ERG قىزمەتكەرلەرى ءۇشىن ارنايى جەڭىلدەتىلگەن نەسيەلەندىرۋ باعدارلاماسى ازىرلەنگەن. ونىڭ اياسىندا ERG-ءدىڭ تۇرعىن ءۇي باعدارلاماسى بويىنشا پاۆلودار, اقسۋ, ەكىباستۇز بەن قاراعاندى قالالارىندا سالىنعان ۇيلەردەن باسپانا الۋعا بولادى.
– ERG ءۇشىن الەۋمەتتىك قامسىزداندىرۋ, سونىڭ ىشىندە قىزمەتكەرلەرىمىزگە, ءبىزدىڭ «تۋعان» قالالارىمىزدىڭ تۇرعىندارىنا دەگەن قامقورلىق ءاردايىم نەگىزگى باسىمدىق, – دەدى ەۋرازيالىق توپتىڭ باسقارما توراعاسى سەرىك شاحاجانوۆ. – حالىققا قاجەتتى وسىنداي باعدارلامالاردى جۇزەگە اسىرۋ باستاماسىندا ءبىزدى قولداعان تۇرعىن ءۇي قۇرىلىس جيناق بانكى باسشىلىعىنا العىس ايتامىز.
وسىلايشا, «قازاقستان ءاليۋمينيى» اق, «قازاقستان ەلەكتروليز زاۋىتى» اق, «شۇباركول كومىر» اق, «قازحروم»تۇك» اق اقسۋ فەرروقورىتپا زاۋىتى مەن «ەەك» اق «شىعىس» كەنىشىنىڭ قىزمەتكەرلەرى ارنايى شارتپەن جەڭىلدەتىلگەن نەسيە الا الادى. ERG كاسىپورىندارىنىڭ قىزمەتكەرلەرىنەن باستاپقى جارنا تالاپ ەتىلمەيدى.
–تقجب بۇگىندە قىزمەتكەرلەرى قازاقستانداعى 60 000 وتباسىنى اسىراپ وتىرعان الىپ كومپانيالار توبىمەن تىعىز ارىپتەستىك ورناتقانىنا قۋانىشتى. وسى ورايدا, ءبىز ERG قىزمەتكەرلەرى تەك بۇل باعدارلامامەن شەكتەلمەي, باستاپقى جانە بۇرىن قولدانىستا بولعان باسپانانى ساتىپ الۋدا «نۇرلى جەر», ء«وز ءۇيىم», «5-10-20» سىندى تۇرعىن ءۇي قۇرىلىس بانكىنىڭ باسقا دا باعدارلامالارىن بەلسەندى پايدالانادى دەگەن ۇمىتتەمىز. ERG قىزمەتكەرلەرىنە بارىنشا ساپالى قىزمەت كورسەتىپ, العاشقى كۇننەن ءبىزدىڭ ۆيدەوبانكىمىزدى, ينتەرنەت-بانك پەن تۇقجب24 قوسىمشالارىن پايدالانا باستاۋدى ۇسىنامىز, – دەدى تقجب باسقارما ءتورايىمى ءلاززات يبراگيموۆا.
باعدارلاما شارتتارىنا ساي, ەگەر تۇرعىن ءۇي ءالى سالىنىپ بەتپەگەن بولسا, قىزمەتكەر «تقجب» اق-دا دەپوزيت اشىپ, قازىردەن باستاپ ءوزى قالايتىن باسپانانىڭ 30%-ىن جيناي باستاۋىنا بولادى. ال, ءۇي پايدالانۋعا بەرىلگەن بولسا, ول بىردەن باسپانالى بولىپ, ءۇش جىل بويى ءوزىنىڭ دەپوزيتىندە پاتەرىنىڭ 30% كولەمىندە باستاپقى جارنا جيناقتاۋى كەرەك. دەپوزيتىنە 30% جينالعان ساتتەن باستاپ, ول پاتەردىڭ مەنشىك يەسى اتانباق. ونىڭ ۇستىنە, بۇل سوماعا سىياقى مەن مەملەكەتتىك سىياقى قاتار قوسىلىپ وتىرادى. قىزمەتكەر دەپوزيتتە باسپانا الۋعا قاجەتتى قاراجاتتىڭ 30%-ىن جيناعان سوڭ, قالعان سومانى نەسيەگە الا الادى. جيناق پاتەر قۇنىنىڭ 50% جەتكەندە, بەرەشەكتىڭ ۇستەمەسى تومەندەيدى. نەسيە 15 جىلعا دەيىنگى مەرزىمگە بەرىلەدى.
قىزمەتكەرلەرىن باسپانامەن قامتۋ – ERG-ءدىڭ الەۋمەتتىك ساياساتىنىڭ باسىم باعىتتارىنىڭ ءبىرى.
ERG-ءدىڭ تۇرعىن ءۇي باعدارلاماسىنىڭ ارقاسىندا 2006 جىلدان بەرى توپ كاسىپورىندارىنىڭ اقتوبە وبلىسى (اقتوبە مەن حرومتاۋ ق.), قاراعاندى وبلىسى (قاراعاندى ق.), قوستاناي وبلىسى (رۋدنىي ق.) جانە پاۆلودار وبلىسىنداعى (پاۆلودار, اقسۋ مەن ەكىباستۇز ق.) 3 مىڭعا تارتا قىزمەتكەرى باسپانا جاعدايىن جاقسارتا الدى.
ERG مەن «بايتەرەك» حولدينگىنىڭ اراسىنداعى سەنىمدى سەرىكتەستىك تاجىريبەسى بۇرىننان بار. وسىعان دەيىن «قازاقستان يپوتەكالىق كومپانياسى» اق-مەن ارىپتەستىك اياسىندا ERG كاسىپورىندارى ورنالاسقان وڭىرلەردە 9 تۇرعىن ءۇي سالىنىپ, جالپى سانى 700-دەن استام پاتەر بەرىلدى. باعدارلاما 2018 جىلى تابىستى اياقتالعان بولاتىن.
ودان سوڭ دا ERG تۇرعىن ءۇي قۇرىلىسىن جالعاستىرىپ, 4 باسپانا سالىندى. 467 وتباسى قونىس تويىن تويلاعان. تاعى ەكى ءۇيدىڭ قۇرىلىسى بۇگىندە اياقتالۋعا جاقىن.
