ۇلتتىق ەكونوميكا ءمينيسترى ر. دالەنوۆ, قازاقستان ەت-ءسۇت وداعى قاۋىمداستىعىنىڭ باسقارما توراعاسى ي. ساۋەر, «قازاقستان كاسىپكەرلەرىنىڭ فورۋمى» قاۋىمداستىعى كەڭەسىنىڭ توراعاسى ر. باتالوۆ, قازاقستان ماشينا جاساۋشىلارى وداعىنىڭ توراعاسى م. پىشەمباەۆ, «KazakhmysCopper» باسقارماسىنىڭ توراعاسى ب. قىرىقپىشەۆ, «اتامەكەن» ۇكپ توراعاسى ا. مىرزاحمەتوۆ بايانداما جاسادى.
كەشەندى جوسپار 10 باعىتتان جانە ىسكەرلىك بەلسەندىلىكتى ىنتالاندىرۋ, جۇمىسپەن قامتۋدى قولداۋ جانە حالىقتىڭ تابىسىن ارتتىرۋ جونىندەگى 172 جۇيەلى ءارى سالالىق شارالاردان تۇرادى. قۇجات جوباسىن بارلىق مۇددەلى تاراپتار جانە بيزنەس-قوعامداستىق, ونىڭ ىشىندە «اتامەكەن» ۇلتتىق كاسىپكەرلەر پالاتاسى مەن سالالىق بيزنەس قاۋىمداستىقتار ەگجەي-تەگجەيلى تالقىلاپ, ماقۇلداعان.
«كەشەندى جوسپاردى ىسكە اسىرۋ سىرتقى ورتا تيگىزەتىن كەلەڭسىز اسەردى بارىنشا ازايتۋعا, اسا ماڭىزدى سالالاردىڭ ءبارىن جانە وتاندىق بيزنەس قىزمەتىن جانداندىرۋ بويىنشا پراكتيكالىق ءىس-شارالاردى قامتۋى ءتيىس», — دەدى ا. مامين.
ۇسىنىلىپ وتىرعان شارالار قارجىلاندىرۋ جانە جەڭىلدىكتى نەسيە بەرۋ تەتىكتەرىن, ونىڭ ىشىندە ميكروبيزنەس تەتىكتەرىن ەداۋىر كەڭەيتۋدى, ەكسپورتتىق شىعىنداردى كەپىلدەندىرۋ جانە وتەۋ قۇرالدارىن بەلسەندى تۇردە قولدانۋدى كوزدەيدى. فورۆاردتىق جانە ۇزاق مەرزىمدى وففتەيك-كەلىسىمشارتتار جاساسۋ پراكتيكاسى ەنگىزىلەدى. جۇكتەمە ازايادى جانە سالىقتىق اكىمشىلەندىرۋ جەڭىلدەتىلەدى, سالىقتار مەن قارىزدار بويىنشا پرەفەرەنتسيالار مەن تولەمدى كەيىنگە قالدىرۋ قولدانىلادى, جەكەلەگەن ايىپپۇلدار مەن الىمدار الىنىپ تاستالادى, اكىمشىلىك كەدەرگىلەر ازايتىلادى.
تۇرعىن ءۇي قۇرىلىسى نارىعىندا سۇرانىستى ىنتالاندىرۋدىڭ, وتاندىق ءوندىرىستى جانە قىزمەت كورسەتۋ سالاسىن قولداۋدىڭ جاڭا تاسىلدەرى ەنگىزىلەدى.
«جالپى, كەشەندى جوسپاردا كوزدەلگەن شارالار بىرقاتار سالالاردىڭ بەلسەندىلىگىن قالپىنا كەلتىرۋگە مۇمكىندىك بەرەدى. بۇل سالالاردا 6 ملن-نان اسا ادام جۇمىسپەن قامتىلعان», — دەدى ا. مامين.
ۇكىمەت باسشىسى مەملەكەتتىك ورگانداردىڭ ءبىرىنشى باسشىلارىنا, وڭىرلەر اكىمدەرىنە جوسپاردىڭ ءىس-شارالارىن بەلگىلەنگەن مەرزىمدە ساپالى تۇردە ىسكە اسىرۋدى قامتاماسىز ەتۋدى تاپسىردى.
«مەملەكەت باسشىسىنىڭ تاپسىرماسى بويىنشا الەمدىك جانە ۇلتتىق ەكونوميكاداعى جاعدايدىڭ كۇرت وزگەرۋىنە بايلانىستى 2025 جىلعا دەيىنگى ستراتەگيالىق دامۋ جوسپارى جاڭا رەداكتسيادا ازىرلەنەدى. ول ينستيتۋتسيونالدىق جانە قۇرىلىمدىق رەفورمالاردى جۇرگىزۋدى قامتيتىن ەلدىڭ ورتا مەرزىمدى كەزەڭگە ارنالعان جاڭا ەكونوميكالىق باعىتىنىڭ نەگىزگى باعىتتارىن ايقىندايدى», — دەپ ا. مامين, وسى جىلدىڭ 1 شىلدەسىنە دەيىن قۇجاتتىڭ جاڭا رەداكتسياداعى جوباسىن ازىرلەۋدى تاپسىردى.
