«وتكەن اپتادا سكرينينگ كەزىندە 80 پايىزعا جۋىق ناۋقاس انىقتالدى. سونداي-اق بەلىگىلى ءبىر ۇجىمدار اراسىندا ينفەكتسيا جۇقتىرعاندار كوبەيۋدە. ماسەلەن تەڭىز كەنىشىندە بۇگىندىككە ۆيرۋس جۇقتىرۋدىڭ 935 جاعدايى تىركەلدى. سول سياقتى شىمكەنتتەگى PetroKazakhstan قىزمەتكەرلەرى اراسىندا 101 ادام ۆيرۋس جۇقتىرعان. سونىمەن قاتار ءۇي كارانتينىندەگى ادامدارمەن بايلانىستا بولعان 69 ادامنان ىندەت انىقتالدى. قاراعاندى وبلىسىنداعى قازاقمىس كوورپوراتسياسىندا 34 جاعداي تىركەلدى», دەدى ايجان ەسماعامبەتوۆا.
ونىڭ ايتۋىنشا, تەڭىزدەگى كوروناۆيرۋستىڭ كوبەيۋىنە بايلانىستى اتىراۋ وبلىسىنا ۇكىمەتتىك كوميسسيا جىبەرىلگەن. كەن ورنىنداعى جۇمىس ۋاقىتى مەن ساقتىق شارالارى جونىندە كوميسسيا شەشىمى شىعارىلدى. قازىر وسى ساقتىق شارالارىن ساقتاۋ بويىنشا باقىلاۋ جۇرگىزىلۋدە. ەگەر ول ساقتىق شارالارى ساقتالماسا, جۇقتىرعاندار سانى كۇرت ءوسۋى مۇمكىن. مەملەكەتتىك باس سانيتارلىق دارىگەر بۇل جاعدايدا كاسىپورىن ءماجبۇرلى تۇردە جۇمىسىن توقتاتاتىنىن ايتتى.
