قوعام • 23 مامىر، 2020

اسكەريلەر ۇوس قاتىسۋشىسىنىڭ سۇيەكتەرىن تۋىستارىنا تابىستادى

12 رەت كورسەتىلدى

1941-1945 ۇلى وتان سوعىسى جىلدارىندا رەسەي فەدەراتسياسىنىڭ سمولەنسك وبلىسىنىڭ اۋماعىندا قازا تاپقان قازاقستاندىق جاۋىنگەر مەدەت امانجولوۆتىڭ سۇيەكتەرىن تۋىستارىنا بەرۋ ءراسىمى ەلوردالىق اۆياتسيالىق بازادا ءوتتى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.

سولداتتىڭ سۇيەكتەرى ءساۋىر ايىنىڭ باسىندا سمولەنسك وبلىسىنىڭ تەمكين اۋدانىندا ىزدەۋ-بارلاۋ ەكسپەديتسياسىن وتكىزۋ كەزىندە تابىلدى. ساقتالىپ قالعان مويىنتۇمارىنىڭ ارقاسىندا جاۋىنگەردىڭ ەسىمى انىقتالدى.

2020 جىلدىڭ 9 مامىرىندا اسكەري بورتپەن ساربازدىڭ سۇيەكتەرى نۇر-سۇلتان قالاسىنداعى اۆياتسيالىق بازاعا جەتكىزىلدى.

قازاقستان قارۋلى كۇشتەرى اسكەري باسشىلىعىنىڭ، قازاقستانداعى رەسەي ەلشىلىگى قىزمەتكەرلەرىنىڭ جانە اۆيابازانىڭ جەكە قۇرامىنىڭ قاتىسۋىمەن اسكەري راسىمدەردى ساقتاي وتىرىپ، مايىتتەردى ودان ءارى قايتا جەرلەۋ ءۇشىن تۋىستارىنا تاپسىردى. 

«بۇگىن ءبىز ۇرىس دالاسىنان ورالماعان ساربازدارعا تاعزىم ەتىپ، جەرلەستەرىمىز مەدەت امانجولوۆتىڭ سۇيەكتەرىن ەلىنە 78 جىلدان كەيىن تۋعان-تۋىستارىنا تابىستاۋعا جينالدىق. سول ۋاقىتتا قازاقستاندا 12اتقىشتار، 4 كاۆالەريالىق ديۆيزيالار، 7 بريگادا،50 پولك قۇرىلعان بولاتىن. سول سوعىستىڭ ساربازدارىنىڭ ەرلىگىن ءبىزدىڭ بالالارىمىز، نەمەرەلەرىمىز ماڭگى ەستەرىندە ساقتاپ، كەيىنگى ۇرپاققا ولاردى ەستەن شىعارماۋلارىنا ىقپال ەتۋىمىز كەرەك. ەسىمىزدەن شىعارماعان سايىن، ولاردىڭ ەسىمدەرى ءتىرى»، - دەدى قر قك اۋە قورۇانىس كۇشتەرى باس قولباسشىسىنىڭ ورىنباسارى پولكوۆنيك ءالىم ىبىراەۆ.

مەدەت امانجولوۆ قاراعاندى وبلىسى شەت اۋدانى جاستەرەك اۋىلىنىڭ تۋماسى. سوعىس الدىندا ول اسكەرگە شاقىرىلىپ، 1941جىلى 24 جاسىندا مايدانعا بىردەن اتتاندى. ونىڭ سوڭعى قىزمەت ورنى 125-ءشى جەكە اتقىشتار بريگاداسىنىڭ جەكە بارلاۋ روتاسى ەدى.

ساربازدىڭ تۋىستارى ءالى دە سول شەت اۋىلىندا تۇرىپ جاتىر. 1942 جىلى ونىڭ وتباسىنا سمولەنسك قالاسىن قورعاۋ كەزىندە مەدەت امانجولوۆتىڭ قازا بولعانى تۋرالى حابار الادى. كوپ جىلدار بويى ونىڭ ۇرپاقتارى ونىڭ جەرلەنگەن جەرىن ىزدەستىرىپ تابا الماعان، بىراق 78 جىل وتكەننەن كەيىن ولار باتىر بابالارىن ونىڭ تۋعان جەرىندە جەرلەۋلەرىنە مۇمكىندىك تۋدى.

«بىزگە كەنەتتەن قوڭىراۋ شالىپ، ونىڭ تابىلعانىن حابارلادى. ءبىز تاڭقالعانىمىز سونشا، ءتىپتى ەشتەڭە ايتا المادىق. سودان كەيىن بىزگە ەلشىلىك پەن اسكەريلەر كومەك كورسەتتى. ءبىز وتە ريزامىز جانە ۇلكەن راحمەت ايتامىز! قازىر ءبىز ونى تۋعان جەرىنە اپارامىز. ءار ادامنىڭ ءۇمىتى بار. وعان ارقاشان سەنۋ كەرەك جانە ول مىندەتتى تۇردە  ورىندالادى!» - دەپ ويىمەن ءبولىستى تابىلعان ساربازدىڭ نەمەرەسى مۇرات امانجولوۆ. 

 

سوڭعى جاڭالىقتار

ۇقساس جاڭالىقتار