ايماقتار • 23 مامىر، 2020

باتىس قازاقستان وبلىسىندا كارانتين مەرزىمى ۇزارتىلدى

234 رەت كورسەتىلدى

باتىس قازاقستان وبلىسى اۋماعىنداعى وبلىستىڭ باس سانيتارلىق دارىگەرى مۇحامعالي ارىسپاەۆتىڭ قاۋلىسىمەن كارانتين رەجىمى 15 ماۋسىمعا دەيىن ۇزارتىلدى. 15 ماۋسىمعا دەيىن اۋرۋشاڭدىق دەڭگەيى 2%-دان تومەن بولعان جاعدايدا كارانتين توقتاتىلۋى مۇمكىن. بۇل تۋرالى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ ايتىپ بەردى.

جالپى ءوڭىر بويىنشا كۇنى بۇگىنگە دەيىن 86 وشاقتان COVID-19 دياگنوزىمەن 370 جاعداي تىركەلگەن ەكەن. سونىڭ ىشىندە 11 ادام – 14 جاسقا دەيىنگى بالالار. 23 مامىر كۇنگى اۋرۋدىڭ ءوسىمى – 2،8%-دى قۇراپ وتىر.

- جالپى انىقتالعان ناۋقاستاردىڭ 251-ءى اۋرۋدى سىرتتان جۇقتىرعان. بۇل بارلىق ناۋقاستىڭ 67،8%-ى. ال 114 جاعدايدا ىندەت اۋىرعان ادامدارمەن قارىم-قاتىناس ارقىلى جۇققان. ولاردىڭ 63-ءى – مەديتسينا سالاسىنىڭ قىزمەتكەرلەرى، بەسەۋى – پوليتسيا قىزمەتكەرى. ءۇي جاعدايىندا وقشاۋلانىپ، وتباسى مۇشەلەرىنە ىندەت جۇقتىرعان 43 وقيعا انىقتالدى. بۇگىنگى تاڭدا وبلىستىق جۇقپالى اۋرۋلار اۋرۋحاناسىندا 144 ناۋقاس ءتيىستى ەمىن الىپ جاتىر. پروۆيزورلىق ستاتسيوناردا – 24، كارانتيندىك ستاتسيوناردا – 217 ادام، ءۇي جاعدايىندا – 1208 ادام وقشاۋلانۋدا، - دەيدى نۇرلىبەك ەرمەك ۇلى وڭىردە قالىپتاسقان ەپيدەميولوگيالىق احۋالعا شولۋ جاساپ.

وسى كەزگە دەيىن نەگىزىنەن شەكارا بەكەتى مەن ورال قالاسىنان عانا شىعىپ كەلگەن اۋرۋ وشاعى ەندى اۋداندارعا دا تارالا باستاعانى الاڭداتىپ وتىر. ماسەلەن قازىر كوروناۆيرۋس جۇقپاسىمەن اقجايىق اۋدانىندا 5 جاعداي تىركەلسە، ءبورلى اۋدانىندا – 7 جاعداي، بايتەرەك اۋدانىندا – 3 جاعداي، سىرىم اۋدانىندا – 4 جاعداي، تاسقالا اۋدانىندا – 10، تەرەكتى اۋدانىندا – 1 جاعداي تىركەلدى.

جالپى وڭىردە COVID-19 دياگنوزىمەن تىركەلگەندەردىڭ 275-ءى – باتىس قازاقستان وبلىسىنىڭ تۇرعىندارى. 84 ادام – قازاقستان رەسپۋبليكاسىنىڭ وزگە ايماقتارىنان بولسا، 7 ادام – شەتەلدىك ەكەن.

كوروناۆيرۋستى جۇقتىرعانداردىڭ 182-ءسى – رەسەي فەدەراتسياسىنان، 68-ءى – كورشىلەس اتىراۋ وبلىسى اۋماعىنان، ال 1 ادام – گەرمانيادان كەلگەن.

ەكى مارتە تەست ساراپتاماسىنان ءوتىپ، جازىلعاندىعى انىقتالعان 220 ادام قازىر اۋرۋحانادان شىعارىلىپ، ءوز ۇيىنە جىبەرىلگەن. بىراق ولار ودان ءارى ءۇي جاعدايىندا 14 كۇندىك وقشاۋلانۋ ءتارتىبىن ساقتاۋى ءتيىس.

وتكەن تاۋلىكتە وڭىردەگى مۇناي ءوندىرۋشى ەڭ الىپ كومپانيا – قاراشىعاناق پەترولەۋم وپەرەيتينگ ب.ۆ. كومپانياسىنىڭ ءبىر قىزمەتكەرى COVID-19 دياگنوزىمەن اۋرۋحاناعا ءتۇستى. تەكسەرىس ناتيجەسى كورسەتكەندەي، ول ۆاحتاعا كەتەر الدىندا ورال قالاسىندا تەڭىز كەنىشىندە ۆاحتالىق جۇمىس ىستەيتىن تۋىسىمەن جولىققان ەكەن. ەندى قپو كومپانياسىنىڭ ونىمەن قارىم-قاتىناستا بولعان ارىپتەستەرى تۇگەل وقشاۋلانىپ، پروۆيزورلىق باقىلاۋعا الىندى.

ءۇي جاعدايىندا وقشاۋلانعان ازاماتتاردىڭ سالدىر-سالاقتىعى مەن جاۋاپسىزدىعى دا ىندەتتىڭ تارالۋىنا اسەر ەتىپ تۇر. نۇرلىبەك مۇستاەۆتىڭ ايتۋىنشا، سىرىم اۋدانىندا «14 كۇن بويى ۇيدە وقشاۋلاندىم» دەگەن تۇرعىننىڭ ورال قالاسىنا كەلىپ-كەتكەندىگى انىقتالىپتى. ياعني ونىڭ قانشا ادامعا ىندەت جۇقتىرىپ ۇلگەرگەنى بەلگىسىز. قازىر سىرىم اۋداندىق سانيتارلىق دارىگەرىنىڭ قاۋلىسىمەن اۋدان اۋماعىندا دا كارانتين جاريالاندى.  

 

باتىس قازاقستان

سوڭعى جاڭالىقتار

COVID-19 ادامنان يتكە جۇققان

كوروناۆيرۋس • كەشە

ۇقساس جاڭالىقتار