ءىرى ءوندىرىس ورىندارى شوعىرلانعان ءبورلى اۋدانىنداعى اۋرۋحانادا بۇعان دەيىن 19 جەدەل جاردەم كولىگى بار ەدى. بىراق ولاردىڭ دەنى توزىپ تۇر. وبلىستىق دەنساۋلىق ساقتاۋ باسقارماسى تاراپىنان اۋداندىق اۋرۋحانانىڭ اۆتوپاركى جىل سايىن ەكى جەدەل جاردەم كولىگىمەن تولىعىپ كەلەدى. دەگەنمەن, حالىق سانى كۇن ساناپ ارتىپ كەلە جاتقان اقساي قالاسىنىڭ وزىندە جەدەل جاردەم كولىگى تاپشى. سوندىقتان دا اۋدان باسشىلىعى حالىق دەنساۋلىعىن قورعاۋ, اۋداندىق اۋرۋحانانىڭ ماتەريالدىق-تەحنيكالىق بازاسىن كۇشەيتۋ ماقساتىندا جۇيەلى جۇمىس جاسالىپ كەلەدى.
ادامداردىڭ ءومىرى, حالىق دەنساۋلىعى – ءبىزدىڭ ەڭ باستى قازىنامىز. مەملەكەت باسشىلىعى تاراپىنان دا بۇل ماسەلەگە ەرەكشە ءمان بەرىلەدى. بيىلعى جىلدىڭ سوڭىنا دەيىن اۋداندىق اۋرۋحانادا توزىعى جەتكەن قۇرال-جابدىقتار تۇگەلىمەن اۋىستىرىلاتىن بولادى. حالىق دەنساۋلىعىن نىعايتۋ, قاۋىپتى جاعدايلاردى بولدىرماۋ باعىتىندا بىرلەسە اتقارعان جۇمىسى ءۇشىن جەرگىلىكتى كومپانيا باسشىلارىنا العىس ايتامىن, - دەدى سالتاناتتى شاراعا قاتىسقان ءبورلى اۋدانىنىڭ اكىمى ميرجان ساتقانوۆ.
رامازان ايىندا جومارتتىق كورسەتىپ, قايىرىمدى ءىس جاساعان «قازبۇرگاز» كومپانياسى ءوڭىردىڭ ونەركاسىبىن العا سۇيرەپ, مۇناي-گاز سالاسىندا ءوز ورنىن تاپقان كاسىپورىن. مۇناي جانە گاز ۇڭعىمالارىن قۇراستىرۋ, سىناقتان وتكىزۋ, بۇرعىلاۋ جۇرگىزۋمەن اينالىساتىن بۇل كومپانيانىڭ جاقسى ءىسىن جالعاستىراتىن ءوندىرىس ورىندارى از ەمەس ەكەن. ماسەلەن, اۋدانداعى ەڭ ءىرى قاراشىعاناق پەترولەۋم وپەرەيتينگ ب.ۆ. كومپانياسى دا اۋداندىق اۋرۋحاناعا «Perseus A500» جانە «Fabius Plus» (جاساندى تىنىس الدىرۋ فۋنكتسياسى بار ناركوز اپپاراتتارى) كومپرەسسورلارىمەن بىرگە ءۇش انەستەزيولوگيالىق جۇمىس ستانتسياسىن سىيعا بەردى. بۇعان قوسا كومپانيا وسى ايدىڭ سوڭىنا دەيىن اۋداندىق اۋرۋحاناعا تاعى ەكى جەدەل جاردەم كولىگىن سىيلاماق.
باتىس قازاقستان
