شىمكەنتتە 2 700-دەن استام دارىگەر الدىڭعى شەپتە ىندەتپەن كۇرەسۋدە

ايماقتار • 22 مامىر، 2020

شىمكەنتتە 2 700-دەن استام دارىگەر الدىڭعى شەپتە ىندەتپەن كۇرەسۋدە

33 رەت كورسەتىلدى

شىمكەنت قالاسىندا كوروناۆيرۋس ىندەتىمەن كۇرەستە 26 ەمدەۋ مەكەمەسىندە جالپى 2 764 مەديتسينا قىزمەتكەرى جۇمىس ىستەيدى.

بىلىكتى مامانداردان جاساقتالعان دارىگەرلەر جۇقپالى اۋرۋلار اۋرۋحاناسى، كارانتيندىك ستاتسيونارلار، جەدەل جاردەم ستانتسياسى، ەمحانالار مەن زەرتحانالىق ورتالىقتاردا تىنىمسىز ەڭبەك ەتۋدە. مەديتسينا ماماندارى العاشقى كۇننەن باستاپ ناۋقاستارعا قولدان كەلگەن كومەگىن جاساۋدا. ءتىپتى ناۋرىزدان بەرى ۇيلەرىنە بارماعان دارىگەرلەر بار. اق حالاتتى ابزال جاندار كۇندەلىكتى دەرتپەن بەتپە-بەت كەلىپ، ەپيدەميالوگيالىق جاعدايدىڭ ورشۋىنە قاراماستان وزدەرىنە جۇكتەلگەن مىندەتتى ابىرويمەن اتقارىپ كەلەدى.

مەملەكەت باسشىسى قاسىم-جومارت توقاەۆ كوروناۆيرۋسپەن كۇرەسىپ جاتقان مەديتسينا قىزمەتكەرلەرىنە كومەك كورسەتۋ تۋرالى تاپسىرماسىنا سايكەس شىمكەنتتە توتەنشە جاعداي رەجيمىندە جوعارى جۇكتەمەمەن ەڭبەك ەتكەن 2126 مەديتسينا ماماندارىنا ناۋرىز-ءساۋىر ايلارىندا ەسەلەپ اتقارعان ەڭبەگى ەلەنىپ، رەسپۋبليكالىق بيۋدجەتتەن ۇستەماقى رەتىندە بولىنگەن 799، 22 ملن تەڭگە بەرىلدى.

مەديتسينا قىزمەتكەرلەرى جۇمىسىنىڭ قاۋىپتىلىگىنە قاراي 3 توپقا بولىنگەن. ءبىرىنشى ساناتتاعى وتە قاۋىپتى جاعدايدا جۇمىس ىستەگەن 24 قىزمەتكەرگە 8،749 ملن، ەكىنشى ساناتتاعى قالىپتى جاعدايدا جۇمىس ىستەيتىن دارىگەرلەر مەن فەلدشەلەرگە جانە وزگە دە 977 مەديتسينا ماماندارىنا 294،848 ملن تەڭگە ءبولىندى.

ال ءۇشىنشى دەڭگەيدەگى قاۋىپسىزدىك جاعدايىندا جۇمىس ىستەيتىن 1126 مەديتسينا مامانىنا 91،166 ملن تەڭگە قاراجات قارالعان.

ۇستەماقى العاندار - رەانيماتسيا بولىمدەرىمەن قوسا العاندا، جۇقپالى اۋرۋلار ستاتسيونارلارىنىڭ دارىگەرلەرى، كارانتيندىك ايماقتاعى ورتا جانە كىشى مەديتسينا قىزمەتكەرلەرى. سونداي-اق پروۆيزورلىق ستاتسيونار مەن جەدەل جاردەم قىزمەتىنىڭ دارىگەرلەرى مەن جەدەل جاردەم كولىكتەرىنىڭ جۇرگىزۋشىلەرى.

ناۋرىز ايىندا ەلىمىزدە جاريالانعان توتەنشە جاعداي رەجيمىندە ۋاقىتپەن ساناسپاي ەڭبەك ەتىپ جۇرگەن مەديتسينا ماماندارىنا 394،77 ملن تەڭگە بەرىلدى.

قاراپايىم حالىقتىڭ دەنساۋلىعى ءۇشىن ءوز باسىن بايگەگە تىككەن اق حالاتتى ابزال جاندارعا ءساۋىر ايىندا 514،969 ملن تەڭگە بەرۋ جوسپارلانعان.

شىمكەنت قالاسىنداعى مەملەكەتتىك مەديتسينالىق ۇيىمداردا جالپى 3226 دارىگەر مەن 8493 ورتا بۋىندى مەديتسينا ماماندارى كۇن-ءتۇن دەمەي جۇمىس ىستەپ جاتىر.

ودان بولەك ۇستەماقى الماعان 4 مەديتسينالىق مەكەمەدە ەڭبەك ەتەتىن 500-دەن استام قىزمەتكەرگە سىياقى بەرىلدى. دەمەۋشىلەر ەسەبىنەن 25 ميلليون تەڭگە قالالىق جۇقپالى اۋرۋلار اۋرۋحاناسى مەن № 2 قالالىق اۋرۋحانا قىزمەتكەرلەرىنە بەرىلدى. سىياقىدان «مەيىرىم» جانە «اتامەكەن» وڭالتۋ ورتالىقتارىنداعى كارانتين رەجيمىندە تىنىمسىز ەڭبەكتەنىپ جاتقان مەديتسينا ماماندارى دا شەت قالمادى.

جۇمىسىنا ادال دارىگەرلەر قاۋىمى تاۋلىك بويى جۇمىس ىستەيدى. قازىردە قالاداعى مەديتسينالىق ۇيىمدارداعى 300-دەن اسا قىزمەتكەرلەر قوناقۇيگە جايعاستىرىلعان. بۇل - قاۋىپتى وشاقتا جۇمىس ىستەيتىن اق حالاتتى ابزال جانداردىڭ وتباسىن ساقتاۋ ماقساتىندا جانە قاۋىپسىزدىك جۇمىستارىن كۇشەيتۋ ءۇشىن قولعا الىنعان قادامدار.

شىمكەنت

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز