ارنايى كوميسسيانىڭ قۇرامىندا اتىراۋ وبلىسى اكىمىنىڭ ەكى ورىنباسارى, وبلىستىق دەپارتامەنتتەر مەن قۇقىق قورعاۋ ورگاندارىنىڭ, «تەڭىزشەۆرويل» جشس-ءنىڭ باسشىلارى جانە وبلىستىڭ باس سانيتارلىق دارىگەرى, سونداي-اق, دەنساۋلىق ساقتاۋ مينيسترلىگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى توراعاسىنىڭ ورىنباسارى نۇرقان سادۋاقاسوۆ تا بار.
ۇكىمەت باسشىسىنىڭ ورىنباسارى ە.توعجانوۆ «تەڭىزشەۆرويل» جشس-ءنىڭ مەردىگەر مەكەمەلەرىنىڭ قىزمەتكەرى ەمەس تۇلعالاردى انىقتاۋ ءۇشىن تەڭىز كەنىشىندەگى بارلىق اۋىسىمدىق لاگەرلەرگە تەكسەرىس جۇرگىزۋدى تاپسىرعان ەدى. سونىمەن بىرگە كارانتينگە جابىلعان ۆاحتالىق ايماقتارعا كىرىپ-شىعۋعا بلوك-پوستتار ورناتۋ, سانيتارلىق-دەزينفەكتسيا رەجيمىن ساقتاۋدى قامتاماسىز ەتۋ جۇكتەلدى. اتىراۋ وبلىسىنىڭ اكىمدىگى مەن «تەڭىزشەۆرويل» جشس-نە الگوريتم ازىرلەۋ, ەگجەي-تەگجەيلى جوسپار دايىنداۋ, قىزمەتكەرلەردى اۋىستىرۋ, ينفەكتسيا وشاقتارىن وقشاۋلاۋ, سونداي-اق, كەن ورنىنداعى جۇمىسشىلار اراسىندا قاۋىپتى دەرتتىڭ تارالۋىن بولدىرماۋ, ينفەكتسيانى اتىراۋ قالاسىنا كىرگىزبەۋ تاپسىرىلدى.
–ارنايى كوميسسيانىڭ ءبىرىنشى كۇنگى جۇمىس قورىتىندىسىمەن تشو مەردىگەرلەرىنىڭ ورنالاسقان جەرىن انىقتاۋ جوسپارىن قۇرۋ, كارانتيندىك ايماقتارعا باقىلاۋسىز كىرۋگە تيىم سالۋ, كەزەكشىلىكتە تۇرعان ادامداردىڭ سانىن انىقتاۋ, ءوندىرىس پروتسەسىنە قاتىسپايتىن ادامداردىڭ ورنىن تەكسەرۋ, ولاردى شىعارۋدى ۇيىمداستىرۋ تۋرالى شەشىم قابىلداندى. سونداي-اق قىزمەتكەرلەردى تەستىلەۋدەن وتكىزۋ كەستەسىن دە جاساعان ءجون. بۇعان قوسا, ساپالى ەپيدەميولوگيالىق تەكسەرىس قاجەت, دەدى اتىراۋ وبلىسى اكىمىنىڭ ورىنباسارى باقىتگۇل حامەنوۆا.
اتالعان كوميسسيا مۇشەلەرى بىرنەشە كۇن بويى تەڭىز كەنىشىندەگى جاعدايدى تۇراقتاندىرىپ, قىزمەتكەرلەر اراسىندا كوروناۆيرۋس ينفەكتسياسىنىڭ الدىن الۋ ءۇشىن بىرقاتار ناقتى شارالاردى قابىلدايتىن بولادى. سونىمەن بىرگە كوميسسيا ۆاحتالىق مەرزىمى اياقتالعان قىزمەتكەرلەردى تۇرعىلىقتى مەكەنجايىنا شىعارۋدى جەدەلدەتۋ جوسپارىن ازىرلەيدى. كەن ورنىندا بىرنەشە كۇن بۇرىن اشىلعان 230 ورىندىق ينفەكتسيالىق ستاتسيوناردىڭ قىزمەتىنە, كارانتيندىك ورتالىقتاردىڭ جاي-كۇيىنە, ىندەت جۇقتىرعاندارمەن بايلانىستا بولعانداردى وقشاۋلاۋ جۇمىسىنا, سانيتارلىق-ەپيدەميولوگيالىق نورمالاردىڭ ساقتالۋىنا مونيتورينگ جۇرگىزەتىن بولادى.
