مەكتەپ-ينتەرناتتىڭ جارلىعىنا سايكەس 1 قىركۇيەك پەن 27 جەلتوقسان ارالىعىندا دەمالىسسىز وقىعان وقۋشىلار 29 جەلتوقسان - 27 قاڭتار ارالىعىندا قىسقى دەمالىستا بولدى. وسىعان بايلانىستى 2020 جىلدىڭ 16 ناۋرىزىنان باستاپ مەكتەپ-ينتەرنات قاشىقتان وقىتۋ جۇيەسىنە كوشتى. ءبىلىم جانە عىلىم ءمينيسترى ا. ايماعامبەتوۆ توتەنشە جاعدايدا وقىتۋ ۇدەرىسىن ۇيىمداستىرۋعا بايلانىستى بريفينگىندە ايتقان قاشىقتان وقىتۋدىڭ فورمالارى بويىنشا اباي اتىنداعى مەكتەپ-ينتەرناتى ونلاين پلاتفورمالار مەن الەۋمەتتىك جەلىلەر, تەلەارنا ارقىلى وقىتۋدى قولعا الدى. ءپان مۇعالىمى ءدارىس ساباعىن, تاپسىرماسىن كۇندەلىككە جۇكتەيدى. وقۋشى كورەدى, جۇكتەيدى, تۇسىنەدى. قوسىمشا ءبىلىمىن ارتتىرۋ ماقساتىندا «بالاپان» تەلەارناسى ارقىلى وقىتىلاتىن بەينەساباقتاردى كورىپ, تاپسىرمالارىن ورىندايدى.
كارانتين رەجيمىندە اتا-انالار مەن وقۋشىلاردىڭ مەكتەپپەن بىرلىكتە, ۇيلەسىمدە جۇمىس ىستەۋى ءۇشىن ءتۇرلى ونلاين پسيحولوگيالىق ترەنينگتەر وتكىزىلدى. وقۋشىلار مەن اتا-انالارعا كەڭەس بەرىلىپ, قاشىقتان وقۋدى ساپالى جۇرگىزۋگە باعىت-باعدار كورسەتىلدى. ءار سىنىپتا ونلاين اتا-انالار جينالىسى وتكىزىلىپ, جاڭا وقۋ جۇيەسى تۋرالى سۇراقتارعا جاۋاپ بەرىلىپ, ءتۇسىندىرۋ جۇمىستارى جۇرگىزىلدى. ءوز كەزەگىندە اتا-انالار دا بەينەروليكتەر ارقىلى مەكتەپ ۇجىمىنا, ۇستازدارعا دەگەن العىستارىن ايتىپ جاتتى.
قىسىلتاياڭ شاقتا ەلگە قولداۋ كورسەتۋ ماقساتىندا «بادىك ايتىس» دەپ اتالاتىن ەرەكشە ەستافەتانى باستاۋدى ءجون كوردىم. بادىك – تۇرمىس-سالت جىرلارىنىڭ ءبىر ءتۇرى. العاشقىدا اۋرۋ ادامدى نەمەسە مالدى ەمدەۋ ماقساتىندا ايتىلعان. بىرتە-بىرتە بادىكتى قىزدار مەن جىگىتتەر توبى بولىپ ءبولىنىپ ايتۋ سالتى شىققان. حالىق اۋىز ادەبيەتىنىڭ جادىگەرى بولعان وسى ايتىستى 10-سىنىپ وقۋشىسى, ايتىسكەر اقىن ابيتيلدا نۇريسلام ەستافەتا تۇرىندە باستاپ, ۇستازى, ايتىسكەر اقىن, مەكتەپ-ينتەرنات تۇلەگى سەرىك قاليەۆكە جولدادى. الەمدى جاۋلاعان ىندەتتى بايىرعى ءداستۇر بويىنشا «كوش, كوش» دەپ بادىك ايتىسپەن الاستاپ, بەتىن قايتارۋعا باعىتتالعان اباي مەكتەپ-ينتەرناتى شاكىرتتەرىنىڭ ەستافەتاسى كەلەر كۇننەن جاقسىلىقتى عانا ءۇمىت ەتىپ, 11 مامىر كۇنى اياقتالدى.
مەكتەپ-ينتەرناتتا «تاعىلىم» جوباسىنىڭ اياسىندا ايتىسكەر اقىن, تانىمال جۋرناليست, زەرتتەۋشى عالىم, ءتىلشى, پروفەسسورلارمەن جانە وزگە دە ءار سالانىڭ مايتالمان ماماندارىمەن تانىمدىق ساباقتار وتكىزىلىپ وتىرادى. قاشىقتان وقۋ جۇيەسىندە دە وسى ءۇردىس توقتاماي, مەكتەپ-ينتەرناتتىڭ رەسمي ءىnstagram پاراقشاسىندا تىكەلەي ەفير ارقىلى جالعاسىن تاپتى. اتاپ ايتار بولساق, ءساۋىر ايىندا س.دەميرەل اتىنداعى ۋنيۆەرسيتەت پروفەسسورى, پەداگوگيكا عىلىمدارىنىڭ كانديداتى ب.ا.جۇماقاەۆا «اباي تاعىلىمى» تاقىرىبىندا, مامىر ايىندا م.اۋەزوۆ اتىنداعى ادەبيەت جانە ونەر ينستيتۋتىنىڭ ەجەلگى ءداۋىر ادەبيەتى جانە تۇركولوگيا ءبولىمىنىڭ مەڭگەرۋشىسى, دوتسەنت, فيلولوگيا عىلىمدارىنىڭ كانديداتى قىدىر ت. ە. ء«ال-فارابي – وركەنيەت ويشىلى» تاقىرىبىندا ونلاين تانىمدىق ساباقتار وتكىزدى.
توتەنشە جاعداي كەزەڭىندە مەكتەپ-ينتەرنات ەل تانىعان تۇلەكتەردىڭ تاعىلىمدى تاعدىرىنان سىر شەرتەتىن «بالالىق شاققا ساياحات» جوباسىن قولعا الدى. جوبا مەكتەپ-ينتەرناتتىڭ رەسمي ءىnstagram پاراقشاسىندا تىكەلەي ەفير ارقىلى جۇرگىزىلۋدە. وسى جوبا اياسىندا ءساۋىر-مامىر ايلارىندا مەملەكەت جانە قوعام قايراتكەرى, گەنەرال-لەيتەنانت ءادىل شاياحمەتوۆ, ارداگەر ۇستاز, قر ەڭبەك سىڭىرگەن قايراتكەرى ورىنشا قارابالينا, كەدەن ءىسىنىڭ پولكوۆنيگى بەكەن نۇراحمەتوۆ, «TAS GROUP» كومپانيالار توبىنىڭ نەگىزىن قالاۋشى كاسىپكەر دۋلات تاستەكەەۆ, ايتىسكەر اقىن, قر مادەنيەت قايراتكەرى سەرىك قاليەۆ, قر ءبىلىم جانە عىلىم ءمينيسترىنىڭ قوعام جانە باق-پەن بايلانىس ماسەلەلەرى بويىنشا كەڭەسشىسى ەربولات مۇحامەدجانمەن ونلاين كەزدەسۋلەر وتكىزىلىپ, وقۋشىلارعا مەكتەپ-ينتەرنات تۇلەكتەرىنىڭ ونەگەلى ءومىر جولى دارىپتەلدى.
حاكىم ابايدىڭ 175 جىلدىعىنا وراي 2019-2020 وقۋ جىلىنىڭ باسىندا قولعا الىنعان مەكتەپ-ينتەرنات جانىنان «اباي ءۇنى» جۋرنالىن شىعارۋ ءىسى دە توتەنشە جاعدايعا قاراماستان جالعاسىن تاپتى. ۇلى اقىننىڭ تەڭىزدەي تەرەڭ مۇراسىنان سۋسىنداتار تانىمدىق ماتەريالدار, مۇعالىمدەرگە ارنالعان ادىستەمەلىك كومەك, مەكتەپ-ينتەرناتتىڭ تىنىس-تىرشىلىگىنەن حابار بەرەتىن, بۇگىنگى سارىنعا ساي, زاماناۋي تاسىلدەگى ساپالى سۋرەتتەر مەن اسەرلى ديزاينىمەن ەرەكشەلەنەتىن اتالمىش جۋرنالدىڭ №3 سانى جارىق كورىپ, وقىرمانعا ەلەكتروندى فورماتتا جول تارتتى, كەزەكتى سانى كىتاپحانا قورىنا تاپسىرىلدى. جۋرنالدىڭ كەزەكتى №4 سانى وقۋ جىلىنىڭ سوڭىندا جارىق كورمەك.
سىن ساعاتتا وقۋشىلاردىڭ ۇلتجاندىلىق, پاتريوتتىق سەزىمدەرىنىڭ قالىپتاسۋىنا اسەر ەتەتىن تاربيە جۇمىستارى دا قالىس قالمادى. ۇلى جەڭىستىڭ 75 جىلدىعى, وتان قورعاۋشىلار مەرەكەسى, قازاقستان حالىقتارىنىڭ بىرلىگى كۇنى سىندى مەرەكەلەر مەن ابايتانۋشى مەكەمتاس مىرزاحمەت ۇلىنىڭ 90 جىلدىعى, جازۋشى ءانۋار ءالىمجانوۆتىڭ 90 جىلدىعى, اقىن جۇمەكەن ناجىمەدەنوۆتىڭ 85 جىلدىعى سىندى ايتۋلى داتالاردا ونلاين تاربيە ساعاتتارى وتكىزىلىپ, ەڭ ۇزدىك دەپ تانىلعان بەينەروليكتەر الەۋمەتتىك جەلىلەردە جاريالاندى. سونىمەن قاتار, اتىراۋ تەلەارناسى جاريالاعان #جۇمەكەن85 ولەڭ ەستافەتاسىن نۇر-سۇلتان قالاسىنداعى №82 «دارىن» مامانداندىرىلعان ليتسەيىنەن قابىل الىپ, ن.نۇرماقوۆ اتىنداعى قاراعاندى وبلىستىق مامانداندىرىلعان مەكتەپ-ينتەرناتىنا جولدادىق. مامىر ايىندا ءال-ءفارابيدىڭ 1150 جىلدىعى, ۇلى ابايدىڭ 175 جىلدىعى اياسىندا 17 ايماقتى قامتيتىن # ۇلىلارۇندەستىگى ەستافەتاسى باستالدى.
مەكتەپ-ينتەرناتتا وقۋشىلاردىڭ كىتاپ وقۋعا دەگەن قىزىعۋشىلىعىن ارتتىرۋ ماقساتىندا «100 كىتاپ وقۋ» اكتسياسى جۇرگىزىلەدى. توتەنشە جاعدايعا بايلانىستى بۇل ءۇردىس توقتاپ قالماۋ ءۇشىن google classrووm وقۋ پلاتفورماسىندا مەكتەپتىڭ ارنايى ەلەكتروندى كىتاپحاناسى اشىلىپ, كوركەم ادەبيەتتەرمەن تولىقتىرىلدى. سونىمەن قاتار, بۇل كىتاپحاناعا ءپان وقۋلىقتارىنىڭ ەلەكتروندى نۇسقالارى مەن سىلتەمەلەرى سالىندى. وقۋشىلار ساباقتان تىس ۋاقىتتارىندا كىتاپحاناعا كىرىپ, كىتاپ وقۋمەن اينالىسۋدا.
قازىرگى ۋاقىتتا اتا-انالار مەن ءبىتىرۋشى تۇلەكتەردىڭ ءوتىنىشى بويىنشا مەكتەپ-ينتەرناتتا ۇلتتىق بىرىڭعاي تەستىلەۋگە قوسىمشا دايىندىق جۇرگىزۋ كەستەسى قۇرىلىپ, ءپان مۇعالىمدەرى دايىندىق ساباقتارىن جۇرگىزۋدە. قاشىقتان وقىتۋ رەجيمىندە 11-سىنىپ وقۋشىلارى بعم تاراپىنان ۇسىنىلعان 70 نۇسقا سىناق تەستتەرىن ونلاين تۇردە تاپسىرىپ, بىلىمدەرىن جەتىلدىرىپ وتىردى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ دەكانى, پروفەسسور, الاشتانۋشى عالىم, قايرات ساق, تەلەراديو جانە بايلانىس كافەدراسىنىڭ مەڭگەرۋشىسى, دوتسەنت, بەلگىلى ايتىسكەر اقىن سەرىكزات دۇيسەنعازى باستاعان عالىمدارمەن Zoom پلاتفورماسى ارقىلى 11-سىنىپتارعا كاسىبي باعدار جۇرگىزىلدى.
حاكىم ابايدىڭ 175 جىلدىعى اياسىندا اتقارىلعان ءىس-شارالار از ەمەس, ءالى دە جالعاسىن تابۋدا. وقۋشىلار اقىنعا ارناۋلارىن, اباي شىعارماشىلىعىن تالداپ جازعان ەسسە جۇمىستارىن تولاسسىز جىبەرۋدە. وسىعان بايلانىستى وقۋ جىلىنىڭ سوڭىندا ابايدىڭ 175 جىلدىعى اياسىندا اتقارىلعان ءىس-شارالار ەسەبى رەتىندە «اباي جاققان ءبىر ساۋلە سونبەۋ ءۇشىن...» اتتى جيناق كىتابى جارىق كورمەك. ۇلى اقىن شىعارماشىلىعىن رەسپۋبليكا كولەمىندە كەڭىنەن ناسيحاتتاۋ ماقساتىندا 2020 جىلدىڭ جەلتوقسان ايىندا «اباي الەمى» اتتى قاشىقتان شىعارماشىلىق بايقاۋ (ەسسە جازۋ, اقىندار ءمۇشايراسى) وتكىزۋ جوسپارلانۋدا.
الەم كۇن سايىن جاڭارۋدا. كۇن سايىن ءتۇرلى جاڭالىقتار اشىلۋدا. كۇن سايىن جاڭا جوبالار ىسكە اسىرىلۋدا. سوندىقتان ءار كۇنگە جاڭاشا كوزقاراسپەن قاراۋعا دايىن بولۋ كەرەك. ويتكەنى, بۇل – زامان تالابى. اقپاراتتاندىرىلعان عاسىردا وزىق تەحنولوگيانىڭ ۇزدىك جەمىستەرىن پايدالانۋ – دامىعان ەلدەردىڭ شەشىمى. سوندىقتان ەلىمىز ءۇشىن بۇل دا ءبىر جاڭا بەلەس, جاڭا شىڭ! وسى بەلەستى باعىندىرۋعا بار ارەكەتتى جاساپ جاتقان قر ءبىلىم جانە عىلىم مينيسترلىگىنە, اباي مەكتەبىنىڭ ۇجىمىنا تەك قانا تابىس, ساتتىلىك تىلەيمىن!
روزا سەكسەنوۆا
اباي اتىنداعى رەسپۋبليكالىق مامانداندىرىلعان
دارىندى بالالارعا ارنالعان قازاق ءتىلى مەن ادەبيەتىن
تەرەڭدەتە وقىتاتىن ورتا مەكتەپ-ينتەرنات ديرەكتورى
