مۋزەي كۇنى ديرەكتوردىڭ ورىنباسارى اسەمگۇل قىدىبەكوۆا وزدەرىنىڭ جاڭا جوبالارىنىڭ جوسپارلارىمەن تانىستىردى جانە ۇجىم مۇشەلەرىن مەرەكەلەرىمەن قۇتتىقتادى. ونىڭ ايتۋىنا قاراعاندا اعىلشىن تىلىندە جۇرگىزىلەتىن ەكسكۋرسيالار ارقىلى شەتەلدىكتەردىڭ ابىلاي حاننىڭ ءومىرى مەن ىسىنە دەگەن قىزىعۋشىلىقتارى ارتا تۇسۋگە ءتيىس. قازىر سولتۇستىك قازاقستان ۋنيۆەرسيتەتىندە وقيتىن شەتەلدىك جاستار ءبىرشاما كوپ, ونىڭ ۇستىنە قالا قوناقتارى دا كارانتيننەن كەيىن كوبەيەرى ءسوزسىز.
وبلىستىق پوليتسيا مۇراجايى دا كاسىپتىك مەرەكەسىن ەرەكشە تارتىپتە اتاپ ءوتتى. بۇل كۇنى بەتپەردە كيگەن كورەرمەندەرگە پوليتسيا اۋلەتتەرىنىڭ ۇرپاقتارى وزدەرىنىڭ اتالارى مەن اكەلەرى تاپسىرعان ەكسپوناتتاردىڭ تاريحى تۋرالى بايانداپ بەردى. سولاردىڭ ءبىرى, قىزىلجار اۋدانى پوليتسيا ءبولىمى باستىعىنىڭ ورىنباسارى, پوليتسيا مايورى باحتيار ەسىموۆ ءبىر وتباسىدان شىققان ءۇشىنشى ۇرپاق. ونىڭ اتاسى عازيز ەسىموۆ 1951 جىلى 21 ماۋسىم كۇنى قىزمەتتىك مىندەتىن اتقارۋ كەزىندە قايتىس بولىپتى. ول دەمالىس ساياباعىندا قىزعا شابۋىل جاساعان بۇزاقىلاردى ۇستاۋ كەزىندە موينىنان پىشاق جاراقاتىن العان. نەبارى 25 جاستا بولعان ونىڭ ەسىمى ارىپتەستەرىنىڭ ەسىندە ماڭگىگە قالىپ, 2016 جىلى سقو پد اكىمشىلىك عيماراتىنىڭ جانىندا اشىلعان جاس قىزمەتكەرلەردىڭ اللەياسىنا ونىڭ ەسىمى بەرىلگەن ەكەن. ال ب.ەسىموۆتىڭ اكەسى پوليتسيا مايورى شەنىندە وتستاۆكاعا شىققان. ەندى باحتيار ونىڭ دا جەكە زاتتارىن مۋزەيگە وتكىزبەك.
سقو پد باستىعى پوليتسيا پولكوۆنيگى مارات تولەباەۆ مۋزەي قورىن ساقتاۋشىلاردى جىلى قۇتتىقتاپ, قىزمەتكەرلەردىڭ پاتريوتتىق سەزىمدەرىن ارتتىرۋداعى قاجىرلى ەڭبەكتەرىنە العىس ءبىلدىردى. مۋزەي باسشىسى ليۋبوۆ وسينسكايا پد مۋزەيىنىڭ جەتىستىكتەرى, ءىىم جۇيەسىندەگى ۇزدىكتەردىڭ ءبىرى اتانۋى جەكە قۇرامنىڭ قوسقان زور ۇلەسى ەكەندىگىن اتاپ ءوتتى. پوليتسەيلەر مەن ارداگەرلەردىڭ تۋىستارى ەكسپوناتتار جايلى ءوز ويلارىن ورتاعا سالدى.
سولتۇستىك قازاقستان وبلىسى
