سونىمەن قاتار كۆارتالارالىق اۋماقتار, تۇرعىن ۇيلەر, ءۇيدىڭ كىرەبەرىستەرى مەن ليفتىلەرىنە دەزينفەكتسيا جاسالادى. سونداي-اق كوشەلەر مەن ەلوردا ماگيسترالدارى زالالسىزداندىرىلادى. ەلوردا اكىمىنىڭ ورىنباسارى التىنبەك قايساعاليەۆتىڭ ايتۋىنشا ينفەكتسيا اعاشتاردا, جولداردا جانە ت.ب جەرلەردە دە تۇرىپ قالۋى مۇمكىن.
قالانى دەزينفەكتسيالاۋ جۇمىستارىنا كوممۋنالدىق قىزمەتتەرمەن بىرگە قورعانىس مينيسترلىگىنىڭ قىزمەتكەرلەرى, تجد جانە مامانداندىرىلعان كومپانيالاردىڭ قىزمەتكەرلەرى دە قاتىسىپ جاتىر. ونداعان ءورت ءسوندىرۋ جانە ارنايى تەحنيكالار جۇمىلدىرىلعان. دەزينفەكتسيالاۋ جۇمىستارى جاياۋ دا, ارنايى ماشينالاردىڭ كومەگىمەن شاشۋ ارقىلى دا جۇرگىزىلەدى.
ەسكە سالا كەتەيىك, 2020 جىلدىڭ 11 مامىرىنان باستاپ تۇرعىندارعا الەۋمەتتىك ديستانتسيا مەن سانيتارلىق نورمالاردى قاتاڭ ساقتاي وتىرىپ, پاركتەرگە, الاڭقايلار مەن سكۆەرلەرگە بارۋىنا رۇقسات بەرىلدى. وسىعان بايلانىستى اتالعان اۋماقتاردا دەزينفەكتسيالاۋ جۇمىستارى كۇشەيتىلدى.
-قازىر ادامدار سەرۋەندەۋگە شىعىپ جاتقاندىقتان بىزدەر بالالار الاڭىن, ورىندىقتاردى, قوقىس جاشىكتەرىن زالالسىزداندىرىپ جاتىرمىز. سەبەبى ول جەرلەردىڭ بارىندە ادامدار جۇرەدى. ادامداردى قورعاۋ - ءبىزدىڭ جۇمىسىمىز, - دەدى «استانا دەزينفەكتسيا» جشس ەنتەمولوگى ايمان يسينا.
