قازاقستان • 22 مامىر، 2020

«قالباتاۋ-مايقاپشاعاي» اۆتوموبيل جولى بيىل اشىلادى

53 رەتكورسەتىلدى

شىعىس قازاقستان وبلىسىندا ۇزىندىعى 415 شاقىرىمدى قۇرايتىن رەسپۋبليكالىق ماڭىزى بار «قالباتاۋ – مايقاپشاعاي» جولىن قايتا جاڭارتۋ جۇمىستارى جالعاسۋدا. جاڭا جول ساپارعا جۇمسالاتىن ۋاقىتتى ەكى ەسەگە قىسقارتۋعا، سونداي-اق ونىڭ وتكىزۋ قابىلەتى مەن ءوڭىردىڭ ترانزيتتىك الەۋەتىن ارتتىرۋعا مۇمكىندىك بەرەدى. بۇل تۋرالى يدم ءباسپاسوز قىزمەتى حابارلادى.

بۇگىنگى تاڭدا «China Xinxing Group» جول كومپانياسى مەن «سپ «كازگەرستروي» جشس 4500 مىڭنان استام تەكشە  مەتر جەر قازۋ جۇمىستارىن ورىندادى. سونىمەن قاتار، مۇندا 85 سۋ وتكىزۋ قۇبىرى، 46 مالوتكەلى سالىندى. مۇنىمەن قوسا، ماماندار 73،8 شاقىرىمدا قۇمدى-قيىرشىق تاستى قوسپادان جاسالعان جولدىڭ توسەمە قاباتىن، 48،7 شاقىرىمدا جول نەگىزىنىڭ تومەنگى قاباتىن، 27،8 شاقىرىمدا جوعارى كەۋەكتى ءىرى تۇيىرشىكتى اسفالت-بەتوننان جاسالعان جول نەگىزىنىڭ جوعارعى قاباتى مەن 19،5 شاقىرىمدا تىعىز ءىرى تۇيىرشىكتى اسفالت-بەتوننان جاسالعان جول جابىندىسىنىڭ تومەنگى قاباتىن جايلاستىردى. بارلىق جۇمىستاردىڭ ساپاسىن «يۋۆپەك-استانا» جشس باقىلايدى.

قايتا جاڭارتۋ جۇمىستارىنان وتكەن سوڭ، نىسان 2 جولاعى بار ءىى تەحنيكالىق ساناتتاعى جولعا سايكەستەندىرىلەدى. سونداي-اق، جوباعا سايكەس مۇندا 38 كوپىر مەن جول وتكەلدەرى، 345 سۋ وتكىزۋ قۇبىرى مەن مال وتكەلدەر، سونداي-اق 14 دەمالىس الاڭىنىڭ قۇرىلىسى قاراستىرىلعان. قايتا جاڭارتۋ جۇمىستارىنا 684 تەحنيكا مەن 1357 ادام جۇمىلدىرىلدى. جوبا 2022 جىلى تولىقتاي اياقتالادى دەپ كۇتىلۋدە.

ايتا كەتۋ كەرەك، شىعىس قازاقستان وبلىسى ارقىلى رەسپۋبليكالىق ماڭىزى بار جولداردىڭ 2807 شاقىرىمى وتەدى. بۇل – ەل وڭىرلەرى اراسىنداعى ەڭ ۇلكەن كورسەتكىش. بۇگىنگى تاڭدا جولداردىڭ 82،2% جاقسى جانە قاناعاتتاندىرارلىق جاعدايدا.

ەسكە سالايىق، اۆتوموبيل جولدارى سالاسىن دامىتۋ اياسىندا قازاقستاندا 2020 جىلى رەسپۋبليكالىق ماڭىزى بار جولداردىڭ 4000-نان استام شاقىرىمى قۇرىلىس جانە قايتا جاڭارتۋ جۇمىستارىمەن قامتىلسا، كولىك قوزعالىسى جولداردىڭ 2600 شاقىرىمىندا اشىلماق. 

سوڭعى جاڭالىقتار

ۇقساس جاڭالىقتار