بوكەي ورداسى اۋدانىنىڭ ورتالىعى سايقىن اۋىلىنىڭ تۇرعىنى ازبەك مۇحيتوۆ «بارىس» دۇكەنىن 2011 جىلى اشقان ەكەن. اۋەلى ەت ساتاتىن دۇكەن كەيىن كەڭەيىپ, ازىق-ت ۇلىك تاۋارلارىن ساتاتىن ساۋدا ورنىنا اينالعان. ارينە اۋىلدىق جەردە تۇرعىندار ءبىرىن ءبىرى تانيدى, تاۋاردى قارىزعا بەرۋ, «جازدىرىپ الۋ» - ۇيرەنشىكتى جاعداي.
ازبەك الەۋمەتتىك جەلىدەن شەشەن كاسىپكەرلەرىنىڭ ورازا ايىندا وسىنداي قايىرىمدىلىق جاساپ جاتقان ءىسىن كورىپ, تابان استىندا شەشىم قابىلداپتى. ءسويتىپ اۋىل دۇكەنىندەگى قارىز تۇرعىندار تۋرالى جازىلعان داپتەردىڭ پاراقتارىن جىرتىپ الىپ, جويىپ جىبەرەدى. ءوزىنىڭ وسى ارەكەتىن بەينەجازباعا ءتۇسىرىپ, اۋىلداستارىنىڭ whatsapp توبىندا جاريالاعان.
- بۇل بەينەجازبا جۇرتقا تاراپ كەتەدى دەپ ويلاماپپىن. ماقتانعانداي بولىپ قالدىم با دەپ ۇيالىپ وتىرمىن, - دەيدى اۋىل كاسىپكەرى.
بەينەجازبادان ازبەك مۇحيتوۆ اۋىلداستارىنىڭ جالپى كولەمى 63 685 تەڭگە قارىزىن كەشىرگەنىن كورەمىز. بىراق كاسىپكەر «قاي تۇرعىن قانشا قارىز ەدى, جالپى سانى قانشا ادام؟» دەگەن ساۋالدارىمىزعا جاۋاپ بەرە المادى. بار نيەتى قاسيەتتى ايدا جاقسىلىق جاساۋ بولعان ازبەك ونداي ۇساق-تۇيەككە ءمان بەرمەسە كەرەك. ايتەۋىر «قارىز داپتەردەگى» جازبالار سوناۋ 2017 جىلدان باستاپ قاعازعا تۇسكەن ەكەن.
ازبەكتىڭ وسى جەكە دۇكەنىنەن بولەك, 2-3 جىل بۇرىن مەملەكەتتەن نەسيە الىپ, ءوسىرىپ وتىرعان ازىن-اۋلاق مال شارۋاشىلىعى بار. اۋىل دۇكەنىنە بۇرىن ازىق-ت ۇلىكتى ىرگەدەگى رەسەي قالالارىنان الاتىن بولسا, كارانتين باستالىپ, شەكارا جابىلعالى 600 شاقىرىم جەردەگى ورال قالاسىنان تاسيدى. ياعني شارۋاسى شالقىپ وتىرعان كاسىپكەر دەۋگە كەلمەيدى. بىراق جومارتتىق ادامنىڭ بايلىعىنا قارامايدى عوي. قاسيەتتى ايدا قايىرىمدىلىق كورسەتكەن ازبەكتىڭ وسى ارەكەتىنە ريزا بولىپ, ارنايى ىزدەپ كەلىپ تە, تەلەفون ارقىلى دا العىس ايتىپ جاتقان اۋىلداستارى از ەمەس ەكەن.
باتىس قازاقستان
