«بۇۇ مودەلى - جاڭا جىبەك جولى» – بۇل ءتۇرلى ەلدەردىڭ ديپلوماتتارى رەتىندە بۇۇ جۇمىسىن بەينەلەيتىن ەتەتىن ستۋدەنتتەر مەن جوعارى سىنىپ وقۋشىلارىنا ارنالعان اۋقىمدى حالىقارالىق جوبا. بۇۇ-نىڭ تۇراقتى دامۋ جونىندەگى «اكادەميالىق ىقپال» باعدارلاماسىن ءتورتىنشى كەزەڭ قاتارىنان باسقارىپ كەلە جاتقان ءال-فارابي اتىنداعى قازۇۋ اتالمىش شارانى العاش رەت ونلاين فورماتتا وتكىزۋدە.
جوبا قازىرگى زاماننىڭ جاھاندىق ماسەلەلەرىنە جاستاردىڭ نازارىن اۋدارۋعا, الەم تۋرالى ءبىرتۇتاس كوزقاراس قالىپتاستىرۋعا, زەرتتەۋ داعدىلارىن دامىتۋعا, مادەنيەتارالىق كوممۋنيكاتسيا مەن ديالوگ قۇرۋ ارقىلى شيەلەنىستەردى ەڭسەرۋ قابىلەتتەرىن دامىتۋعا باعىتتالعان.
بۇكىلالەمدىك عالامدىق كونفەرەنتسياعا ازيا, افريكا, امەريكا جانە ەۋروپادان 200-دەن استام ستۋدەنت پەن مەكتەپ وقۋشىلارى, سونداي-اق حالىقارالىق ساراپشىلار, بۇۇ جانە ديپلوماتيالىق ورتا وكىلدەرى قاتىستى. ەكى كۇن بويى جاس سپيكەرلەر بىتىمگەرشىلىك پەن ادامزاتتىڭ تۇراقتى دامۋىنىڭ 17 ماقساتىن جۇزەگە اسىرۋ, سونداي-اق Covid-19 تارالۋىن بولدىرماۋ, جاھاندىق ەكونوميكانى قالپىنا كەلتىرۋ, ساپالى ونلاين ءبىلىم الۋعا قول جەتىمدىلىكتى قامتاماسىز ەتۋ, پاندەميا كەزىندە الەۋمەتتىك قولداۋ جانە تاعى باسقا وزەكتى ماسەلەلەردى تالقىلادى.
«بيىل اكادەميالىق قوعامداستىقتىڭ زياتكەرلىك الەۋەتىن زاماناۋي الەمنىڭ ماسەلەلەرىن شەشۋگە جۇمىلدىرۋعا ارنالعان بۇۇ-نىڭ «اكادەميالىق ىقپال» باعدارلاماسىنىڭ باستاۋ العانىنا 10 جىل تولدى. بۇۇ كۇن ءتارتىبى مەن تۇراقتى دامۋ ماقساتتارىن جۇزەگە اسىرۋدا جاستارعا ماڭىزدى ءرول بەرىلۋدە, بۇل جاھاندىق پاندەميا كەزىندە ەرەكشە وزەكتى», – دەيدى كونفەرەنتسيانى اشقان ءال-فارابي اتىنداعى قازۇۋ-دىڭ ءبىرىنشى پرورەكتورى پروفەسسور م.بۇركىتباەۆ.
قر پارلامەنتى ءماجىلىسىنىڭ دەپۋتاتى سەرىك سەيدۋمانوۆ بۇۇ مودەلىنىڭ زاماناۋي جاس كوشباسشىلارى ادامزات وركەنيەتىن ساقتاۋدىڭ جوعارى يدەياسىمەن بىرىگىپ ءوز ەلدەرىنىڭ, جالپى بۇكىل الەمنىڭ تۇراقتى دامۋىنا ىقپال ەتەتىندىگىن اتاپ ءوتتى. سونىمەن قاتار ول كونفەرەنتسيا قاتىسۋشىلارىن ايتۋلى كۇنمەن – بۇۇ-نىڭ 75 جىلدىعىمەن قۇتتىقتاپ, ولارعا جەمىستى جۇمىس تىلەدى.
سونىمەن قاتار, بۇۇ مودەلىنىڭ قاتىسۋشىلارىن ونلاين رەجىمدە قوشامەتتەپ ءسوز سويلەگەندەردىڭ قاتارىندا: بىرىككەن ۇلتتار ۇيىمىنىڭ عالامدىق كوممۋنيكاتسيالار دەپارتامەنتىنىڭ وكىلى ۆلاستيميل سامەك, يۋنەسكو-نىڭ كلاستەرلىك كەڭسەسىنىڭ ديرەكتورى كريستا پيككات, دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى وكىلى كەرولاين كلارينۆال, قر ءسىم الماتىداعى وكىلدىگىنىڭ باسشىسى ەرلان ىسقاقوۆ, سونداي-اق الماتىداعى قحر باس كونسۋلى – گەن ليپين, اقش-تىڭ باس كونسۋلى – ەريك مەيەر, رەسەي فەدەراتسياسىنىڭ باس كونسۋلى – ەۆگەني بوبروۆ بولدى.
الماتى
