داۋدىڭ باسى دا ءدال وسى ونلاين نەسيەدەن باستالىپ وتىر. «سان سوعىپ, بارماق تىستەپ» قالعانداردىڭ سانى ارتقاندىقتان بۇل ماسەلەگە مەملەكەت ارالاسۋى ءتيىس بولدى. ءسويتىپ, بۇعان دەيىن ەكىنشى دەڭگەيلى بانكتەرگە عانا قولدانىلىپ كەلگەن جىلدىق مولشەرلەمە 56 %-دى قۇراۋى ءتيىس دەگەن مەجە بارلىق شاعىن قارجى ۇيىمدارىنا جاپپاي ەنگىزىلىپ وتىر. بۇل وزگەرىسكە شاعىن قارجى ۇيىمدارىنىڭ ءوز ءۋاجى بار.
̶ ەكىنشى دەڭگەيلى بانكتەر قولداناتىن ارنايى فورمۋلا بار. بۇل كەستە شاعىن قارجى ۇيىمدارىنا ارنالماعان. بارلىق شىعىنداردى ەسەپكە الاتىن بولساق, سحەما بويىنشا جىلدىق مولشەرلەمە 56 %-دى ەمەس, 46 %-دى قۇرايدى. ۇنەمى مەملەكەتتىڭ قولداۋىنا ءزارۋ ەكىنشى دەڭگەيلى بانكتەردىڭ قارجى اينالىمى شاعىن ۇيىمدارمەن سالىستىرعاندا الدەقايدا جوعارى ەكەنى ايتپاسا دا تۇسىنىكتى. جالپى العاندا ەلىمىزدە 2 جارىم مىڭداي لومبارد بار دەسەك, زاڭداعى جاڭا وزگەرىسكە سايكەس سونىڭ 60 %-ى ەندى «كولەڭكەلى بيزنەسپەن» اينالىسۋعا كوشەدى. بۇل دەگەنىمىز مەملەكەتكە تۇسەتىن سالىق كەميدى دەگەن ءسوز. اتالعان سالادا 3 مىڭعا جۋىق ادام جۇمىس ىستەيتىنى تاعى بار. وسى رەتتە, نەعۇرلىم شاعىن قارجى ۇيىمدارىنىڭ سانى از بولعان سايىن ونى قاداعالاپ وتىرۋ ءتيىمدى دەگەن قاعيداعا كەلىسپەيمىن. اعاشتىڭ ەكى ۇشى بارىن ۇمىتپاۋىمىز كەرەك. بىزدەن قارىز الاتىنداردىڭ باسىم بولىگى شاعىن جانە ورتا كاسىپكەرلىكپەن اينالىساتىندار. ولاردىڭ اي سايىن الاتىن تۇراقتى تابىسى جوق. وسى ماسەلەنى نەگىزگە الىپ بانكتەر ولارعا نەسيە بەرمەيدى. ال بىزدەن العان قاراجاتىن تابىسى قاي ۋاقىتتا تۇسەدى, سول ۋاقىتتا جابۋىنا قولايلى جاعداي جاسالعان ەدى. جاڭا تالاپ بويىنشا زەينەتاقى قورىنا اقشا اۋدايمايتىن, تۇراقتى تابىسى جوق كليەنتتەرىمىزدەن ايىرىلىپ قالايىن دەپ تۇرمىز, - دەيدى TAS GROUP كومپانيالار توبىنىڭ زاڭ دەپارتامەنتىنىڭ ديرەكتورى ماقسات وسەرباەۆ.
