كاسىپتىك ءبىلىم كافەدراسىنىڭ مۇرىندىق بولۋىمەن ۇيىمداستىرىلعان شىعارماشىلىق سايىسقا كوللەدج جانە مەكتەپ ءبىتىرۋشى تۇلەكتەر قاتىسىپ, وزدەرىنىڭ تىرناقالدى تۋىندىلارىن ۇسىندى.
– بايقاۋعا قاعاز بەتىنە نەمەسە كەنەپكە ءتۇرلى-ءتۇستى بوياۋمەن (اكۆارەل, گۋاش, اكريل, مايلى بوياۋ) نەمەسە گرافيكالىق قۇرالدارمەن (تۋش, پەرو, سانگينا, ۋگول, قارىنداش, ت.ب.) اباي قۇنانباي ۇلىنىڭ شىعارمالارىنا ارنالىپ سالىنعان جۇمىستار قابىلداندى. سۋرەتتى سالۋعا 2 ساعات ۋاقىت ءبولىندى. Zoom پلاتفورماسى ارقىلى كوميسسيا مۇشەلەرىنىڭ باقىلاۋىمەن قاتىسۋشىلاردىڭ تۋىندىلارى باعالاندى. العاش رەت ءوتىپ وتىرعان سايىسقا 26 جاس قىلقالام شەبەرى قاتىسىپ, باقتارى مەن باپتارىن سىنادى, – دەيدى كاسىپتىك ءبىلىم كافەدراسىنىڭ مەڭگەرۋشىسى راحيا دارمەنوۆا.
بايقاۋدا الەۋمەتتىك-گۋمانيتارلىق فاكۋلتەتىنىڭ دەكانى جامال اشىربەكوۆا, كاسىپتىك ءبىلىم كافەدراسىنىڭ مەڭگەرۋشىسى راحيا دارمەنوۆا, قازاقستان رەسپۋبليكاسى سۋرەتشىلەر وداعىنىڭ مۇشەسى مارات تۇرعىمباي جانە فاكۋلتەتتىڭ بىلىكتى وقىتۋشىلارى قازىلىق جاسادى.
ونلاين فورماتتا وتكەن شىعارماشىلىق سايىستا ءبىرىنشى ورىندى «جەلسىز تۇندە جارىق اي» تاقىرىبىنداعى كارتينانى سالعان قىزىلوردا وبلىسىنىڭ ارال اۋدانىنداعى №260 مەكتەپتىڭ 11-سىنىپ وقۋشىسى فاريدا جولمىرزاەۆا يەلەندى. ەكىنشى ورىنعا «ابايتانۋ» تۋىندىسىمەن دايىندىق كۋرسىنىڭ تىڭداۋشىسى ءبۇلدىرشىن تۇردىباي لايىق دەپ تانىلسا, ءۇشىنشى ورىن «قانسوناردا بۇركىتشى شىعادى اڭعا» اتتى سۋرەتتىڭ اۆتورى الماتى تەحنولوگيا جانە فلوريستيكا كوللەدجىنىڭ ستۋدەنتى مەرۋەرت سادىقوۆاعا بۇيىردى.
بايقاۋ قورىتىندىسى بويىنشا ءبىرىنشى ورىن العان قاتىسۋشى قىزدار ۋنيۆەرسيتەتىندە وقۋعا ءبىر جىلدىق وقۋ اقىسىنا 50 پايىزدىق, ەكىنشى ورىن العان قاتىسۋشى 25 پايىزدىق جانە ءۇشىنشى ورىن العان قاتىسۋشى 15 پايىزدىق جەڭىلدىك الادى.
ايتا كەتەيىك, سايىس «كوركەم ەڭبەك جانە سىزۋ» ءبىلىم بەرۋ باعدارلاماسى توبى بويىنشا جۇرگىزىلدى.
