ايماقتار • 22 مامىر، 2020

اقمولادا جول ساپاسى جاقسارىپ كەلەدى

10 رەت كورسەتىلدى

وبلىس اۋماعىندا 7 مىڭ شاقىرىم جول بار. ەلدى-مەكەن ىشىلىك جولداردىڭ ۇزىندىعى 5 مىڭ شاقىرىم. وبلىستىق ماڭىزى بار 2661 شاقىرىم جولدىڭ 78 پروتسەنتى تالاپقا ساي.

بۇگىنگى تاڭدا جول قۇرىلىسى قارقىن الۋدا. ايتسە دە،  ساپاسىنا باسا نازار اۋدارۋ قاجەت. جىل سايىن جۇزدەگەن شاقىرىم جول توسەلەدى. الايدا، جولداعى شۇڭقىرلاردىڭ جامالىپ بىتپەيتىندىگى ايتا-ايتا جاۋىر بولعان ماسەلە. بيىل وبلىس اۋماعىنداعى جول جوندەۋ جۇمىستارىنىڭ كولەمى ەكى ەسە كوبەيدى. وبلىس اكىمدىگى جۇمىس ساپاسىز بولماس ءۇشىن جول جابىنىن تەكسەرۋدى «جول اكتيۆتەرىنىڭ ۇلتتىق ساپا ورتالىعىنا» تاپسىرعان.  

– ءبىز جول جابىنىنان سىناما الامىز. بۇل – كيورن دەپ اتالادى. مىسالى، جوبالىق قۇجاتتاما بويىنشا مىنا جەردەگى اسفالت قاباتى 5 سم-ءدى قۇراۋى ءتيىس. بىردەن ولشەم جاسايمىز. ال، جول توسەمىنىڭ تىعىزدىعى، سۋ سىڭىمدىلىگى، قولدانىلعان قيىرشىق تاس فراكتسياسى، بيتۋمنىڭ ساپاسى ءتارىزدى كورسەتكىشتەر زەرتحانادا سىنالادى، – دەيدى «جول اكتيۆتەرىنىڭ ۇلتتىق ساپا ورتالىعى»  وبلىستىق فيليالىنىڭ ءبىرىنشى ساناتتى لابورانتى جانات سالىقوۆ.

جولدىڭ ساپاسى ءبىرىنشى كەزەكتە ونىڭ جوبالىق-سمەتالىق قۇجاتتا كورسەتىلگەن تالاپتارعا ساي بولۋىنا بايلانىستى.

اسفالت ءبىز بىلەتىن جولدىڭ بەتى عانا. جول سىنامالارى قۇرىلىس بارىسىنىڭ بارلىق كەزەڭدەرىندە الىنادى. جول توسەمىنە جاراتىلعان تاس قيىرشىق بەلىلەنگەن قالىڭدىقتا، ءتيىستى تەرەڭدىكتە، ءتيىستى فراكتسيادا قولدانىلۋى ءتيىس. جول قۇرىلىسىن جۇرگىزگەن مەردىگەر كەلىسىمشارتقا ساي بەس جىلعا دەيىن جولدىڭ ساپاسىنا كەپىلدىك بەرەدى. بۇدان بولەك، جول ساپاسىنا اۆتورلىق جانە تەحنيكالىق باقىلاۋ جۇرگىزىلەدى.

– جىل سايىن اۆتوموبيل جولدارىنىڭ قۇرىلىسى مەن قولدانىستاعى جولداردى جوندەۋگە «قازاۆتوجول»، وبلىس جانە اۋدان اكىمدىكتەرى ات سالىسادى. بيىل وسى ماقساتقا 39 ملرد تەڭگە ءبولىندى. بۇل قارجى وتكەن جىلمەن سالىستىرعاندا ەكى ەسە كوپ. 700 شاقىرىم جول جوندەلەدى. بيىل «بالكاشينو-شاڭتوبە»، «اقسۋ-بەستوبە-يزوبيلنوە»، سولتۇستىك قازاقستان وبلىسى ارقىلى وتەتىن «ەلەنوۆكا-چيستوپولە-ەسىل» ءتارىزدى وبلىستىق ماڭىزداعى باعىتتاردا جول جوندەلۋدە. رەسپۋبليكالىق ماڭىزى بار جولداردا دا قۇرىلىس جۇمىستارى جالعاسۋدا. ودان بولەك، قازاقستان مەن رەسەيدىڭ شەكارالاس ايماقتارى ىنتىماقتاستىعى فورۋمىنا وراي كوكشەتاۋ قالاسىندا جول قۇرىلىسى قارقىندى جۇرگىزىلۋدە، – دەيدى وبلىستىق جولاۋشىلار كولىگى جانە اۆتوموبيل جولدارى باسقارماسى جەتەكشىسىنىڭ ورىنباسارى ۆلاديمير كۋلاكوۆ.

كوپتىڭ كوڭىلىن كۇپتى قىلعان جولدار نەگىزىنەن جەرگىلىكتى ماڭىزعا يە. قازىرگى تاڭدا، وسىنداي اۋىل اراسىن جالعاعان 2187 شاقىرىم جول بار. ونىڭ تەڭ جارتىسى تالاپقا ساي ەمەس.

سوڭعى جاڭالىقتار

ورازانىڭ ءار ءساتى ساۋاپ

رۋحانيات • كەشە

ءسوزدىڭ جەتى بوياۋى

تانىم • كەشە

ۇقساس جاڭالىقتار