قازگورودوك ورتا مەكتەبىنىڭ ىرگەتاسى 1979 جىلى قالانعان. سودان بەرى مەكتەپ ىشىندە كىشىگىرىم جوندەۋ جۇرگىزىلگەنىمەن, ءدال وسىنداي كۇردەلى جوندەۋ جۇمىسى ءبىرىنشى رەت جاسالىپ وتىر. جوندەۋ جۇمىستارىنا وبلىستىق قازىنادان 285 ملن تەڭگە قاراستىرىلعان. بۇل كۇنى قۇرىلىسقا 20-عا جۋىق ادام مەن ارنايى تەحنيكا جۇمىلدىرىلعان.
– قازىرگى ۋاقىتتا مونتاجداۋ جۇمىستارىنىڭ جارتىسى اياقتالدى. سونداي-اق عيماراتتىڭ سىرتىن دا قىرىپ, تازارتىپ, اكتەپ جاتىرمىز. ەندىگى اپتادان باستاپ ىشكى ارلەۋ جۇمىستارى باستالادى. نىساندى 15 تامىزدا تاپسىرامىز. بارلىعى جوسپار بويىنشا جۇزەگە اسۋدا, – دەيدى قۇرىلىس ۋچاسكەسىنىڭ جەتەكشىسى ولجاس قابدوللوۆ.
ءبىلىم وشاعىندا 204 شاكىرت ءبىلىم الادى. كۇردەلى جوندەۋدەن كەيىن مەكتەپ ءىشى جاڭا جيھازدارمەن تولىقتىرىلىپ, كومپيۋتەرلەرمەن دە جابدىقتالماق.
– «اۋىل – ەل بەسىگى» جوباسى اياسىندا مەكتەپكە كۇردەلى جوندەۋ جۇمىستارى جۇرگىزىلۋدە. كابينەتتەردىڭ ءىشى كەڭەيتىلىپ جاتىر. مەكتەپتىڭ الدىنا دا اباتتاندىرۋ جۇمىستارى جۇرگىزىلۋدە, – دەيدى كازگورودوك ورتا مەكتەبىنىڭ ديرەكتورى الما بەكەنوۆا.
كازگورودوك مەكتەبىنەن بولەك اۋدانداعى اباي اۋىلىنداعى ءبىلىم ورداسىنا وسىنداي كۇردەلى جوندەۋ جۇمىستارى جاسالماق. الداعى ايلاردا قۇرىلىس جۇمىستارى باستالادى.
اقمولا وبلىسى
