الەمدىك پاندەميا كەزىندە ەل پرەزيدەنتى بارلىق كاسىپكەرلەردى ءوز وتانداستارىنا بارىنشا قولداۋ كورسەتۋگە جانە كومەك كورسەتۋگە شاقىرعانى بەلگىلى. بۇل جاي كوپتەگەن ادامداردى بەي-جاي قالدىرمادى.
بۇل يدەيانى قيىن كەزەڭدە ءبىر-بىرىنە جاناشىرلىق تانىتۋ, قامقور بولۋ, بىرلىكتى ساقتاۋ پارىزىمىز دەپ بىلەتىن ۆولونتەرلىك, قايىرىمدىلىق جانە باسقا دا ۇيىمدار, جەكە كاسىپكەرلەر قولدادى.
ولاردىڭ ءبىرى, قيىن كەزەڭدە جاقسى ءىستى قولعا العان الماتىلىق جاس كاسىپكەر ايدار جاقىپوۆ بولدى. الدىمەن ايدار الماتى وبلىسىنىڭ تۇزدىباستاۋ اۋىلىنىڭ 50 كوپ بالالى وتباسىنا قارجىلاي كومەك كورسەتكەن ەدى. بۇل ءىستى جاقسى داستۇرگە اينالدىرىپ, ءوز ەستافەتاسىن دوستارىنا, ىسكەرلەرگە جولدادى. ناتيجەسىندە ونى قولداعان دوستارى ەستافەتانى جالعاستىرىپ, قايىرىمدىلىق ىستەر جاسادى, كوپتەگەن از قامتىلعان وتباسىلارعا قولداۋ كورسەتتى. قايىرىمدى ىستەر ەستافەتاسى اياسىندا ايداردى قولداعان «ينتانت» كومپانياسى, دەنە قىزۋىن ولشەيتىن, يننوۆاتسيالىق 5 تەپلوۆيزيوندى كامەراسىن ۇسىنعان بولاتىن. ايدار ونىڭ ءبىرىن الماتى قالاسىنىڭ حقو-نا سىيعا تارتتى.
«بىزگە ايدار وسىنداي بىرەگەي اپپاراتتى تەگىن ۇسىندى. ونىڭ ۇستىنە, بۇل الەمدىك يننوۆاتسيالىق ونىمدەر وندىرۋدەگى الەمدىك جەتەكشى «Hikvision» كومپانياسىنىڭ ءونىمى ەكەن. ۆيرۋستى جۇقتىرۋدىڭ نەگىزگى سيمپتومدارىنىڭ ءبىرى جوعارى تەمپەراتۋرا بولىپ تابىلاتىنى بەلگىلى. دەمەك, جوعارى تەمپەراتۋرا دالدىگى بار تەپلوۆيزيوندى كامەرا الدىن الا تەكسەرۋ جۇرگىزۋ ءۇشىن دەنەنىڭ جوعارى تەمپەراتۋراسىن انىقتاي الادى. ءبىز اپپاراتتى قۋانا قابىلداپ, مەدەۋ حقو-نا قويدىق. وسىنداي يگى ءىسى ءۇشىن ايدار جاقىپوۆقا العىس بىلدىرەمىز. وسىعان دەيىن ول ءوزى باسقاراتىن باكتەريتسيدتى شامدار شىعاراتىن كومپانياسىنىڭ ونىمىمەن مەدەۋ اۋدانىنداعى حقو كابينەتىن جابدىقتاپ بەرگەن ەدى. ءبىز شىن جۇرەكتەن قۋانىشتىمىز», - دەيدى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالىنىڭ ديرەكتورى دانيار قىرىقباەۆ.
«مەن قازاق حالقىنىڭ شىنايى پەرزەنتى رەتىندە حالقىما جاقسىلىق جاساعىم كەلەدى. مەدەۋ فرونت-وفيسىنە سىيعا تارتقان تەپلوۆيزيوندى كامەرا ءار ادامنىڭ تەمپەراتۋراسىن ءبىر سەكۋند ىشىندە انىقتاي الادى. وسىلايشا, تەمپەراتۋرانى تەكسەرۋ قاجەت ۋچاسكەدەن ءوتۋ كەزىندە كەپتەلىستەر بولمايدى. ادامنىڭ جاناسۋىنسىز تەمپەراتۋراسىن 1-دەن 2,5 مەترگە دەيىنگى قاشىقتىقتان ولشەيدى جانە ءبىر مەزەتتە 30 ادامنىڭ قىزۋىن ولشەي الادى. جوعارى قىزۋى بار ادامدى, بەتپەردەسىز ادامدى انىقتاپ, دىبىستىق دابىل بەرەدى. مەنىڭ ويىمشا, بۇل اپپارات كوبىرەك پايدالى ءارى جۇقتىرۋ قاۋپى از. بارلىق ادامداردى قيىن ساتتە ءبىر-بىرىنە كومەكتەسۋگە جانە قولداۋعا شاقىرعىم كەلەدى. قايىرىمدىلىق جاساۋدى, قامقورلىق كورسەتۋدى جانە باسقالاردى قۋانتۋدى توقتاتپاڭىزدار», - دەيدى جاس مەتسەنات ايدار جاقىپوۆ.
ەستەرىڭىزگە سالا كەتەيىك, الماتى قالاسى بويىنشا حالىققا قىزمەت كورسەتۋ ورتالىقتارى ءوز جۇمىسىن ءالى باستاعان جوق.
حقو-لار ازاماتتارعا مەملەكەتتىك قىزمەتتەردى الماتى قالاسىنىڭ باس سانيتارلىق دارىگەرى ءتيىستى شەشىم قابىلداعاننان كەيىن عانا كورسەتە باستايدى.
الماتى
