋ ارقىلى «سۋىق قوڭىراۋ» ادىسىمەن كليەنتتەردى ىزدەۋگە كىرىسكەن. بىرنەشە جىل قاتارىنان ينۆەستورلارعا Forex نارىعىنا شىعۋعا ۋادە بەرىپ, بەلگىلى ستسەناري بويىنشا قاراجاتتى قالتاعا باسۋدى داعدىعا اينالدىرعان.
بىراق تا ىزدەۋدە جۇرگەن ۆ. چەرنوباي بىلتىر ماۋسىم ايىندا گەرمانيادا كوز جۇمعان ەدى. مارقۇم حالىقارالىق ىزدەۋ جاريالانباي تۇرىپ, ەۋروپاعا ونكولوگيالىق سىرقاتتان ەمدەلۋگە اتتانعان ەكەن.
