- سىزدەردى حالىقارالىق مەدبيكەلەر كۇنىمەن قۇتتىقتايمىن! ءوزىم دە جۇمىستى الماتىداعى ورتالىق قالالىق كلينيكالىق اۋرۋحانادا جانە جەدەل مەديتسينالىق كومەك اۋرۋحاناسىندا مەيىرگەر بولىپ باستادىم, سوندىقتان, تاۋلىگىنە 24 ساعات كەزەكشىلىككە تۇسكەندە ءتوزىم مەن شىدامدىلىقتىڭ اسا قاجەت ەكەنىن مەن ءوز تاجىريبەمنەن جاقسى بىلەمىن. ءتۇرلى پروتسەدۋرا جاسايسىڭ, ناۋقاستارعا ءدارى ەگۋ, جان ساقتاۋ بولمەسىندەگى جاعدايى اۋىر پاتسيەنتتەردى تۇنىمەن كۇزەتۋ قاجەت, مۇندايدا ادامدا «مىندەتىمدى ءساتتى اتقارسام» دەگەن وي عانا بولادى. سىزدەر اتقارىپ وتىرعان جۇمىس - قايىرىمدىلىق, مەيىرىمدىلىك پەن گۋمانيزمگە نەگىزدەلگەن. بۇل قاسيەتتەر مەديتسينالىق اق حالات كيگەن ءاربىر مامانعا ۇلكەن جاۋاپكەرشىلىك جۇكتەيدى, - دەپ جازدى مينيستر.
سونداي-اق ول مەدبيكەلەردىڭ دەنساۋلىق ساقتاۋ جۇيەسىندە ومىرلىك ماڭىزدى قىزمەت اتقاراتىنىن جازعان.
- كوبىڭىز وسى ماماندىققا ابدەن بەيىمدەلىپ الدىڭىز, ءتىپتى, كومەككە مۇقتاج ادامدارعا شىنايى قىزمەت ەتۋ – ءومىر ءسۇرۋ سالتىنا اينالدى. جالپى, ناۋقاستى ەمدەۋ ىسىندە مەيىربيكەلەردىڭ ەڭبەگى وتە ماڭىزدى. مەدبيكەلەر ادام دەنساۋلىعىنا قاۋىپ توندىرەتىن ەپيدەميا, پاندەميامەن كۇرەستە دە الدىڭعى قاتاردا تۇردى. بۇكىل الەمدەگى مەدبيكەلەر COVID-19 قاسقايىپ قارسى شىقتى. ەلىمىزدەگى مەيىربيكەلەر مەن مەيىرگەرلەرگە مينيسترلىكتىڭ اتىنان العىس بىلدىرەمىن. ءوز ىستەرىڭزگە دەگەن ادالدىق پەن پاتسيەنتتەرگە دەگەن قايىرىمعا, مەيىرىمگە تولى قارىم-قاتىناستارىڭىز ءۇشىن كوپ راقمەت! سىزدەرگە زور دەنساۋلىق, وتباسىلارىڭىزعا اماندىق جانە ساتتىلىك تىلەيمىن! - دەلىنگەن قۇتتىقتاۋدا.
