وبلىس اكىمدىگىنىڭ مالىمەتىنشە, باعدارلامانىڭ ورىندالۋى جونىندە وتكەن وتىرىستا ءوڭىر باسشىسى ابىلقايىر سقاقوۆ ءاربىر جوبانىڭ ىسكە قوسىلۋى قاتاڭ باقىلاۋدا بولاتىنىن ەسكەرتكەن. ياعني, باقىلاۋ بارىسى جۇمىس ورىندارىن قۇرۋعا ارنالعان مەملەكەتتىك باعدارلامانى ناقتى ىسكە اسىرۋ مەن مەرزىمى ءۇشىن جاۋاپكەرشىلىك جۇكتەيدى.
– ءبىز تىزبەلەگەن 200 جوبانىڭ ىسكە قوسىلۋى – وڭىردە 12 مىڭنان استام ادامنىڭ جۇمىسپەن قامتىلۋى دەگەن ءسوز. بۇل ادامداردىڭ كوبى «جۇمىسپەن قامتۋ ورتالىقتارىندا» جۇمىسسىز رەتىندە ەسەپتە تۇرعانى بەلگىلى. سول ءۇشىن دە «جۇمىسپەن قامتۋدىڭ جول كارتاسى-2020» بويىنشا جوسپارلانعان بارلىق جوبا جىل سوڭىنا دەيىن اياقتالۋى ءتيىس, – دەدى ابىلقايىر سقاقوۆ.
تۇرعىنداردى جۇمىسپەن قامتۋ باعدارلاماسى ەلىمىزدەگى توتەنشە جاعداي كەزىندەگى احۋالعا وراي قالا, اۋدان اكىمدەرىنە, ءتۇرلى باسقارمالارعا بارلىق جوبالىق جانە كونكۋرستىق قۇجاتتامالاردى قايتا قاراۋ قاجەتتىگى تاپسىرىلدى. ەندى «جۇمىسپەن قامتۋدىڭ جول كارتاسى-2020» باعدارلاماسى جەرگىلىكتى سىبايلاس جەمقورلىقپەن كۇرەس قىزمەتى ماماندارىنىڭ باقىلاۋىندا بولماق. بۇعان قوسا ونى Nur Otan پارتياسىنىڭ مۇشەلەرى, قالالىق, اۋداندىق ءماسليحات دەپۋتاتتارى, جۇرتشىلىق قاداعالايدى. بارلىق جۇمىستاردى قاداعالاۋ بارىسى فوتو, بەينەتىركەۋ مۇمكىندىگىمەن بىرگە ءموبيلدى قوسىمشا توپ قۇرىلادى.
قاتاڭ تۇردەگى باقىلاۋ جاڭا جۇمىس ورىندارىن قۇرۋ, ءوڭىر تۇرعىندارىنىڭ الەۋەتىن ارتتىرۋدا جوبالار قۇنىنىڭ وسۋىنە, جۇمىستاردىڭ ساپاسىز ورىندالۋىنا جول بەرمەۋى قاجەت.
وبلىستىق تەكسەرۋ كوميسسياسىنىڭ سايتىنان بۇعان دەيىن باعدارلامالارعا بولىنگەن قىرۋار قاراجاتتىڭ قالاي ماقساتسىز جانە ءتيىمسىز جۇمسالعانىن كورۋگە بولادى. سىبايلاس جەمقورلىققا قارسى ءىس-قيمىل اگەنتتىگى پاۆلودار وبلىسى بويىنشا دەپارتامەنتىنىڭ باسشىسى ايدار تاستەمىروۆتىڭ ايتۋىنشا, وسى جىلى وڭىردە سىبايلاس جەمقورلىق فاكتىلەرى بويىنشا 70 قىلمىستىق ءىس تەرگەلگەن بولسا, 15 قىلمىستىق ءىس سوتقا جىبەرىلگەن.
– جالپى مەردىگەرلەر جۇمىسىنىڭ مونيتورينگىندە سىبايلاس جەمقورلىق ارەكەتتەرىنە جول بەرمەۋ ءۇشىن بۇل ىسكە جەرگىلىكتى قۇقىق قورعاۋ ورگاندارىنىڭ قاتىسۋىن دا سۇرايمىز, – دەدى ابىلقايىر سقاقوۆ.
ال شاعىن جانە ورتا كاسىپكەرلىك جۇمىسىن تۇرالاتقان قازىرگى جاعدايدا ىسكە اسىرىلۋعا ۇسىنىلعان جوبالاردى تەكسەرەتىن, ۋاقىتتى سوزاتىن كوميسسيا تەكسەرۋلەرى الىندى. وبلىس بويىنشا 45 مىڭنان استام شاعىن جانە ورتا كاسىپكەرلىك نىساننىڭ يەلەرى مىندەتتى الەۋمەتتىك مەديتسينالىق ساقتاندىرۋ تولەمدەرىنەن, باسقا دا جارنالار, اۋدارىمداردان بوساتىلدى. ۇكىمەتتىڭ قاۋلىسىمەن كاسىپكەرلىكتى قولداۋعا ارنالعان مەملەكەتتىك باعدارلامالاردىڭ سالالىق شەكتەۋلەرى دە جويىلدى.
وڭىرلىك كاسىپكەرلىك جانە ساۋدا باسقارماسىنىڭ باسشىسى جايىق حاسانوۆتىڭ ايتۋىنشا, «بيزنەستىڭ جول كارتاسى-2020» مەن «قاراپايىم زاتتار ەكونوميكاسى» باعدارلامالارى اياسىندا بيىل وبلىستاعى شاعىن جانە ورتا بيزنەستى قولداۋعا 5 ملرد تەڭگە بولىنگەن.
جىل باسىندا «بيزنەستىڭ جول كارتاسى-2020» باعدارلاماسى بويىنشا قۇنى 2,2 ملرد تەڭگە تۇراتىن وڭدەۋ ونەركاسىبى, كولىك سالالارىنا ارنالعان 112 جوباعا قولداۋ كورسەتىلدى. سونىمەن قاتار 6,3 ملرد تەڭگەگە 193 جوبادان تۇراتىن توپ قۇرىلدى. «قاراپايىم زاتتار ەكونوميكاسىنا» جىل باسىنان بەرى قۇنى 4,4 ملرد تەڭگە بولاتىن 16 جوبا ىسكە اسىرىلسا, 22,3 ملرد تەڭگەگە 59 جوبا ۇسىنىلدى.
باعدارلامالار ىسكەرلىك بەلسەندىلىكتىڭ تومەندەۋى, كارانتين رەجىمى جاعدايىندا كاسىپكەرلىك قىزمەتتىڭ ۋاقىتشا توقتاتىلۋى, ەكىنشى دەڭگەيلى بانكتەردە زاڭدى تۇلعالارعا قىزمەت كورسەتۋدىڭ شەكتەلۋىنەن جۇمىس بارىسى تومەندەگەن. بىراق جوبالاردىڭ ۋاقىتىندا ورىندالماۋىنا بۇل دا سەبەپ ەمەس. بۇعان دەيىن دە قاپتاعان سانداردىڭ ورتاسىندا قالعان جارىمجان جوبالاردان باسقارمالاردىڭ وزدەرى دە اداسىپ جۇرگەن-ءدى. سوندىقتان وبلىس اكىمدىگى «بيزنەستىڭ جول كارتاسى-2020», «قاراپايىم زاتتار ەكونوميكاسى» باعدارلامالارىنىڭ باسىمدىقتارى مەن تالاپتارىن جەرگىلىكتى جەردە ءتۇسىندىرۋ, اقپاراتتاندىرۋ بويىنشا جۇرگىزىلگەن جۇمىستىڭ ناتيجەسىن ناقتىلايتىن ەسەپ بەرۋدى مىندەتتەدى.
پاۆلودار وبلىسى
