ءدال قازىرگى ۋاقىتتا ارناۋلى كىتاپحانا وقىرماندارعا ونلاين قىزمەت كورسەتىپ, كۇندەلىكتى جۇمىس ىستەۋدە. اتالعان كىتاپحانادا زاعيپ جاندار مەن كوزى ناشار كورەتىن ازاماتتاردىڭ ىڭعايىنا قاراي, كىتاپ وقۋعا بارلىق جاعداي قاراستىرىلعان. ەڭ الدىمەن, كىتاپحانانىڭ «تيفلولوگيا» ءبولىمى زاعيپ وقىرمانداردىڭ سۇرانىسى بويىنشا كىتاپتاردى بەدەرلى-نۇكتە ارىپتەرىمەن باسىپ شىعارۋدى جولعا قويعانىن ايتۋعا بولادى. وسىنىڭ ناتيجەسىندە, جەرگىلىكتى جازۋشىلاردىڭ دا كىتاپتارى باسىپ شىعارىلىپ, وقىرماندارعا ۇسىنىلدى. «ساۋساق ۇشىنداعى الەم» تيفلوقۇرالدار جانە ء«بىر ەل – ءبىر كىتاپ», ء«بىزدىڭ ولكەنىڭ ماقتانىشتارى» اتتى كىتاپ كورمەسىن ونلاين تۇرىندە بەينەجازبا كورسەتىلدى. سونىمەن قاتار زاعيپ وقىرماندارعا ابونومەنتتىك قىزمەت كورسەتۋ ءبولىمى Facebook, Instagram, YouTube ارناسىندا قازاقستاننىڭ ەڭبەك سىڭىرگەن قايراتكەرى, پرەزيدەنتتىك سىيلىقتىڭ لاۋرەاتى, ساتيريك كوپەن امىربەكتىڭ 70 جاسقا تولۋىنا وراي «كۇلكى جاننىڭ شيپاسى» اتتى ءازىل اڭگىمە وتكىزدى. شارادا مۇمكىندىگى شەكتەۋلى I توپ كوز مۇگەدەگى نىشانكۇل ابديشەۆاعا كوپەن امىربەكتىڭ «كوپ پارتيا» اڭگىمەسى جانە II توپ كوز مۇگەدەگى سارسەن ارىستانبەككە, III توپ كوز مۇگەدەگى امان بالجانعا بەلگىلى ساتيريكتىڭ باسقا دا ءازىل اڭگىمەلەرى بەينەكامەرا ارقىلى وقىلدى.
ابايدىڭ 175 جىلدىعىنا وراي جىلدىڭ باسىنان وتكىزىلىپ كەلە جاتقان ءىس-شارالار ەندى قاشىقتىق رەجىمىندە جالعاسىن تابۋدا. الدىمەن وقىرماندارعا ونلاين تۇرىندە ابايدىڭ كىتاپ كورمەسى ناسيحاتتالدى. كىتاپ كورمەسىندەگى دىبىستاندىرىلعان قارا ءسوزى مەن شىعارمالارى جانە بەدەرلى-نۇكتەلى قارپىندەگى شىعارمالارى زاعيپ وقىرماندارعا ۇسىنىلدى. وبلىس كولەمىندەگى كىتاپحانالاردا اشىلعان بولىمدەر مەن وبلىستىق ارناۋلى كىتاپحانا قورى لۋي ءبرايلدىڭ جۇيەسى بويىنشا بەدەرلى-نۇكتە ارىپتەرىمەن باسىپ شىعارىلعان ج.جاباەۆتىڭ «حالىق مەنىڭ شىن اتىم», ش.مۇرتازانىڭ «مىڭ بۇلاق», ب.مومىش ۇلىنىڭ «ۇشقان ۇيا», م.رايىمبەك ۇلىنىڭ «كەنتاۆر», س.تومانوۆتىڭ «تىعىرىق», ا.كوپجاساروۆانىڭ «اياۋلى قازاق قىزدارى», ش.ماماسەرىكوۆانىڭ «ولەڭىمنىڭ ءار جولى ءومىربايان», ءۇ.بيتەنوۆانىڭ ء«ۇشارالدىڭ ءۇمىتى», «مەن سۇيگەن جار», ك.ءساتتىباي ۇلىنىڭ «سايقىمازاق دۇنيە», ب.بەكجاننىڭ «قۇس قاناتىنداعى ساعىنىش» اتتى كىتاپتارىمەن تولىقتى.
سونداي-اق دۇنيەجۇزىلىك بالالار كىتابى كۇنىنە وراي «ونلاين مارافون» جوباسى اياسىندا ونلاين ۆيكتورينالىق سۇراقتار دايىندالىپ, الەۋمەتتىك جەلىلەر ارقىلى ۇسىنىلدى. ۆيكتورينالىق سۇراقتار كىتاپ الەمىن, كيەلى تاراز ءوڭىرىنىڭ تاريحىن قامتىدى. سونداي-اق قازاقستاننىڭ ەڭبەك سىڭىرگەن سپورت شەبەرى, سيدنەيدە وتكەن XXVII وليمپيادا چەمپيونى بەكزات ساتتارحانوۆتىڭ ءومىرى مەن جەتكەن جەتىستىكتەرى تۋرالى اقپاراتتى داۋىستاپ وقىپ, بەينەبايان كورسەتىلدى. ال دۇنيەجۇزىلىك كىتاپ كۇنىنە وراي «كىتاپ سارقىلماس رۋحاني قازىنا» تاقىرىبىندا ونلاين وقۋ وتكىزىلدى.
نۇرجاحان كەرىمباەۆا,
جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنىڭ زاعيپ وقىرماندارعا ابونەمەنتتىك قىزمەت كورسەتۋ ءبولىمىنىڭ سەكتور جەتەكشىسى
