ايماقتار • 25 مامىر، 2020

«تەڭىزشەۆرويل» 7 ملن 680 مىڭ توننا مۇناي ءوندىردى

42 رەت كورسەتىلدى

اتىراۋداعى تەڭىز كەنىشىندەگى مەردىگەر كاسىپورىنداردىڭ جۇمىسشىلارىنان وقتىن-وقتىن قاۋىپتى ىندەت تابىلىپ جاتسا دا، مۇندا مۇناي ءوندىرۋ پروتسەسى توقتاعان جوق. كەن ورنىن يگەرەتىن «تەڭىزشەۆرويل» جشس ءبىرىنشى توقساندا 7 ميلليون 680 مىڭ توننا مۇناي ءوندىردى.

«كاسىپورىننىڭ وندىرىستىك جۇمىستارى قالىپتى رەجيمدە جالعاستىرىلىپ جاتىر. اسىرەسە، وندىرىستىك قىزمەت ءۇشىن ماڭىزى زور «كەلەشەك كەڭەيۋ»، «ۇڭعىما ەرنەۋىنىڭ قىسىمىن باسقارۋ» سەكىلدى جوبالاردى قاۋىپسىز تۇردە ىسكە اسىرۋ شارالارى جۇزەگە اسىرىلۋدا»، - دەدى بۇگىن «تەڭىزشەۆرويل» جشس ۇكىمەتپەن جانە جۇرتشىلىقپەن بايلانىس ءبولىمىنىڭ باس مەنەدجەرى رزابەك ارتىعاليەۆ.

ونىڭ مالىمدەۋىنشە، وسى كەزگە دەيىن اتالعان ەكى جوبانىڭ قۇرىلىسى 77 پروتسەنتكە ورىندالىپ وتىر. 

«مودۋلدەردى جاساۋ جانە ولاردى ءوندىرىس ورنىنان شىعارۋ  جۇمىستارى كەستەگە سايكەس جۇرگىزىلىپ جاتىر. تەڭىز كەنىشىندە  مودۋلدەردى قۇراستىرۋ  جالعاسا بەرەدى. ءبىز وندىرىسكە تىكەلەي قاتىسى جوق قىزمەتكەرلەردى ۋاقىتشا بوساتىپ، كەنىشتەن شىعارعانىمىزعا قاراماستان، ماڭىزدى جوبا اياسىنداعى جۇمىستاردى ارى قاراي ىسكە اسىرۋدامىز. وندىرىستىك قىزمەتتى ۇزدىكسىز قامتاماسىز ەتۋ ءۇشىن ءوز قىزمەتكەرلەرىمىزدى قورعاۋعا ارنالعان بىرقاتار قوسىمشا شارالاردى  ەنگىزدىك. تەڭىزدەگى قىزمەتكەرلەردى ۋاقىتشا  جۇمىستان بوساتۋ ناتيجەسىندە وزگە قىزمەتكەرلەردىڭ   دەنساۋلىعىنا زيان كەلتىرمەۋ  كوزدەلۋدە»، - دەدى ول.

وندىرىستىك قىزمەتتى  ۇزدىكسىز قامتاماسىز ەتۋگە باعىتتالعان قورعانىس شارالارىنىڭ ءبىرى –  جۇمىس ىستەيتىن قىزمەتكەرلەردى جەكە توپتارعا ءبولۋ.  بۇل  وپەراتيۆتى جۇمىس توبى مۇشەلەرىنىڭ ءبىرى ۆيرۋس جۇقتىرعان جاعدايدا، باسقا جۇمىس توبى ولاردىڭ ورنىن  الماستىرۋعا دايىن بولادى. وسىلايشا،   وندىرىستىك قىزمەتتى ۇزدىكسىز قامتاماسىز ەتۋدى جالعاستىرۋ توقتامايدى.

– جۇمىس ىستەۋ ءۇشىن بەرىلەتىن  رۇقساتتى ونلاين تىركەۋ ارنايى باعدارلاما مەن ءموبيلدى قۇرىلعىلار ارقىلى جۇزەگە اسىرىلۋدا. ءبىز ورتالىقتان باسقارۋ پۋلتتەرىن  شەكتەدىك. بولمەگە تەك  وپەراتورلار عانا كىرە الادى. سونىمەن قاتار، بولمەلەردى دەزينفەكتسيالاۋدىڭ قاتاڭ ەرەجەلەرى ەنگىزىلدى، - دەدى ر.ارتىعاليەۆ.

سوڭعى جاڭالىقتار

ۇقساس جاڭالىقتار