الماتىداعى ناۋرىزباي اۋدانىنداعى اۋىز سۋ ماسەلەسى قاشان شەشىلەدى؟

• 22 مامىر، 2020

الماتىداعى ناۋرىزباي اۋدانىنداعى اۋىز سۋ ماسەلەسى قاشان شەشىلەدى؟

29 رەت كورسەتىلدى

بۇگىن الماتى قالاسىنىڭ اكىمى باقىتجان ساعىنتاەۆ ناۋرىزباي اۋدانىنىڭ تۇرعىندارىن ۇزدىكسىز سۋ جۇيەسىمەن قامتاماسىز ەتۋ ماقساتىندا سالىنىپ جاتقان ينجەنەرلىك جەلىلەردىڭ قۇرىلىسىمەن تانىستى.

ايناش ەسالى

اۋىز سۋمەن قامتاماسىز ەتۋ ناۋرىزباي اۋدانىنداعى ەڭ وتكىر ماسەلەلەردىڭ ءبىرى، وتكەن جىلى جانە بيىلعى جىلدىڭ باسىندا قالا اكىمىمەن بولعان كەزدەسۋلەردە اۋدان تۇرعىندارى بۇل ماسەلەنى بىرنەشە رەت كوتەرگەن بولاتىن. اۋداندا قالالىق سۋمەن قامتۋدىڭ ۇلەسى نەبارى 30 پايىز، قالعاندارى – قاجەتتى ساپالى سۋمەن قامتاماسىز ەتە المايتىن جەكە سكۆاجينالار، «قارعالى» جانە «اقساي» وزەندەرىندەگى اشىق سۋ توعاندارى. باقىتجان ساعىنتاەۆتىڭ تاپسىرماسى بويىنشا وتكەن جىلى وتكىر الەۋمەتتىك مىندەتتەردى شەشۋ ءۇشىن بيۋدجەتتىك شىعىندار قايتا قارالىپ، قۇرىلىس جۇمىستارى باستالعان ەدى.

العاشقى كەزەڭدە ناۋرىزباي اۋدانىنىڭ قۇرامىس، تاۋجولى، اقجار، جايلاۋ، تاستىبۇلاق، شۇعىلا سىندى التى ىقشاماۋداندارىندا، سونىمەن قاتار قاراعايلى وزەنى بويىنداعى تازارتۋ ستانتسياسىندا سۋ قۇبىرلارى مەن كارىز جەلىلەرى سالىنا باستادى. وسىنىڭ ارقاسىندا اۋداننىڭ 48 مىڭنان استام تۇرعىنى ساپالى اۋىز سۋمەن قامتاماسىز ەتىلەتىن بولادى. قۇرىلىس جۇمىستارىن اياقتاۋ كەلەر جىلعا جوسپارلانعان. جالپى اۋداندا بارلىعى 121،5 شاقىرىم سۋ قۇبىرلارى، 85 شاقىرىم سۋ ايىرعىش جەلىلەر تارتىلادى، ناتيجەسىندە بارلىق ىقشاماۋداندار ورتالىق سۋ جۇيەسىمەن قامتاماسىز ەتىلەدى.

بۇگىن قالا اكىمى ب.ساعىنتاەۆ جايلاۋ جانە اقجار ىقشاماۋداندارىنداعى ينجەنەرلىك جەلىلەر سالىنىپ جاتقان قۇرىلىس جۇمىستارمەن تانىستى جانە «قارعالى» سۋ تازارتۋ ستانتسياسىنىڭ قۇرىلىس الاڭىندا بولدى.

باقىتجان ساعىنتاەۆ ساپالى سۋدىڭ قالالىقتاردىڭ وزدەرىن جاقسى سەزىنۋلەرىنە جانە ولاردىڭ دەنساۋلىقتارىنا وڭ اسەر ەتەتىنىن اتاپ ءوتتى. سوندىقتان ناۋرىزباي اۋدانى تۇرعىندارىن تازا اۋىز سۋمەن قامتاماسىز ەتۋ جونىندە پارمەندى شارالار قابىلدانعان ەدى.

«شەتسىز قالا» قاعيداسىنا ساي الماتى قالاسىنىڭ بارلىق تۇرعىندارىنا بىردەي جوعارى دەڭگەيدەگى جاعدايلاردى جاسايتىن بولامىز»، - دەپ اتاپ ءوتتى ب. ساعىنتاەۆ جانە جۇمىس ساپاسىن قاتاڭ باقىلاۋعا الۋدى تاپسىردى. قالا اكىمى سۋ جەلىلەرى تارتىلعان كوشەلەر تۇرعىندارىنىڭ ءوتىنىشى بويىنشا جۇمىستىڭ جالپى كولەمىن اياقتاۋدى كۇتپەي جولدارعا بىردەن اسفالت توسەۋدى تاپسىردى.

وتكەن جىلدىڭ قىركۇيەك ايىندا جايلاۋ ىقشاماۋدانىندا ينجەنەرلىك جەلىلەر قۇرىلىسى باستالعان بولاتىن. ونىڭ ۇزىندىعى 7،8 شاقىرىمدى قۇرايدى. ناۋرىزباي اۋدانىنىڭ اكىمى سانجار توعاي نىسان قۇرىلىسىنىڭ كەستەگە ساي ءجۇرىپ جاتقانىن، بۇگىنگى كۇنگە دەيىن جۇمىستىڭ 50 پايىزدان استامىنىڭ ورىندالعانىن، 4،2 شاقىرىم قۇرىلىستىڭ سالىنعانىن باياندادى. قۇرىلىس جۇمىستارىن قاراشا ايىندا اياقتاۋ جوسپارلانعان. ناتيجەسىندە ىقشاماۋداننىڭ 2 مىڭنان استام تۇرعىنى تازا اۋىز سۋمەن قامتاماسىز ەتىلەدى.

اقجار ىقشاماۋدانىندا دا وسىعان ۇقساس جۇمىستار جۇرۋدە، مۇندا 29،2 شاقىرىم سۋ جانە 15،7 شاقىرىم كارىز جەلىلەرى تارتىلادى. جۇمىس اياقتالعان سوڭ 18 مىڭنان استام ادام سۋ جانە كارىز قۇبىرلارىنا قوسىلاتىن بولادى.

ۇستىمىزدەگى جىلدىڭ مامىر ايىندا «قارعالى» سۋ تازارتۋ ستانتسياسىنىڭ قۇرىلىسى باستالعان ەدى. جوبادا سۋ توعانى نىسانىنىڭ قۇرىلىسى قاراستىرىلعان، ناتيجەسىندە قۋاتتىلىق 10 ەسە ارتادى، 1440 تەكشە مەتر سۋ تاۋلىگىنە 15 مىڭعا دەيىن جەتەدى. جوبا جۇزەگە اسقاندا 4 ىقشاماۋداندى، 77 كوشەنى جانە 3015 تۇرعىن ءۇيدى سۋمەن قامتاماسىز ەتۋگە مۇمكىندىك تۋادى.

جۇمىس ساپارى بارىسىندا قالا اكىمى قارعالى وزەنىنىڭ جاعالاۋىن نىعايتۋ جۇمىستارىنىڭ بارىسىمەن تانىستى. تاجيەۆ، يگىلىك كوشەلەرى مەن پيششەۆيك دەمالىس ءۇيىنىڭ اينالاسىنداعى جار قاباتتاردى گابيوندى كونسترۋكتسيالارمەن مىقتىلاۋ جۇمىستارىن اياقتاۋ قىركۇيەك ايىنا جوسپارلانعان.

سونىمەن قاتار، قارعالى وزەنىنىڭ ارناسىن مىقتىلاۋ جانە اقجار ىقشاماۋدانىنداعى تاستىبۇلاق وزەنى ارقىلى وتەتىن كوپىر وتكەلىن جوندەۋ جوسپارلانعان.