نيەت ەتكەنگە ءناسىپ بار
قاراعاندى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى ۇسىنعان مالىمەتكە ساي, بيىل وڭىردە جول كارتاسى اياسىندا 63,7 ملرد تەڭگە سوماسىنا 16 106 جاڭا جۇمىس ورنىن اشۋ كوزدەلگەن. ەسكەرە كەتەتىن ءبىر جايت, مۇنىڭ ىشىندە 8053 ورىنعا جولداما جۇمىسپەن قامتۋ ورتالىقتارىنان بەرىلەدى.
جۇمىس ورىندارى اشىلعاننان كەيىن وندا ەڭبەك ەتەتىن ادامداردىڭ دا الەۋمەتتىك جاعدايى نازاردان تىس قالمايدى. مەملەكەت باسشىسىنىڭ تاپسىرماسىنا ساي, «جۇمىسپەن قامتۋدىڭ جول كارتاسى» اياسىندا باسقا جەرگە بارىپ جۇمىس ىستەۋگە نيەت بىلدىرگەن ازاماتتارعا ەڭ تومەنگى ەكى ەڭبەكاقى مولشەرىندە, ياعني 85 مىڭ تەڭگە شاماسىندا كوتەرمە اقى تولەنەدى. ياعني قاراعاندى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسەم جۇنىسبەكوۆانىڭ: «جۇمىس بەرۋشى مەردىگەرلەر حالىقتى جۇمىسپەن قامتۋ ورتالىقتارى ينفراقۇرىلىمدىق جوبالاردى ىسكە اسىرۋعا قاتىسۋ ءۇشىن جىبەرگەن جۇمىسسىزدارمەن ەڭبەك شارتىن جاساسقان كۇننەن باستاپ, ءۇش جۇمىس كۇنى ىشىندە ولارعا ەڭ تومەنگى ەكى ەڭبەكاقى مولشەرىندە ءبىر جولعى ماتەريالدىق كومەك كورسەتەدى», دەپ مالىمدەۋىن وسى تاپسىرما اياسىندا جاسالعان ناقتى قادام دەپ ەسەپتەۋگە بولادى.
«جۇمىسپەن قامتۋدىڭ جول كارتاسى» اياسىندا بوي كوتەرەتىن 33 جاڭا نىساننىڭ قاتارىندا مەكتەپتەر, بالا باقشالار, سپورت نىساندارى جانە تاريحي-مادەني كەشەندەر بار. مىسالى, جەزقازعان قالاسى مەن جاڭاارقا اۋدانىندا جاڭا مەكتەپتەر سالۋ, ساتباەۆ قالاسىندا بالاباقشا مەن وقۋشىلار سارايىنىڭ قۇرىلىسىن باستاۋ جوسپارلانعان. بۇدان بولەك, وبلىستا ءبىر وپەراتسيالىق بلوك پەن ەكى جەدەل جاردەم ستانساسى بوي كوتەرەدى.
دەنەشىنىقتىرۋ جانە سپورت سالاسىنا دا ايرىقشا كوڭىل بولىنەدى. ناقتىراق ايتقاندا, جەزقازعان, ساران, شاحتينسك قالالارى مەن ۇلىتاۋ اۋدانىندا دەنەشىنىقتىرۋ-ساۋىقتىرۋ كەشەندەرىنىڭ, قاراعاندى قالاسى مەن نۇرا, جاڭاارقا اۋداندارىندا ءجۇزۋ باسسەيندەرىنىڭ قۇرىلىسىن باستاۋ جوسپاردا بار.
مادەنيەت سالاسىنا كەلسەك, جەزقازعان قالاسىندا تاريحي-مادەني كەشەننىڭ قۇرىلىسى باستالادى.
اۋقىمدى جوبا اۋىلدى دا قامتيدى
بۇگىنگى كۇندە كوممۋنالدىق قىزمەت ساپاسىن ارتتىرۋ ماسەلەسى كۇن تارتىبىندە تۇر. وسى شارۋانىڭ اياسىندا وبلىستا 15 نىسان جاڭادان بوي كوتەرەدى. سۋ جەلىسى بويىنشا بۇقار جىراۋ, جاڭاارقا, قارقارالى, نۇرا, وساكاروۆ اۋداندارىندا جانە ساران قالاسىندا سەگىز جوبانى جۇزەگە اسىرۋ جوسپارعا الىنعان. ال ساتباەۆ قالاسى مەن ۇلىتاۋ اۋدانىندا كارىز جەلىلەرىن اۋىستىرۋ بويىنشا جۇمىستار باستالادى. مۇنىمەن قاتار قاراعاندى, بالقاش, ساران جانە شاحتينسك قالالارىندا جىلۋ جەلىلەرى جاڭادان تارتىلىپ, شاحتينسك قالاسىندا ەلەكتر جەلىسى تارتىلادى. سونداي-اق وبلىس ورتالىعىندا جول جوندەۋ جۇمىستارى جوسپارعا ساي جۇرگىزىلە بەرەدى.
جوعارىدا ايتىپ وتكەنىمىزدەي, جول كارتاسى اياسىندا اۋىلدىق جەرلەر دە نازاردان تىس قالمايدى. مىسالى, ەلدى مەكەندەردى اباتتاندىرۋ بويىنشا قولعا الىنىپ جاتقان 134 جوبا اياسىندا 47 كوشەگە جارىق شامدارى ورناتىلىپ, ەكى كوشەگە جاسىل جەلەكتەر وتىرعىزىلادى. بۇعان قوسا, 27 ساياباق پەن سكۆەر جاڭعىرتىلىپ, يەسىز تۇرعان 4 نىسان قۇلاتىلادى جانە 9 بالالار مەن سپورت الاڭدارىن اشۋ كوزدەلگەن.
سونىمەن قاتار اتالعان جول كارتاسى بويىنشا ۇزاق جىلدار بويى جوندەۋ كورمەي, توزىپ تۇرعان 458 مادەني-الەۋمەتتىك نىسانعا, ينجەنەرلىك-ترانسپورتتىق ينفراقۇرىلىمعا جانە تۇرعىن ءۇي كوممۋنالدىق شارۋاشىلىق نىساندارىنا جوندەۋ جۇمىستارى جۇرگىزىلەدى.
بيىل قولعا الىنعان «جۇمىسپەن قامتۋدىڭ جول كارتاسى» اۋقىمىنىڭ كەڭدىگىن ايتا كەتكەن ءلازىم. مىسالى, بۇل باعدارلاما 140 ەلدى مەكەننىڭ اۋماعىن قامتيدى. قازىرگى ۋاقىتتا بۇل شاراپاتتى شارۋاعا ات سالۋشىلاردى انىقتاۋ, جوندەۋ جۇمىستارىنىڭ كەستەسىن جاساۋ جانە وتاندىق وندىرۋشىلەردى تارتۋ ماقساتىندا جۇمىسقا قاجەتتى قۇرىلىس ماتەريالدارىنىڭ كولەمىن ناقتىلاۋ جۇمىستارى پىسىقتالۋ ۇستىندە.
بۇل جەردە اتالعان جوبالاردى ىسكە اسىرۋ جۇمىستارىنا رەسمي تىركەۋدە تۇرعان جۇمىسسىزداردى مەيلىنشە كوبىرەك تارتۋ باسىم باعىتتا قاراستىرىلاتىن بولادى. اسىرەسە جۇمىسسىز جاستارعا ەرەكشە كوڭىل بولىنەدى. بۇگىندە وسى ماقساتتا WhatsApp جەلىسىندە ونلاين-كەڭەس بەرۋ توبى اشىلىپ, بۇقارالىق اقپارات قۇرالدارىندا, الەۋمەتتىك جەلىلەردە «جۇمىسپەن قامتۋدىڭ جول كارتاسى» باعدارلاماسى تۋرالى جانە ينفراقۇرىلىمدىق جوبالارعا جۇمىسقا قابىلداۋ جايلى اقپاراتتار جاريالانعان.
ال قازىرگى تاڭدا ەڭبەك رەسۋرسىندا اراسىندا بەتونشى, تاس قالاۋشى, ەلەكتر شەبەرى, دانەكەرلەۋشى جانە باسقا دا ماماندىق يەلەرى بار 9715 ادامنىڭ تۇرعانىن ەسەپكە الساق, بۇل وبلىستاعى جۇمىسسىزدىق ماسەلەسىن شەشۋدەگى وتە زور مۇمكىندىك.
«جول كارتاسى» – ءجىتى نازاردا
جۇمىسپەن قامتۋدىڭ جول كارتاسى اياسىندا ساتىپ الىناتىن جۇمىس پەن قىزمەت تۇرلەرىنە قويىلاتىن تالاپتار دا قاتاڭ بولادى. بۇگىنگى كۇندە ول جونىندە باعدارلاما اكىمشىلەرى جانە قالالار مەن اۋدانداردىڭ باسشىلارى حابارلانىپ, ءتيىستى قۇجاتتاردى قابىلداپ العان. بۇدان بولەك, اۋداندار مەن قالالارداعى جۇمىسپەن قامتۋ ورتالىقتارىنىڭ بازاسىندا 18 قوزعالمالى رەكۋرت بەكەتتەرى اشىلىپ, اۆتوكولىكپەن قامتاماسىز ەتىلدى.
تاياۋدا جەزقازعان, ساتباەۆ قالالارىنا جۇمىس ساپارىمەن بارعان وبلىس باسشىسى جەڭىس قاسىمبەك وڭىردەگى «جۇمىسپەن قامتۋدىڭ جول كارتاسى» جانە «نۇرلى جەر» باعدارلامالارى بويىنشا اتقارىلىپ جاتقان جۇمىستارمەن تانىسقان بولاتىن. سوندا بەلگىلى بولعانداي, ءبىر عانا جەزقازعاندا اتالعان باعدارلاما بويىنشا جالپى سوماسى 3,9 ملرد تەڭگە بولاتىن 36 جوبا جۇزەگە اسىرىلۋدا ەكەن. ونىڭ ىشىندە, 33 ينفراقۇرىلىمدىق جوبا جانە ءۇش قۇرىلىس جوباسى بار. ال ساتباەۆ قالاسىندا جول كارتاسى اياسىندا تۇرعىن ءۇي-كوممۋنالدىق شارۋاشىلىعى, ءبىلىم بەرۋ, قۇرىلىس, دەنساۋلىق ساقتاۋ سالالارى بويىنشا 18 جوبانى جۇزەگە اسىرۋ جوسپارلانعان. ءۇش بالاباقشادا, ءتورت مەكتەپتە كۇردەلى جوندەۋ جۇمىستارى باستالىپتى. اۋرۋحانانى كۇردەلى جوندەۋ جوسپارلانعان. جولدار قالىپقا كەلتىرىلىپ جاتىر. وسى اتالعان بارلىق جوبالار بويىنشا 800-گە جۋىق ادامدى جۇمىسپەن قامتۋ كوزدەلگەن.
جالپى, «جۇمىسپەن قامتۋدىڭ جول كارتاسى-2020» باعدارلاماسىنىڭ قاراعاندى وبلىسىنداعى جۇمىسسىزدىقتىڭ دەڭگەيىن ءبىرشاما تومەندەتەتىنى بەلگىلى. وبلىس باسشىلىعى جوسپارداعى جوبالاردى تولىقتاي ىسكە اسىرۋعا بارلىق مۇمكىندىكتەردىڭ قاراستىرىلعانىن ايتادى. سونىمەن قاتار «جول كارتاسى» باعدارلاماسىنىڭ ورىندالۋ بارىسىن جەرگىلىكتى اتقارۋشى بيلىك ءجىتى نازارىنا العان. بۇل تۋراسىندا ءوڭىر باسشىسى جەڭىس قاسىمبەك وبلىستىڭ قالالارى مەن اۋداندارىن جۇمىس ساپارىمەن ارالاۋ بارىسىندا ءجيى ەسكە سالىپ ءجۇر.
قاراعاندى وبلىسى
