ەفيرگە پرەزيدەنت جانىنداعى مەملەكەتتىك باسقارۋ اكادەمياسىنىڭ ماڭعىستاۋ وبلىسى بويىنشا فيليال ديرەكتورى ايگۇل دەمەۋوۆا قاتىستى. ايگۇل امانگەلدىقىزى وسى جىلى مەملەكەتتىك باسقارۋ اكادەمياسىنا وقۋعا ءتۇسۋدىڭ نەگىزگى تالاپتارىن ايتىپ, كوپشىلىكتىڭ سۇراقتارىنا تىكەلەي ەفيردە جاۋاپ بەردى.
وندا مەملەكەتتىك باسقارۋ اكادەمياسىنىڭ ءبىلىم بەرۋ باعدارلامالارى تانىستىرىلدى. سونداي-اق, سۇحبات بارىسىندا ايگۇل دەمەۋوۆا پرەزيدەنت جانىنداعى مەملەكەتتىك باسقارۋ اكادەمياسىنا وقۋعا مەملەكەتتىك قىزمەتشىلەر عانا ەمەس, قالاۋى بويىنشا ازاماتتاردا تۇسە الاتىنىن ول ءۇشىن ارنايى تالاپتاردىڭ بار ەكەنىن جەتكىزدى. سونداي-اق, مەملەكەتتىك گرانتقا يە بولعان وقۋعا تۇسۋشىلەر ءۇشىن شەتەلدىك تاعىلىمدامادان ءوتۋ مۇمكىندىكتەرى قاراستىرىلعان.
ايتا كەتەيىك, 2018 جىلى قاڭتار ايىندا جۇمىسىن باستاعان فيليال مەملەكەتتىك قىزمەتشىلەردىڭ بىلىكتىلىگىن ارتتىرۋ, كاسىبيلەندىرۋ ماقساتىندا وڭ وزگەرىستەرگە قول جەتكىزىپ وتىر. 2019 جىل بويىنشا مەملەكەتتىك اكادەمياعا 7 ماڭعىستاۋلىق مەملەكەتتىك قىزمەتشى وقۋعا تۇسكەن. ونىڭ بىرەۋى دوكتورانتۋرا, قالعانى ماگيستراتۋرا باعدارلاماسى بويىنشا ءبىلىم الىپ وتىر. ال وبلىس بويىنشا بيىل وقۋعا ءتۇسۋ ءۇشىن وتىنىشتەر كەلىپ تۇسكەن. ناتيجەسى اعىمداعى جىلدىڭ تامىز ايىندا بەلگىلى بولادى.
ماڭعىستاۋ وبلىسى
