ايماقتار • 20 مامىر، 2020

بايزاق اۋدانىندا 20 اۋىل تازا اۋىزسۋمەن قامتىلعان

36 رەت كورسەتىلدى

جامبىل وبلىسىنىڭ بايزاق اۋدانىندا 43 ەلدىمەكەن بار بولسا، بۇگىندە ونىڭ ىشىندە 20 ەلدىمەكەن اۋىزسۋمەن قامتىلعان. تازا اۋىزسۋمەن قامتاماسىز ەتىلگەن 17 ەلدىمەكەنگە «بايزاق سۋ» مەملەكەتتىك كوممۋنالدىق كاسىپورنى، قالعان 3 ەلدىمەكەنگە، ياعني اقشولاق، ۇشبۇلاق جانە تالاس ستانسالارىنا «تەمىرجول سۋ» جاۋاپكەرشىلىگى شەكتەۋلى سەرىكتەستىگى قىزمەت كورسەتەدى.

اۋداندا اعىمداعى جىلى سۋ قابىلداۋ قۇرىلىستارى مەن سۋ قۇبىرى جەلىلەرىن سالۋ باعىتىندا 8 جوبا قولعا الىنىپ، وعان جالپى 4 ميلليارد 727 ميلليون 267 مىڭ تەڭگە قارجى قارالعان. ال، قۇرىلىس بارىسىندا 380 جەرگىلىكتى تۇرعىن جۇمىسپەن قامتىلادى ەكەن. سونداي-اق، ءمادىمار اۋىلىنداعى ق.نۇرانوۆا كوشەسىن سۋمەن جابدىقتاۋ بويىنشا اعىمداعى جۇمىستارعا رەسپۋبليكالىق بيۋدجەتتەن 5 ميلليون 210 مىڭ تەڭگە، ديحان اۋىلىنىڭ سۋمەن جابدىقتاۋ جەلىسى مەن قۇدىقتارىن اعىمداعى جوندەۋگە 18 ميلليون تەڭگە بولىنگەن. بۇل جۇمىستار «جۇمىسپەن قامتۋدىڭ جول كارتاسى» باعدارلاماسى اياسىندا جۇزەگە اسىرىلۋدا.

وتكەن جىلى اۋدان ورتالىعى سارىكەمەر اۋىلى مەن تالاس اۋىلىندا اۋىزسۋ قۇبىرلارىن جۇرگىزۋ جۇمىستارى باستالعان بولاتىن. تالاس اۋىلىنداعى سۋمەن جابدىقتاۋ جەلىلەرىنىڭ سۋ قابىلدايتىن قۇرىلىستارىن سالۋ جۇمىستارىنا جالپى 638 ميلليون 439 مىڭ تەڭگە قاراستىرىلعان. مۇنداعى قۇرىلىس-مونتاج جۇمىستارى اعىمداعى جىلى اياقتالادى دەپ كۇتىلۋدە. ال، سارىكەمەر اۋىلىنا جۇرگىزىلىپ جاتقان قۇرىلىس جۇمىستارىن 2021 جىلى اياقتاۋ جوسپارلانعان. وعان رەسپۋبليكالىق جانە وبلىستىق بيۋدجەت ەسەبىنەن 3 ميلليارد 402 ميلليون 130 مىڭ تەڭگە قارجى قارالعان. سونىمەن قاتار، بيىلعى جىلى «وڭىرلەردى دامىتۋ» باعدارلاماسى اياسىندا اۋدانداعى بايزاق، قوستوبە، كوكتال جانە سەڭكىباي ەلدىمەكەندەرىندە سۋ قابىلداۋ قۇرىلىستارى مەن سۋ قۇبىرى جەلىلەرىن سالۋ جۇمىستارى باستالدى. رەسپۋبليكالىق جانە وبلىستىق بيۋدجەتتەن بايزاق ەلدىمەكەنىنە 232،2 ميلليون، قوستوبە ەلدىمەكەنىنە 449،6 ميلليون، كوكتال ەلدىمەكەنىنە 232،8 ميلليون، ال سەڭكىباي ەلدىمەكەنىنە 241،6 ميلليون تەڭگە بولىنگەن. بۇل ەلدى مەكەندەردەگى قۇرىلىس - مونتاج جۇمىستارى 2021 جىلى اياقتالادى. «سونىمەن قاتار، تازا اۋىزسۋمەن قامتىلماعان بازارباي، ۇلگىلى، اققيا، سارىباراق اۋىلدارىنا جاڭا قۇرىلىس، قىزىل جۇلدىز اۋىلىن قايتا جاڭعىرتۋ بويىنشا اۋىزسۋمەن قامتۋ ءۇشىن قاجەتتى قاراجات قارالىپ، جوبالىق-سمەتالىق قۇجاتتاماسىن ازىرلەۋ ءۇشىن مەملەكەتتىك ساتىپ الۋ كونكۋرسى وتۋدە.

سونداي-اق، «جۇمىسپەن قامتۋدىڭ جول كارتاسى» باعدارلاماسىمەن جاڭاتۇرمىس اۋىلىنا جاڭا قۇرىلىسقا 420،1 ميلليون تەڭگەگە، بۋرىل اۋىلىندا قايتا جاڭعىرتۋعا 850،6 ميلليون تەڭگەگە سۋ قابىلداۋ قۇرىلىستارى مەن سۋ قۇبىرى جەلىلەرىن سالۋ بويىنشا قۇرىلىس جۇمىستارى باستالدى. جوسپارعا سايكەس، 2020 جىلى تالاس، جاڭاتۇرمىس جانە بۋرىل ەلدىمەكەندەرىندەگى قۇرىلىس-مونتاج جۇمىستارى اياقتالادى. بۇل كورسەتكىش ەلدىمەكەن سانىمەن 51،1 پايىزدى قۇراسا، حالىق سانىمەن 52 154 ادامدى نەمەسە 48،6 پايىزدى قۇرايدى. كەلەسى 2021 جىلى سارىكەمەر، بايزاق، قوستوبە، كوكتال جانە سەڭكىباي سياقتى 5 ەلدىمەكەن تازا اۋىزسۋمەن قامتىلادى دەپ جوسپارلانۋدا. كوكباستاۋ اۋىلىن تازا اۋىزسۋمەن قامتۋ باعىتىندا جوبالىق-سمەتالىق قۇجاتتاماسى ازىرلەنىپ، مەملەكەتتىك ساراپتامانىڭ وڭ قورىتىندىسى الىنىپ، بيۋدجەتتىك ءوتىنىم جولداندى. ال، اۋدان اۋماعىندا ورنالاسقان حالىق سانى جاعىنان از قونىستانعان تورەكەلدى، قاينار، تورتكول، جاڭاساز سياقتى 4 ەلدىمەكەنگە وبلىستىق تۇرعىن ءۇي-كوممۋنالدىق شارۋاشىلىق باسقارماسى تاراپىنان ورتالىقتاندىرىلعان ءمودۋلدى سۋ قۇدىعىن ورناتۋ جۇمىستارى جوسپاردا بار»، دەيدى اۋدان اكىمى نۇرجان نۇرجىگىتوۆ.

1

سونىمەن قاتار، جاڭاتۇرمىس اۋىلدىق وكرۋگىنە قاراستى اقشولاق ەلدىمەكەنىندە بۇگىندە تازا اۋىزسۋعا قوسىلماعان 70 اۋلانىڭ تۇرعىندارى بار بولسا، ولار 65 000 تەڭگەدەن ءوز قاراجاتتارى ەسەبىنەن سۋ جيناۋعا قوسىلۋ جۇمىستارىن جۇرگىزۋدە ەكەن. وسىنداي اۋقىمدى جۇمىستاردىڭ ناتيجەسىندە 2024 جىلى اۋدانداعى 43 ەلدىمەكەننىڭ تۇرعىندارى تازا اۋىزسۋمەن تولىقتاي قامتاماسىز ەتىلەدى دەپ جوسپارلانۋدا. ال، «بايزاق سۋ»، «تەمىرجول سۋ» مەكەمەلەرىنىڭ قىزمەت ءتاريفى جوسپارعا ساي بەكىتىلگەن. سونداي-اق، بۇگىندە اۋداندا گەولوگيالىق سۋ قورىن انىقتاۋعا بايلانىستى شارالار قولعا الىنىپ، اۋىز سۋدى بارلىق ۇيگە جەتكىزۋ ماسەلەسى، سۋ جەتكىزىلگەن بارلىق ۇيلەرگە سۋ ەسەپتەگىش قۇرىلعىلاردى ورناتۋ جايى، سۋ شارۋاشىلىعى ماماندارىنىڭ كومەگىمەن وڭىردەگى جەراستى تۇششى سۋ قورىنىڭ مولشەرىن انىقتاۋ بويىنشا جۇمىستار دا اتقارىلۋدا.

 

جامبىل وبلىسى

سوڭعى جاڭالىقتار

ۇقساس جاڭالىقتار