كوكشەتاۋدا لاپاروسكوپيالىق وتالار بۇرىننان جاسالادى. اتباسار اۋدانى قازىر بۇل ءادىستى ەندى-ەندى مەڭگەرۋدە. ال اقكولدىكتەر وتا جاساۋعا قاجەتتى مەديتسينالىق قۇرىلعىلاردى تاياۋدا عانا ساتىپ الىپتى. ال جارقايىڭ اۋدانى ءبىرشاما تاجىريبە جيناقتاپ ۇلگەرگەن. اۋداندىق ورتالىق اۋرۋحانا قاجەتتى قۇرال-جابدىقتارمەن 84 پروتسەنتكە قامتاماسىز ەتىلگەن. وكىنىشكە قاراي, دارىگەرلەر 66 پروتسەنت قانا. اۋداندا دارىگەرلەردىڭ جەتىسپەۋشىلىگى سوڭعى جىلدارى قاتتى سەزىلۋدە. ناقتىراق ايتقاندا, 22 مامان, ونىڭ ىشىندە 13 دارىگەر جەتىسپەيدى.
– قازىرگى ۋاقىتتا ءبىز بىرنەشە زەرتتەۋ ءتۇرىن جۇرگىزۋدەمىز. اتاپ ايتقاندا, رەنتگەنوگرافيالىق, فليۋروگرافيالىق, مامموگرافيالىق جانە ۋلترادىبىستىق زەرتتەۋلەر. لاپاروسكوپيالىق تىرەۋدى قولدانا وتىرىپ وتانىڭ ءار ءتۇرىن جاسايمىز, – دەيدى جارقايىڭ اۋداندىق ورتالىق اۋرۋحاناسى باس دارىگەرىنىڭ مىندەتىن اتقارۋشى يننا رۋسەليك.
ەندوۆيدەوحيرۋرگيا – زاماناۋي حيرۋرگيا باعىتتارىنىڭ ءبىرى. ءداستۇرلى تەحنيكامەن سالىستىرعاندا ونىڭ ارتىقشىلىقتارى كوپ. سونىڭ ارقاسىندا بۇل ءادىس كەڭىنەن بەلەڭ الىپ كەلەدى.
بۇل لاپاروسكوپيالىق ءادىستىڭ تاعى بىرنەشە ارتىقشىلىعى بار. بيىل اۋدان حيرۋرگتارى 69 وتا جاساپ, ونىڭ 43-ىنە زاماناۋي ءادىس قولدانىلدى.
– بۇل وپەراتسيانىڭ ارتىقشىلىعى وتادان كەيىن ناۋقاس جىلدام جازىلادى. كەلەسى كۇنى ول ورنىنان تۇرا الادى. 2,3 تاۋلىك وتكەن سوڭ ناۋقاستى اۋرۋحانادان شىعارامىز. اۋرۋ جۇقتىرۋ, اسقىنۋ قاۋپى از. ەگەر وتانى ءىش قۋىسىنا 4 جىل بۇرىنعىداي ءداستۇرلى ادىسپەن جاساساق, ناۋقاس تەك 3-6 ايدان كەيىن عانا قالپىنا كەلەر ەدى, – دەيدى جارقايىڭ اۋداندىق ورتالىق اۋرۋحاناسى حيرۋرگيا بولىمشەسىنىڭ جەتەكشىسى ماحامبەت دوسمۇراتوۆ.
اقمولا وبلىسى
