قازاقستان قۇراماسىنىڭ سپورتشىلارى تاۋەلسىز مەملەكەت رەتىندە تۇڭعىش رەت اقش-تىڭ اتلانتا قالاسىندا جالاۋى جەلبىرەگەن ءدۇبىرلى دودادا باق سىنادى. تورتجىلدىقتىڭ باستى باسەكەسىنە جەرلەستەرىمىز العاش رەت قاتىسىپ تۇرسا دا, الپاۋىت ەلدەرمەن يىق تىرەسىپ, جۇلدە ءۇشىن تالاستا ايانىپ قالمادى. اتاپ ايتار بولسا, سول جىلعى وليمپيادادا وتاندىق سپورتشىلار 11 مەدال جەڭىپ الدى, ونىڭ ۇشەۋى التىن. سونىمەن قاتار تاعى دا ءتورت كۇمىس پەن ءتورت قولا جۇلدەنى قورجىنعا سالدى.
قازىرگى بەسسايىستان سىنعا تۇسكەن الەكساندر پارىگين دە كۇتپەگەن جەردەن وليمپ تۇعىرىنا كوتەرىلگەنىن جاسى ۇلكەن جانكۇيەرلەر جاقسى بىلەدى. ءبىزدىڭ سپورتشىعا وليمپيادا چەمپيونى اتتى ماڭگىلىك اتاقتى الۋ وڭاي بولعان جوق. ويتكەنى 1996 جىلعى ويىندا قازىرگى بەسسايىس ەرەجەسى وزگەرىپ, بەس ءتۋرنيردىڭ بارلىعى دا ءبىر كۇندە وتكىزىلدى. بۇل سپورتشىلارعا ايتارلىقتاي قيىندىق تۋدىردى. قازىرگى بەسسايىستاعى شەشۋشى جارىس جۇگىرۋگە ارنالعان.
پارىگين 1992 جىلعى وليمپيادانىڭ جۇلدەگەرى, رەسەيلىك ەدۋارد زەنوۆكانىڭ ءىزىن الا ەكىنشى نومىرمەن جارىس جولىنا شىقتى. رەسەيلىك سپورتشى نەگىزگى توپتان قارا ءۇزىپ, كوش باسىنا شىعىپ ۇلگەردى. بىراق پارىگين ودان كوز جازباي, ءيىن تىرەسىپ كەلە جاتتى. سول ساتتە ستاديونعا جينالعان سپورتشىلار مەن جانكۇيەرلەردىڭ كوكەيىندە ءبىر عانا سۇراق, ياعني «مارەگە كىم ءبىرىنشى جەتەدى ەكەن؟» دەگەن ساۋال تۇرعان ەدى. ال سوڭعى سەكۋندتاردا الەكساندر بۇكىل دەنەسىن العا تاستاپ, مارە سىزىعىن ءبىرىنشى بولىپ كەسۋگە ۇمتىلدى. تاپ وسى ساتتە زەنوۆكانىڭ ءسۇرىنىپ كەتىپ, چەمپيوندىق اتاقتان ايىرىلىپ قالعانىنا بۇكىل الەم كۋا بولدى. وسى ءبىر تارتىستى ءساتتى ايگىلى فوتوگراف گەنري شۆارتس تاسپالاعان ەكەن.
قازىرگى بەسسايىس سپورتىنان الەم جانە ازيا چەمپيوناتىندا توپ جارعان وتانداسىمىز بۇگىندە اۋستراليادا تۇرادى. وليمپيادا چەمپيونى اتانعاننان كەيىن 1997 جىلى جاسىل قۇرلىق ەلىنە قونىس اۋدارعان. سونداي-اق پارىگين 2004 جىلى اۋستراليا قۇراماسى ساپىندا افينى وليمپياداسىنا قاتىسىپ, مارە سىزىعىن نەبارى 27-ءشى بولىپ كەسكەن.
پارىگيننىڭ التىن العانىنا 26 جىلعا جۋىق ۋاقىت وتسە دە, بۇگىنگە دەيىن بىردە-ءبىر قازاقستاندىق سپورتشى پارىگيننىڭ جەتىستىگىن قايتالاي الماي ءجۇر. وتانداسىمىزدىڭ التىنى قازىرشە سپورتتىڭ وسى تۇرىنەن وليمپيادادا جەڭىپ العان قازاقستاننىڭ العاشقى جانە ازىرشە سوڭعى جۇلدەسى.
