قازىر اۋداندا ونىڭ نەگىزگى اسپەكتىلەرىن جۇزەگە اسىرۋعا قاتىستى جۇمىستار اتقارىلۋدا. الەۋمەتتىك نىساندار قۇرىلىسى, ءوڭىردىڭ ەلدىمەكەندەرىندە ۇلگىلى كىتاپحانالار اشۋ, كيەلى ورىنداردى ناسيحاتتاۋ ءىسى جاندانا تۇسكەن. ەڭ باستىسى ءار جوبا اۋداننىڭ الەۋەتىن ارتتىرىپ, جاڭا ەسىمدەردى تانىتۋعا مۇمكىندىك بەرەدى.
بيىل «بولاشاققا باعدار: رۋحاني جاڭعىرۋ» باعدارلاماسىنا 3 جىل. ونى جۇزەگە اسىرۋ اياسىندا وڭىردە العاشقىلاردىڭ ءبىرى بولىپ اۋداندىق ورتا مەكتەپتە «رۋحاني جاڭعىرۋ» كابينەتى اشىلدى. «تۋعان جەر» ارنايى جوباسى اياسىندا جاڭا-قيما, زاپوروجسكوە جانە لوزوۆوە اۋىلدارىندا ۇلگىلى كىتاپحانالار پايدا بولدى. الداعى ۋاقىتتا پودگورنوە ەلدىمەكەنىندە دە اشىلماق. بۇدان بولەك «قازاقستاننىڭ 100 جاڭا ەسىمى» رەسپۋبليكالىق جوباسىنىڭ جەڭىمپازدارى اراسىندا جاقسى اۋدانىنىڭ تۇرعىندارى دا بار.
– وسى باعدارلاما قولعا الىنعالى بەرى ءبىز بىرقاتار جەتىستىكتەرگە قول جەتكىزدىك. مىسالى جەرلەستەرىمىز, بوكستان الەم چەمپيونى دينا جولامان مەن پروديۋسسەر ايديە ايداربەكوۆ جوبانىڭ جەڭىمپازى اتاندى. كيەلى ورىنداردىڭ رەسپۋبليكالىق تىزىمىنە كەنەسارى حاننىڭ ۇزەڭگىلەسى, قازاقتىڭ باتىرى باۋبەكتىڭ كەسەنەسى ەندى. سونىمەن بىرگە وسى كەسەنەنىڭ اشىلعانىنا 25 جىل تولۋىن اۋقىمدى تۇردە اتاپ وتتىك. «جاقسىنىڭ جاقسىسى – باۋبەك» اتتى كىتاپ جارىق كوردى,–دەيدى جاقسى اۋدانى اكىمىنىڭ ورىنباسارى ءلاززات سەيداحمەتوۆا.
قازىرگى تاڭدا جاقسى اۋدانىندا 80-نەن ارتىق شارا وتكىزىلىپ, بىرنەشە جوبا جۇزەگە اسىرىلدى. سونىڭ ءبىرى «رۋحاني قازىنا» ىشكى باعدارلاماسى اياسىنداعى رەسپۋبليكالىق تىزىمگە ەنگەن «ونەرلى قول – باقىتقا جول» جوباسى.
– «رۋحاني جاڭعىرۋ». وسى ەكى ءسوز قارتتىڭ دا, بالانىڭ دا ساناسىنا سەرپىلىس بەردى. مەن دە وسى باعدارلامانىڭ جۇزەگە اسۋىنا ءوز ۇلەسىمدى قوستىم. اۋداندىق ورتالىق كىتاپحانادا مەن «ونەرلى قول – باقىتقا جول» جوباسىن جۇزەگە اسىردىم. ونىڭ ماقساتى – جاستاردىڭ قولونەرگە دەگەن قىزىعۋشىلىعىن ارتتىرىپ, تىگىن شەبەرلەرىنىڭ جۇمىسىن دامىتۋ,–دەيدى جاقسى اۋدانىنىڭ تۇرعىنى باعداگۇل نۇرجانوۆا.
بۇدان بولەك كاسىپكەرلىك سەكتورىنىڭ دا قوسقان ۇلەسى زور. جەرگىلىكتى مەتسەناتتار ويىن الاڭدارىن, ماماندارعا ارنالعان ءۇي, قوعامدىق مونشا سالۋعا كومەكتەسۋدە. سونداي-اق ولار 2 ملن تەڭگەگە دەيىن قارجىلاي دەمەۋشىلىك كورسەتكەن. كاسىپكەرلەر تۋعان ولكەنىڭ گۇلدەنۋى ءۇشىن قايىرىمدى شارالار لەگىن ءالى دە جالعاستىرا بەرمەك.
