ايماقتار • 21 مامىر، 2020

قاراعاندى وبلىسى: COVID-19 جۇقتىرعانداردىڭ سانى 300 ادامعا جەتتى

70 رەت كورسەتىلدى

كارانتين بوساڭسىعانعا جۇرت كوروناۆيرۋس كەتتى دەپ ويلاپ جۇرگەن شىعار. مۇلدە ولاي ەمەس. ىندەت ءوزىنىڭ شارىقتاۋ شەگىنە جەتىپ، ەندى قۇلدىرايتىن شىعار دەسەك، بۇل پالەكەت باسقا شاۋىپ، توسكە ورلەپ بارادى.

كەشە عانا جەتى ادام جازىلىپ شىقتى دەپ قۋانىپ وتىر ەدىك، بۇگىن وبلىس اكىمىنىڭ ءباسپاسوز قىزمەتى قاراعاندى وبلىسىندا تاعى دا 13 ادامعا COVID-19 پاندەمياسىنىڭ جۇققانىن حابارلادى.

اۋىرعانداردىڭ باسىم بولىگى تەمىرتاۋ قالاسىنان. 1963، 1978، 1981، 1992 جىلدارى دۇنيەگە كەلگەن ءتورت ەر ادام، 1976، 1983، 1993 جىلدارى تۋعان ءۇش ايەل جانە التى جاستاعى بالا دەرتكە شالدىقتى.

پتر-زەرتتەۋ دياگنوزىن راستاعان پاتسيەنتتەر قاتارىندا ءتورت قاراعاندىلىق بار. ولار 1967، 1976 جىلدارى تۋعان ەكى ەر ادام، 1990 جىلعى  ايەل جانە ءبىر جاستاعى بالا. سونداي-اق ساران قالاسىندا تۇراتىن 1963 جىلعى ايەل دە ينفەكتسيالىق اۋرۋحاناعا جاتقىزىلدى.

قازىرگى ۋاقىتتا ناۋقاستاردىڭ جاعدايى قاناعاتتانارلىق. ولارعا قاتىستى بەكىتىلگەن حاتتاماعا سايكەس ەمدەۋ جۇرگىزىلەدى.

20 مامىرداعى جاعداي بويىنشا، قاراعاندى وبلىسىندا 300 ادامنىڭ كۆي جۇقتىرعانى رەسمي تۇردە تىركەلدى. ونىڭ ىشىندە ءۇش پاتسيەنت پاندەميادان  قايتىس بولدى جانە 163 ادام جازىلىپ، ءۇي كارانتينىنە شىعارىلدى. 

سوڭعى جاڭالىقتار

ۇقساس جاڭالىقتار