باقىتجان ساعىنتاەۆ قاعازدان گيگيەنالىق ءونىم وندىرەتىن «Papirone» جاڭا زاۋىتىن, «Free style» جيھاز وندىرەتىن تسەحتى, سونداي-اق, «بيزنەستىڭ جول كارتاسى» باعدارلاماسى اياسىندا ىسكە اسىرىلعان, نەمىس تەحنولوگياسىمەن برۋسچاتكا شىعاراتىن جانە اسفالت وندىرەتىن «الماتى جول-قۇرىلىس كومپانياسى» جشس زاۋىتىنا باردى.
ماسەلەن, وسى جىلدىڭ باسىندا پايدالانۋعا بەرىلگەن «Papirone» جشس زاماناۋي زاۋىتى قاعازدان 1 800 توننا گيگيەنالىق ءونىم وندىرەتىن بولادى. قولدانىلاتىن تەحنولوگيالار مەن ءوندىرىستى اۆتوماتتاندىرۋدىڭ ارقاسىندا ءونىم الەمدىك ساپا ستاندارتتارىنا سايكەس كەلەدى. جوبا اياسىندا 113 جۇمىس ورنى اشىلدى.
باقىتجان ساعىنتاەۆ «Freestyle» جشس جيھاز ءوندىرۋ زاۋىتىندا «قاراپايىم زاتتار ەكونوميكاسى» سالالارىنىڭ دامۋىمەن تانىستى. كاسىپورىندا 150 ادام جۇمىس ىستەيدى, زاۋىت جىل سايىن 537 ملن. تەڭگەنىڭ ءونىمىن شىعارادى. وندىرىستە ەكولوگيالىق تازا جانە قاۋىپسىز ماتەريالدار قولدانىلادى. بۇدان باسقا, وسى كاسىپورىننىڭ اينالاسىندا جيھاز كلاستەرى قۇرىلدى.
جۇمىس ساپارى بارىسىنداعى كەلەسى نىسان – «الماتى جول-قۇرىلىس كومپانياسى» جشس نەمىس تەحنولوگياسى بويىنشا اسفالت جانە برۋسچاتكا وندىرەتىن زاۋىت بولدى. وتكەن جىلى «بيزنەستىڭ جول كارتاسى» قاتىسۋشىلارىنا كورسەتىلەتىن قولداۋ شارالارى اياسىندا اسفالتبەتوندى قوسپالار, جول جانە قابىرعا بلوكتارى ءوندىرىسى ىسكە قوسىلعان بولاتىن. اتالمىش كاسىپورىن جوعارى ساپالى باسەكەگە قابىلەتتى ءونىم شىعارۋعا مۇمكىندىك بەرەتىن وزىق تەحنولوگيالارمەن جابدىقتالعان.
شاھار باسشىسى باقىتجان ساعىنتاەۆ الماتىلىق وندىرۋشىلەردى قولداۋدىڭ ماڭىزدىلىعىن اتاپ ءوتتى. قالادا جولداردى, جاياۋ جۇرگىنشىلەر جانە ساياباق ايماقتارىن جوندەۋ بويىنشا اۋقىمدى جۇمىستار جۇرگىزىلۋدە. جەرگىلىكتى ءونىمدى پايدالانۋ – ساپانى باقىلاۋعا جانە تاسىمالداۋ شىعىندارىن قىسقارتۋعا مۇمكىندىك بەرەدى.
