Facebook باسشىسىنىڭ بەيسەنبىدە جاساعان مالىمدەمەسى بيزنەس كوشباسشىلارىنىڭ داعدارىسقا بەيىمدەلۋىنىڭ جاقسى مىسالى بولدى. كومپانيا مەنەدجەرلەرى قازىردە جۇمىس ورنىنان باستاپ ستراتەگياسىنا دەيىن ويلاستىرۋدا. جاڭا وزگەرىستەر الدىمەن اقش-تا قولدانىسقا ەنبەك, ازىرگە بۇل جاڭالىق تەك جەتەكشى ينجەنەرلەرگە قاتىستى. توپ جەتەكشىلەرى جاڭادان قوسىلعان قىزمەتكەرلەردىڭ جۇمىسىن باعالاعاننان كەيىن ولارعا ۇيدەن جۇمىس ىستەۋ تاڭداۋى بەرىلەدى. ودان كەيىن الەمنىڭ تۇكپىر-تۇكپىرىندەگى جۇمىسشىلار جاڭا رەجىمگە وتۋگە ءوتىنىش بەرە الادى.
مارك تسۋكەربەرگ 10 جىلدىڭ ىشىندە كومپانياداعى 45 مىڭعا جۋىق جۇمىسشىنىڭ جارتىسى ونلاين رەجىمگە كوشەدى دەگەن ءۇمىتىن جەتكىزدى. ءبىر قىزىعى, ونلاين كەزدەسۋ ءبىر ساعاتتان كەيىن اقاۋلارعا بايلانىستى ءۇزىلىپ كەتتى. كومپانيا بۇل اقاۋ ونلاينعا قوسىلعان كورەرمەندەردە عانا بولعانىن ايتتى. ياعني قىزمەتكەرلەردە ەش ءۇزىلىس بولماعان. تسۋكەربەرگ ۆيدەونىڭ تولىق جازباسى جاريالاناتىنىن جەتكىزدى.
باسقا كومپانيالار پاندەميا كەزىندەگى ونلاين قىزمەتىن سارالاپ جاتسا, تسۋكەربەرگ مۇنى Facebook ءۇشىن ۇزاق مەرزىمدى ستراتەگيا رەتىندە بەلگىلەدى. جالپى, كرەمني القابىنداعى كومپانيالاردىڭ ونلاين رەجىمگە كوشۋ تۋرالى پىكىرى ءار الۋان. Twitter-ءدىڭ نەگىزىن قالاۋشى دجەك دورسي كومپانيا قىزمەتكەرلەرى بۇدان بىلاي ۇزاقتان جۇمىس ىستەي الاتىنىن حابارلادى. بۇل قاتاردا سانفرانتسيسكولىق Coinbase Inc. كريپتوۆاليۋتا ايىرباستاۋمەن اينالىساتىن كومپانيا دا بار. بۇل يلون ماسكتى تىعىرىققا تىرەگەندەي. ويتكەنى ولاردىڭ ءوز زاۋىتتارى بار. وسى ايدا ول Tesla زاۋىتىن قايتا اشۋ ءۇشىن جەرگىلىكتى بيلىكپەن جانجالداسقان بولاتىن.
ونلاين رەجىم تەحنولوگيالىق كومپانيالار ءۇشىن ءتيىمدى ءارى وڭاي. دەگەنمەن بۇل جاڭالىقتىڭ دا ويلاندىراتىن تۇستارى بار. ماسەلەن, يننوۆاتسيانىڭ كىلتى سانالاتىن ادامي قارىم-قاتىناس سياقتى كۇردەلى ماسەلەنى تۋدىرۋى مۇمكىن.
