«ارىپتەسىم ەرلان تۇرعىمباەۆتىڭ ازاماتتارعا تاياۋدا جۇرگىزۋشى كۋالىگى مەن تەحپاسپورتتى وزىمەن بىرگە الىپ ءجۇرۋىنىڭ قاجەتى بولمايتىنى تۋرالى ايتقانى كەشەگى كۇننىڭ باستى جاڭالىعى بولدى. بۇل شىن مانىندە, كوپتەن كۇتكەن شەشىم. مەملەكەت پەن ازاماتتىڭ ءوزارا تسيفرلىق ءىس-قيمىلىن جاقسارتۋعا جاسالعان ۇلكەن قادام. پوليتسەيلەردىڭ جۇرگىزۋشىلەردەن بۇل قۇجاتتاردى تالاپ ەتپەي-اق, ونىڭ بار-جوعىن جسن ارقىلى تەكسەرۋىنە تەحنيكالىق مۇمكىندىكتەر بار.
قازىر سەناتتا قارالىپ جاتقان «تسيفرلىق تەحنولوگيالار تۋرالى» زاڭ جوباسى قابىلدانعاننان كەيىن, eGov Mobile ءموبيلدى قوسىمشاسىنداعى تسيفرلىق قۇجاتتار تولىق زاڭدى كۇشكە يە بولىپ, قاعاز قۇجاتپەن بىردەي قولدانىلادى. ياعني, ءسىز پوليتسيا قىزمەتكەرىنە ءوز كۋالىگىڭىزدىڭ تسيفرلىق نۇسقاسىن سمارتفوننان كورسەتە الاسىز.
ازىرگە موبيلدىك قوسىمشادا 4 ءتۇرلى قۇجاتتىڭ تسيفرلىق نۇسقاسى بار: جەكە كۋالىك, بالانىڭ تۋ تۋرالى كۋالىگى, نەكە قيۋ جانە بۇزۋ, اتىن, تەگىن, اكەسىنىڭ اتىن اۋىستىرۋ تۋرالى. ءبىز مەملەكەتتىك ورگاندارعا قوسىمشادا سونداي-اق, ستۋدەنتتىك كۋالىك, اسكەري بيلەت, مۇگەدەكتىك تۋرالى كۋالىك, جىلجىمايتىن م ۇلىكتىڭ تەحنيكالىق پاسپورتى جانە ت.ب. بولۋى ءۇشىن قاجەتتى ينتەگراتسيانى جۇرگىزۋدى ۇسىندىق. بۇل قۇجاتتاردىڭ موبيلدىك قوسىمشادا تسيفرلىق نۇسقالارىنىڭ بولۋى ازامات ءۇشىن وتە ىڭعايلى بولار ەدى دەپ ويلايمىن.
سونىمەن قاتار ءبىز مەملەكەتتىك ورگانداردىڭ ازاماتتان تالاپ ەتپەي, وزدەرى الا الاتىن انىقتامالاردان باس تارتۋى جۇمىستارىن جۇرگىزۋدەمىز. جوسپار بويىنشا, مەملەكەتتىك ورگاندار جىل سوڭىنا دەيىن 24 اقپاراتتىق انىقتامانى الىپ تاستاۋعا ۋادە بەردى. ول ءۇشىن ولار ءوز ينتەگراتسياسىن اياقتاۋى, سونداي-اق ءوز رەگلامەنتتەرى مەن نقا-نى وزگەرتۋى ءتيىس. ومىرىمىزگە قاجەتتى قاعاز قۇجاتتار سانىنىڭ ازاياتىنى قۋانتادى», - دەپ جازدى ول.
