پروفيلاكتيكالىق تەكسەرۋ كەزىندە 14 ادامنان ىندەت انىقتالسا, قالعاندارى كارانتيندەگىلەر. بۇلارمەن جاقىن بايلانىستا بولعان بارلىق ازاماتتار وقشاۋلاندىرىلدى.
جالپى, مەگاپوليستە پاندەميا باستالعالى بەرى ۆيرۋسى راستالعان 1966 جاعداي تىركەلدى. قازىرگى ۋاقىتتا قالالىق جۇقپالى اۋرۋلار ستاتسيونارىندا كوروناۆيرۋستىق ينفەكتسيادان 864 ناۋقاس ەمدەلىپ جاتىر. سونىڭ ىشىندە 30 بالا بار.
ەكى ناۋقاستىڭ جاعدايى – وتە اۋىر, 22 ادامدا – اۋىر, 240 ناۋقاستا اۋىرلىقتىڭ ورتاشا دارەجەسى, ال قالعاندارىنىڭ دەنساۋلىعى قاناعاتتانارلىق.
بۇگىندە پروۆيزورلىق گوسپيتالدا 196 ادام بار. بۇدان وزگە 266 ادام كارانتيندىك وقشاۋلاۋدا جانە 13 299 ازامات ءۇي كارانتينىندە جاتىر.
بۇرناعى كۇنى 55 ادام قاۋىپتى ىندەتتەن جازىلىپ شىقتى. ونىڭ ىشىندە 28 ادام – مەديتسينا قىزمەتكەرى, 1,5 جاس پەن 16 جاسقا دەيىنگى 10 بالا, 1947, 1949 جانە 1952 جىلدارى تۋعان ءۇش زەينەتكەر جانە قالعاندارى ورتا جاستاعى ازاماتتار.
جالپى, مەگاپوليستە پاندەميا باستالعالى بەرى قاۋىپتى ىندەتتەن 1092 ناۋقاس ساۋىعىپ شىقتى, بۇل 56%-دى قۇرايدى.
«دەگەنمەن, قالادا كارانتين رەجيمى ءالى جالعاسۋدا. مەگاپوليس تۇرعىندارىنا, اسىرەسە, جوتەل, مۇرىننان سۋ اعۋ نەمەسە باسقا دا اۋرۋ سيمپتومدارى بولعان جاعدايدا بارلىق قاۋىپسىزدىك شارالارىن ۇستانۋ كەرەكتىگىن ەسكەرتەمىز. اتاپ ايتقاندا, بەتپەردە كيىپ, مۇمكىندىگىنشە حالىق كوپ جينالاتىن ورىندارعا بارماۋعا, قولدى ءجيى جۋىپ, ادامداردان وزدەرىن كەم دەگەندە 2 مەتر قاشىقتىقتا ۇستاۋ كەرەكتىگىن ءوتىنىپ سۇرايمىز. بۇل ۇسىنىستاردى ورىنداي وتىرىپ, ءسىز اۋرۋدىڭ تارالۋ قاۋىپىن تومەندەتەسىز. ەگەر سىزدە دەنە قىزۋى كوتەرىلىپ, جوتەل پايدا بولسا, تىنىس الۋ قيىنداي تۇسسە, مەديتسينالىق كومەككە جۇگىنىپ, جەدەل جاردەم شاقىرعانىڭىز ابزال», – دەدى الماتى قالاسى قوعامدىق دەنساۋلىق باسقارماسىنىڭ باسشىسى تىلەۋحان ابىلداەۆ.
