ايماقتار • 23 مامىر، 2020

مايدان دالاسىنان تابىلعان باكى

829 رەتكورسەتىلدى

ۇلى وتان سوعىسىندا لەنينگراد ماڭىندا ۇرىستارعا قاتىسقان قازاق جاۋىنگەرىنىڭ جوعالعان باكىسى 80 جىلدان كەيىن مايدان دالاسىنان تابىلدى.

ەكىنشى دۇنيەجۇزىلىك سوعىس الاڭدارى وتكەن جەردەن جىل سايىن ىزشىلەر جەرلەنبەي قالعان جاۋىنگەر سۇيەكتەرىن، جەكە بۇيىمدارىن تاۋىپ، ولاردىڭ كىم ەكەنىن، يەسىن ىزدەستىرىپ جاتادى. رەسەي فەدەراتسياسى لەنينگراد وبلىسىنداعى وسىنداي ءىزشىنىڭ ءبىرى نيكولاي لەبەدەۆ سابىندا «جاقسىلىقوۆ ر.» جانە «گ.ر. 1924» دەگەن جازۋى بار توت باسقان باكى تاۋىپ العان ەكەن. مايدان سايتتارىنان قاراپ، 1924 جىلى تۋعان راحىم جاقسىلىقوۆتىڭ باتىس قازاقستان وبلىسىنىڭ تۋماسى ەكەنىن، سوعىستان ەلىنە امان ورالعانىن انىقتاپتى. ءسويتىپ، باتىسقازاقستاندىق ولكەتانۋشى، تاريح ماگيسترى ايبولات قۇرىمباەۆتان كومەك سۇراعان.

- ءوزىن نيكولاي لەبەدوۆ دەپ تانىستىرعان بەيتانىس ءىزشى حابارلاسىپ، ماسەلەنىڭ ءمان-جايىن ايتتى. تاۋىپ العان پىشاعىنىڭ سۋرەتىن جىبەردى. «قازاقستاندا ادامدار وتە باۋىرمال، اسىرەسە تۋىستىق قارىم-قاتىناستى وتە جاقسى ساقتايدى دەپ ەستۋشى ەدىم. مىنا پىشاقتىڭ يەسىنىڭ تۋىستارىن تابۋعا بولماس پا ەكەن؟ بۇل جادىگەردى مايدانگەردىڭ تۋىستارىنا نەمەسە جەرگىلىكتى مۋزەيگە تابىستار ەدىم» دەدى. مەن بۇل حاباردى الەۋمەتتىك جەلىگە، باتىس قازاقستاننىڭ ۇلى وتان سوعىسى جىلدارىنداعى تاريحىنا ارنالعان پاراقشاعا جاريالادىم. ارادا بىرەر ساعات وتپەي جاتىپ مايدانگەردىڭ نەمەرەسى حابارلاستى! – دەيدى ايبولات شامۇرات ۇلى.

باتىس قازاقستان وبلىسىنىڭ چاپاەۆ اۋدانىنان 1942 جىلى تامىز ايىندا مايدانعا اتتانعان راحىم اتامىز سوعىستا ەرەكشە ەرلىگىمەن تالاي كوزگە تۇسكەن ناعىز باتىر ەكەن. كۋرسك، بريانسك، سمولەنسك، لاتۆيا، ليتۆا جەرلەرىن جاۋدان ازات ەتۋگە قاتىسقان جاۋىنگەر ۇرىستاعى ەرلىكتەرى ءۇشىن ءىىى جانە ءىى دارەجەلى داڭق وردەنىمەن، «ەرلىگى ءۇشىن» مەدالىمەن ناگرادتالعان.

- اكەمىز بىرنەشە رەت جارالانسا دا قايتا ساپقا قوسىلىپ، سوعىس بىتكەن سوڭ دا قالپىنا كەلتىرۋ جۇمىستارىنا قاتىسىپ، 1947 جىلدىڭ كۇزىندە ەلگە كەلىپتى. سوعىستا اۋەلى بايلانىسشى بولعان، كەيىن 76 ميلليمەترلىك زەڭبىرەكتىڭ اتقىشى بولعان. مايداننان كەلگەندە كەۋدەسىندە 13 وردەن-مەدال جارقىراپ تۇرىپتى. ەلگە كەلگەن سوڭ ورال وبلىسى چاپاەۆ اۋدانىنداعى «پەرۆوماي» كەڭشارىنىڭ بۇلان بولىمشەسىندە قاراپايىم جۇرگىزۋشى بولدى. اكەمىز 1996 جىلى دۇنيەدەن ءوتتى، ول كىسىدەن ءبىر ۇل، ەكى قىز بارمىز،- دەيدى مايدانگەردىڭ ۇلى يساتاي جاقسىلىقوۆ.

بۇگىندە بۇرىنعى «پەرۆوماي»، قازىرگى قابىرشاقتى اۋىلىنىڭ ءبىر كوشەسى مايدانگەر راحىم جاقسىلىقوۆتىڭ ەسىمىن يەلەنگەن. ءدال وسى كوشەدە باتىردىڭ قىزى ءسابيلا، تۋىستارى تۇرادى. سوناۋ سوعىس جىلدارىنىڭ جاڭعىرىعى، اكەسىنىڭ كوزىندەي بولعان جادىگەردىڭ تابىلعانىنا ءبارى دە قۋانىشتى.

سوڭعى جاڭالىقتار

ۇقساس جاڭالىقتار