حالىقتى قاناپ, 600-700 %-بەن دە نەسيە بەرگەندەردى «قۇرىقتاۋ» ماقساتىندا مەملەكەت بىرقاتار كەشەندى شارا قابىلدادى. سونىڭ ىشىندە بيىلدان باستاپ ۇلتتىق بانكتىڭ قاراماعىنان قارجى نارىعىن رەتتەۋ جانە دامىتۋ اگەنتتىگى قۇرىلىپ وتىر. ەلىمىزدىڭ باس بانكى بۇل ۇيىمعا ەكىنشى دەڭگەيلى بانكتەردى, ميكروقارجى ۇيىمدارىن, لومباردتار مەن ونلاين-كرەديتورلاردى باقىلاپ وتىرۋ قۇزىرەتىن تاپسىرعان.
ايتا كەتەرلىگى, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى نارىعىن جانە ميكروقارجى قىزمەتىن رەتتەۋ مەن سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا 2020 جىلدىڭ 1 قاڭتارىنان باستاپ جاڭا وزگەرىستەر ەنگىزىلدى. زاڭدى ىسكە اسىرۋ ءۇشىن ۇلتتىق بانك ميكرو قارجى ۇيىمدارىنىڭ قىزمەتىن رەتتەيتىن 10-نان استام نورماتيۆتىك قۇقىقتىق اكتىلەردى قابىلدادى. ونىڭ ىشىندە جىلدىق مولشەرلەمە 56 %-دى قۇرايتىنى, ءار قارجى ۇيىمىنىڭ جەكە كاپيتالى بولۋى كەرەكتىگى ونىڭ ىشىندە لومبارتتار ءۇشىن 70 ملن تەڭگە, شاعىن قارجى ۇيىمدارى ءۇشىن 100 ملن تەڭگەنى قۇراۋى ءتيىس ەكەنى ايتىلعان. ياعني, اتالعان قارجى كولەمى بولماعان جاعدايدا شاعىن قارجى ۇيىمىن اشۋ مۇمكىن ەمەس. ساراپشىلار شاعىن ۇيىمداردىڭ كاپيتالىن جوعارى مەجەدە بەكىتۋ اسىعىس قابىلدانعان شەشىم ەكەنىن, بۇل قادامعا بارۋ ءۇشىن دايىندىقتىق قاجەت ەكەنىن, ءالى دە بولسا 3-4 جىل كەرەگىن العا تارتادى. قارجى نارىعىن رەتتەۋ جانە دامىتۋ اگەنتتىگى كەلتىرگەن مالىمەتكە سۇيەنسەك, رەسمي تىركەلگەن شاعىن قارجى ۇيىمدارىنىڭ 48%-ىندا 50 ملن تەڭگەگە جەتەقابىل قور بار. ال 50 ملن مەن 100 ملن تەڭگە ارالىعىنداعى جارنالىق كاپيتالى بار ۇيىمداردىڭ ۇلەسى 18%. 100 ملن-نان 500 ملن تەڭگە اراسىندا جارنالىق كاپيتال جيناعان ۇيىمدار 25%-دى قۇراپ وتىر. 500 ملن-نان 1 ملرد تەڭگە ارالىعىنداعىداردىڭ ۇلەسى 3 %. ەڭ جوعارى 1 ملرد تەڭگەدەن ارتىق قورى بارلاردىڭ ۇلەسى 6%. بۇل تىزىمگە ازىرگە 11 شاعىن قارجى ۇيىمى ەنىپ وتىر.
