ايماقتار • 21 مامىر، 2020

سقو: سوڭعى 7 جىلدا 180 ادام سۋعا باتىپ كەتكەن

16 رەت كورسەتىلدى

سولتۇستىك قازاقستاندا بيىل جاز ماۋسىمى ەرتە باستالىپ، كارانتيندىك شەكتەۋلەر ازايتىلىپ، سۋعا ءتۇسۋ كوبەيۋىنە بايلانىستى وبلىستىق تج دەپارتامەنتىنىڭ باستىعى، پولكوۆنيك راميل كامالوۆ بريفينگ بەرىپ، قاۋىپسىزدىك ماسەلەلەرىن  ەسكەرتتى. 

ونىڭ ايتۋىنشا، سولتۇستىك قازاقستان وبلىسىندا ۇلكەندى-كىشىلى 60 وزەن، 2 مىڭنان ارتىق كول جانە 117 قولدان قازىلعان كولشىكتەر بار. سونىڭ ىشىندە حالىق جاز ايلارىندا كوپ تۇسەتىنى ەسىل وزەنى، اققۋلى، ۇلكەن توراڭعۇل، شالقار جانە يمانتاۋ كولدەرى.

سوڭعى 7 جىلدا وبلىستىڭ سۋ قويمالارىندا 180 ادام سۋعا باتىپ كەتكەن. ونىڭ 24-ءى بالالار. تەك بىلتىر عانا سۋعا باتقاندار 12 ادام بولسا، سونىڭ ەكەۋى بالا. وسىنداي جاعدايلارعا جول بەرىلمەس ءۇشىن تج دەپارتامەنتى سۋ قويمالارىنداعى قۇتقارۋشىلاردىڭ جۇمىسىن بيىل بارىنشا كۇشەيتۋگە تىرىسادى. وبلىس اكىمى 2020 جىلعى سۋعا ءتۇسۋ ماۋسىمىنا دايىندىق پەن قاۋىپسىزدىك شارالارىن جاساۋدىڭ جوسپارىن بەكىتكەن. وسى وكىمگە سايكەس سۋعا تۇسۋگە تەك بەلگىلەنگەن جەرلەردە عانا رۇقسات بەرىلەدى. ولاردا قۇتقارۋ قىزمەتتەرى جاقسى جولعا قويىلعان.

سۋعا تۇسۋگە رۇقسات ەتىلگەن جاعاجايلاردىڭ سانى وبلىس بويىنشا 58 جەردە. ولار ەسىل وزەنى مەن 12 كولدىڭ بويىندا ورنالاسقان. ال قۇتقارۋ قىزمەتتەرى جوق سۋ قويمالارىندا سۋعا تۇسۋگە بولمايدى.  

بۇگىنگى تاڭدا تج دەپارتامەنتىنىڭ بولىمشەلەرى وزەندەر مەن كولدەردىڭ بويىنداعى كوپشىلىككە دەمالىس ورىندارى ۇيىمداستىرىلعان جەرلەردە قۇتقارۋ قىزمەتتەرىنىڭ بار-جوعىن جانە ونىڭ ساپاسىن تەكسەرۋدە. سونىڭ ىشىندە جالعا العان كولدەردەگى جاعدايلار دا باقىلانادى. ەگەر ولاردا سۋعا ءتۇسۋ قاۋىپسىزدىگى تالاپقا ساي بولماسا ءتيىستى شارالار قولدانىلادى. تج دەپارتامەنتى سۋعا ءتۇسۋ قاۋىپسىزدىگىن ۇيىمداستىرۋدا قانداي شارالار جاسالۋى كەرەكتىگى تۋرالى ارنايى پاسپورت جاساعان. قازىر ولار بارلىق اۋدانداردىڭ اكىمدىكتەرىنە جەتكىزىلگەن.

سولتۇستىك قازاقستان وبلىسى

سوڭعى جاڭالىقتار

ورازانىڭ ءار ءساتى ساۋاپ

رۋحانيات • كەشە

ءسوزدىڭ جەتى بوياۋى

تانىم • كەشە

ۇقساس جاڭالىقتار